Read koho I Samuel 23 Bible Online

I Samuel 23 - koho bible

I Samuel 23

¹Tŭ hơ̆ Dabit kơno cau yal lah: “Cau Philistin tòmlơh tòmdră mơ Keila mơ phà kơñau ală làn jă kòi.”

²Dabit hòi lùp Yàng Jehôwa lah: “Añ pal lòt brồ lơh ală cau Philistin do sơl?” Yàng Jehôwa ho lah: “Lòt tĕ brồ lơh cau Philistin mơ dong tă Keila.”

³Mơya ală cau klau jat Dabit đơs mơ khai lah: “Sền do, bol he ơm tòm Juda kung rngòt rau; dilah bol he lòt tus hơ Keila nàng tòmdră mơ ală mpồl ling cau Philistin dê gen sơlo rngòt rlau tai!”

⁴Gen Dabit hòi lùp Yàng Jehôwa tai mơ Yàng Jehôwa ho khai lah: “Mù tĕ hơ Keila, bơh añ rơp jào cau Philistin tòm tê mê dê.”

⁵Behơ̆ Dabit mơ ală cau klau jat khai mù hơ Keila tòmlơh mơ cau Philistin, mơ kup ală phan poan jơng bol khai dê, mơ lơh cau Philistin in kong alah kơnjơ̆ ngan mơ dong tă làng bol ơm tòm Keila.

⁶Tòm tŭ Abiatha kòn klau Ahimelek dô pleh tus hơ Dabit tòm Keila, khai neh cèng bal dô nơm ephot tòm tê khai dê.

⁷Gơs cau yal Sol in git lah Dabit neh lòt tus hơ Keila gen Sol đơs lah: “Yàng Tom Trồ neh jào khai tòm tê añ, bơh Dabit neh krơ̆ să tòm khai tòm tŭ mut tòm dô nơm ƀòn dờng gơs mpồng mơ kơrnal kal wơl.”

⁸Mơ Sol hòi pơjum jơh ală mpồl ling tòmlơh khai dê mù tus hơ Keila mơ gơrwàng Dabit mơ jơh ală cau khai dê.

⁹Tòm tŭ Dabit git Sol neh bơtào kai gơrmơ̆i iơh nàng tòmdră mơ khai, gen khai đơs mơ cau gơnoar ơn phan duh khoai Abiatha lah: “Cèng tĕ ephot hơ do!”

¹⁰Dabit đơs lah: “Ơ Jehôwa Yàng Tom Trồ Israel dê, cau duh broă Kơnràñ neh kơno lah Sol lơh nền lòt hơ Keila nàng tơnroh ƀòn dờng tài bơh añ.

¹¹Làng bol Keila rơp jào añ tòm tê Sol sơl ơ? Sol rơp mù hơ do jat be cau duh broă Kơnràñ dê neh kơno sơl? Ơ Jehôwa Yàng Tom Trồ Israel dê, añ rac dan mơ Kơnràñ, dan yal cau duh broă Kơnràñ in.” Mơ Yàng Jehôwa đơs lah: “Khai rơp mù.”

¹²Gen Dabit lùp tai lah: “Ală cau klau Keila rơp jào añ mơ ală cau añ jê tòm tê Sol sơl ơ?” Yàng Jehôwa ho lah: “Bol khai rơp jào bol mê.”

¹³Behơ̆ Dabit bal mơ ală cau jat khai pơgap prau rhiang nă, lik bơh Keila mơ bol khai kư̆ lòt tus hơ tiah lơi bol khai rgơi lòt. Tòm tŭ Sol kơno yal lah Dabit neh dô pleh bơh di Keila, gen khai gơplơ̆ nùs ò ting jat tus tềng hơ̆.

¹⁴Dabit ơm tòm ală tiah kơ̆ cê ƀlàng ngềt ngơt dê, tòm tiah kơh mơnơm ƀlàng ngềt ngơt Jip dê. Sol ting jat khai kòp ngai, mơya Yàng Jehôwa ò jào khai tòm tê Sol dê.

