Read koho I Samuel 22 Bible Online

I Samuel 22 - koho bible

I Samuel 22

¹Dabit lik bơh tiah hơ̆ mơ dô pleh hơ rgồng lŭ Adulam. Tòm tŭ ală bi khai mơ hìu nhă bèp khai dê neh kơno bơh bơta hơ̆ gen bol khai mù tus hơ khai tềng hơ̆.

²Jơh ală cau tìp bơta gơlòng bòl glar hala jơh ală cau gơkòl dồs hala jơh ală cau ò hừh nùs lòt tus ơm bal mơ khai, mơ khai gơlik gơs cau lam bồ bol hơ̆. Ală cau ơm bal mơ khai pơgap poan rhiang nă.

³Bơh tềng hơ̆ Dabit lòt tus hơ Mispa tòm lơgar Môap. Khai đơs mơ bơtau Môap lah: “Dan ai gơnoar mè bèp añ in tus ơm bal mơ bơtau, jơl tus di tŭ añ git ñchi bơta Yàng Tom Trồ rơp lơh añ in.”

⁴Behơ̆ Dabit lòi bol khai ơm bal mơ bơtau Môap, mơ bol khai ơm bal mơ bơtau hơ̆ jơh tŭ Dabit ơm tòm theng kơ̆ cê.

⁵Gen cau gơnoar hwơr Gat đơs mơ Dabit lah: “Bañ ơm tòm theng do; lik lòt tĕ tus hơ lơgar Juda.” Behơ̆ Dabit lik mơ lòt tus tòm brê Heret.

⁶Sol kơno lah Dabit mơ ală cau khai dê neh ơm tiah lơi. Tŭ hơ̆ Sol ơm hơđang dòr Gibea, nggui tòm tiah mƀur dô đòm chi nho rề, at tà tòm tê, mơ gơs jơh ală cau duh broă khai dê ntào gùt dar khai.

⁷Sol đơs mơ bol khai lah: “Ơ ală cau Benjamin, tŭ do iat tĕ! Ngan sơl la kòn klau Jese dê rơp ai jơh ală bol mê in ală ƀlàng sre bal mơ ală suơn ño ơ? Ngan sơl la khai rơp bơtào jơh ală bol mê gơs ală kwang at bồ rbô nă mơ ală kwang at bồ rhiang nă ơ?

⁸Ngan sơl la tài bơh hơ̆ tàng jơh ală bol mê tòmbơyai òm jòi kai gơrmơ̆i tòmdră mơ añ? Ò gơs dô nă cau lơi ai añ in git tòm tŭ kòn klau añ bơtào bơta ho bal mơ kòn klau Jese dê. Ò gơs dô nă cau lơi tòm bol mê kơlôi bơh añ mơ yal añ in git kòn klau añ jê neh chồl bơtrut cau duh broă añ kơp òm nàng brồ lơh añ kung be khai lơh tòm ngai do.”

⁹Mơya Dôek cau Edôm ơm ntào bal mơ ală cau duh broă Sol dê đơs lah: “Añ neh gŏ kòn klau Jese lòt tus hơ Ahimelek kòn klau Ahitup tòm Nop.

¹⁰Ahimelek hòi lùp Yàng Jehôwa khai in, kung neh ai khai in phan ngui sa bal mơ đào Gôliat dê la cau Philistin.”

¹¹Gen cau bơtau sồr hòi Ahimelek, kòn klau Ahitup bal mơ jơh hìu nhă bèp khai dê la ală cau gơnoar ơn phan duh khoai tòm Nôp, mơ jơh tơl nă bol khai lòt tus hơ bơtau.

¹²Sol đơs lah: “Ơ kòn klau Ahitup, iat tĕ do.” Khai ho lah: “Do añ, ơ cau tòm.”

¹³Sol đơs mơ khai lah: “Ñchi bơh tài mê neh bơyai òm jòi bơta tòmdră mơ añ, mê bal mơ kòn klau Jese dê, mê neh ai khai in piang lă mơ dô nơm đào, mơ neh hòi lùp Yàng Jehôwa khai in nàng khai tòmdră mơ añ mơ kơp brồ lơh añ be khai neh lơh tòm ngai do taih?”

¹⁴Gen Ahimelek ho cau bơtau lah: “Digùl ală cau duh broă bơtau dê, ñcau la cau dòn song kung be Dabit cau bơrtơu, cau kwang at bồ mpồl ling sền gàr bơtau, mơ geh ki ngàm tòm hìu nhă bơtau dê taih?

¹⁵Ngai hơ̆ la dơ̆ sơnròp añ hòi lùp Yàng Tom Trồ khai in sơl ơ? Ngan la ò di behơ̆ ò! Dan bơtau bañ tuh glài di añ la cau duh broă bơtau dê hala di hìu nhă bèp añ jê bơh cau duh broă bơtau dê ò git dô êt lơi bơh jơh ală bơta do.”

¹⁶Mơya cau bơtau đơs lah: “Ơ Ahimelek, ngan mê rơp chơt, mê bal mơ jơh ală cau tòm hìu nhă bèp mê dê.”

¹⁷Gen bơtau ai jơnau sồr ală cau ling sền gàr ơm di gah khai mơ đơs lah: “Wèt tĕ mơ tơnchơt ală cau gơnoar ơn phan duh khoai Yàng Jehôwa dê tài bơh bol khai kung ơm bal mơ Dabit. Bol khai git Dabit dô, mơ ò yal añ in git.” Mơya ală cau duh broă bơtau dê ò bài pò tê tơnchơt ală cau gơnoar ơn phan duh khoai Yàng Jehôwa dê.

¹⁸Gen cau bơtau ai jơnau sồr Dôek mơ đơs lah: “Mê wèt mơ tơnchơt tĕ ală cau gơnoar ơn phan duh khoai hơ̆.” Behơ̆ Dôek cau Edôm wèt mơ tơnchơt ală cau gơnoar ơn phan duh khoai. Tòm ngai hơ̆ khai tơnchơt phàm jơt pram nă cau soh ephot lơh mơ bài che dơmài.

¹⁹Sol kung ai đào tơnroh Nop la ƀòn dờng ală cau gơnoar ơn phan duh khoai dê, tơnchơt ală cau klau mơ ală cau ùr, ală cau kơnòm dềt mơ ală oh nga, ală phan poan jơng, ală alàng mơ belàt tòm ƀòn hơ̆.

²⁰Mơya Abiatha, dô nă kòn klau Ahimelek kòn klau Ahitup dê dô klàs mơ lòt tus jat Dabit.

²¹Khai yal wơl Dabit in git lah Sol neh tơnchơt ală cau gơnoar ơn phan duh khoai Yàng Jehôwa dê.

²²Gen Dabit đơs mơ Abiatha lah: “Tòm ngai hơ̆, tòm tŭ Dôek cau Edôm gơs mat tềng hơ̆ gen añ git ngan la khai rơp yal Sol in. Hơ̆ la tài bơh añ tàng jơh ală cau tòm hìu bèp mê dê neh kong chơt.

²³Ơm tĕ mơ añ, bañ rngòt, cau jòi tơnchơt mê kung jòi tơnchơt añ sơl. Ơm mơ añ gen mê rơp geh lơngap lơngai.”