¹⁵Dabit ơm tòm ƀlàng ngềt ngơt Jip dê tòm Hôres, tòm tŭ khai git lah Sol neh lik lòt nàng jòi tơnchơt khai.

¹⁶Jônathan kòn klau Sol dê lòt tus hơ Dabit tòm Hôres nàng chồl nùs khai geh pràn kơldang tòm Yàng Jehôwa.

¹⁷Khai đơs mơ Dabit lah: “Bañ rngòt, bơh tê bèp añ la Sol rơp ò bàn bi. Bi rơp lơh gơs bơtau at bồ Israel, mơ añ rơp gơs kwang at bồ dơ̆ bàr tơnơ̆ mơ bi. Bèp añ jê Sol kung git bơta do behơ̆ sơl.”

¹⁸Bàr nă bol khai bơtào gơs bơta ho bal di đap Yàng Jehôwa. Dabit ơm wơl tòm Hôres mơ Jônathan rê hìu.

¹⁹Cau Jip guh tus hơ Sol tòm Gibea mơ đơs lah: “Dabit ơm pồn să digùl bol hi tòm ală tiah kơ̆ cê tòm Hôres, hơđang dòr Hakila đah đơm Jesimôn ò ơ?

²⁰Tŭ do, ơ bơtau, tŭ lơi bơtau kòñ mù gen mù tĕ; mơ pơnah bol hi gen rơp jào khai tòm tê bơtau.”

²¹Sol đơs lah: “Dan Yàng Jehôwa ai lơngai bol mê in, bơh bol mê neh yal tơlik bơta nđàc sơngit di añ!

²²Lòt tĕ lơh nền cê dô dơ̆ tai, jòi tĕ nền nàng git ntềng đah khai ơm mơ ñcau neh gŏ khai tềng hơ̆, cau yal añ in lah khai lac lèo ngan.

²³Jòi sền tĕ gùt dar jơh ală tiah pồn să mơ khai ơm pồn, mơ rê wơl yal nền cê añ in. Gen añ rơp lòt bal mơ bol mê; mơ dilah khai ơm tòm lơgar, gen añ rơp jòi bàn khai digùl jơh ală oă rbô nă Juda dê.”

²⁴Behơ̆ bol khai ñă lòt tus hơ Jip lài mơ Sol. Tŭ hơ̆ Dabit mơ ală cau khai dê ơm tòm ƀlàng ngềt ngơt Maôn, tòm Araba đah đơm Jesimôn.

²⁵Sol mơ ală cau khai dê lòt jòi Dabit. Cau yal Dabit in git bơta hơ̆, gen khai mù tus hơ pơnai lŭ dờng mơ ơm tòm ƀlàng ngềt ngơt Maôn. Tòm tŭ Sol kơno bơta hơ̆ gen khai ting jat Dabit tòm ƀlàng ngềt ngơt Maôn.

²⁶Sol lòt rò đah do mơnơm, ai Dabit mơ ală cau khai dê lòt đah ne mơnơm, Dabit sơrbac sơrbang dô bơh dê Sol. Tòm tŭ Sol mơ ală mpồl ling khai dê tus rềp di Dabit nàng kup khai.

²⁷Gen gơs dô nă cau kong sồr lòt tus hơ Sol mơ đơs lah: “Dan tus mhar, cau Philistin neh tus phà tòmpìt lơgar.”

²⁸Behơ̆ Sol sang lòi bơta ting jat Dabit, mơ lòt tòmdră mơ cau Philistin. Gen tàng tiah hơ̆ gen cau sơnđan tiah hơ̆ la Sela Hammalekô.

²⁹Gen Dabit guh bơh tềng hơ̆, mơ ơm tòm theng kơ̆ cê Engedi.