Read koho I Samuel 25 Bible Online

I Samuel 25 - koho bible

I Samuel 25

¹Tŭ hơ̆ Samuel sang rài, jơh Israel pơjum ñìm ƀồc mơ tơp khai tòm ƀòn khai dê tòm Ramah. Gen Dabit ñă mù hơ ƀlàng ngềt ngơt Maan.

²Gơs dô nă cau tòm Maan mơ gơs sre brê tòm Karmel, la cau pas gơs ngan. Khai gơs dô rbô be mơ pe rbô belàt, mơ khai ơm siat sơnò belàt tòm Karmel.

³Sơnđan khai la Nabal, mơ sơnđan bau ùr khai dê la Abigail. Cau ùr hơ̆ la jak chài mơ hàng mơnĕ, mơya bau klau khai dê la kră kơldang mơ sềt pơniă, khai gơrê bal mơ jơi bơtiàn Kalep dê.

⁴Tòm tŭ Dabit ơm tòm ƀlàng ngềt ngơt, khai kơno la Nabal ơm siat sơnò belàt khai dê.

⁵Behơ̆ khai sồr jơt nă cau pơnu mơ đơs mơ bol khai lah: “Guh tĕ hơ Nabal tòm Karmel, mơ ai sơnđan añ lùp còp niam să khai.

⁶Đơs tĕ mơ khai be do: ‘Dan lơngap lơngai ồng in, lơngap lơngai hìu nhă ồng in, mơ lơngap lơngai hơđang jơh ală phan ồng neh gơs!

⁷Añ kơno tŭ do ồng siat sơnò belàt, ală cau ê belàt ồng dê neh ơm mơ bol hi, bol hi neh ò lơh iơh di bol khai, mơ bol khai ò roh phan lơi tòm jơh ală tŭ bol khai ơm tòm Karmel.

⁸Lùp tĕ ală cau dong broă ồng dê, gen bol khai rơp yal ồng in. Gen tàng lòi ală cau pơnu añ jê geh bơta nđàc di đap ồng, bơh bol hi neh tus tòm ngai pơjum sa. Dan pà ală cau dong broă ồng in mơ kòn klau ồng in la Dabit phan lơi ồng gơs tòm tê.’”

⁹Tòm tŭ ală cau Dabit sồr lòt neh tus, bol khai ai sơnđan Dabit mơ đơs mơ Nabal ală jơnau hơ̆, mơ bol khai ơm gơn.

¹⁰Nabal ho mơ ală cau dong broă Dabit lah: “Ñcau la Dabit? Ñcau la kòn klau Jese? Ngai do gơs oă cau dong broă neh dô bơh ală cau tòm bol khai dê.

¹¹Añ pal ai piang lă mơ dà mơ poac mơ añ neh rcang ală cau siat sơnò belàt añ jê nàng ai ală cau ò git tus bơh di tiah lơi taih?”

¹²Behơ̆ ală cau Dabit dê wơlke mơ rê, tŭ neh rê gen bol khai yal wơl jơh ală jơnau hơ̆.

¹³Dabit đơs mơ ală cau khai dê lah: “Kơt tĕ đào bol mê dê!” Behơ̆ bol khai kơt đào bol khai dê, mơ Dabit kơt đào khai dê sơl. Gơs pơgap poan rhiang nă cau lòt bal mơ Dabit, mơ bàr rhiang ơm wơl bal mơ ală phan mơna.

¹⁴Mơya gơs dô nă cau duh broă neh yal wơl Abigail, la bau ùr Nabal in lah: “Dabit neh sồr ală cau khai dê tus bơh ƀlàng ngềt ngơt nàng lùp còp cau tòm he dê, mơya cau tòm he dê ai jơnau bơrsèl tơnhial ho wơl bol khai.

¹⁵Mơya ală cau hơ̆ gơwèt niam ngan mơ bol hi, bol khai ò lơh iơh di bol hi, mơ tòm jơh ală tŭ tơngai bol hi ơm tòm ală ƀlàng rềp bal mơ bol khai, bol hi ò gŏ roh dô nơm phan lơi.

¹⁶Ngai mơ mang bol khai gơlơh kung be dô nơm dơrñang bol hi in jơh ală tŭ bol hi ơm mơ bol khai tòm tŭ ê gàr belàt.

¹⁷Behơ̆ tŭ do git tĕ bơta hơ̆ mơ sền sơwì ñchi mò pal lơh, bơh bơta iơh neh geh lơh nền tòmdră mơ cau tòm he dê mơ jơh hìu nhă khai dê. Khai ngan la dô nă cau gơs nùs nhơm iơh, ò gơs dô nă cau lơi rgơi đơs mơ khai.”

¹⁸Gen Abigail sơrbac sơrbang mơ ai bàr rhiang nơm piang lă, bàr nhồng gơltau tơrnòm, pram nơm belàt neh lơh poac, pram thùng gar ceh, dô rhiang nơm ƀañ plai ño mơ bàr rhiang nơm ƀañ plai ƀal ro. Khai dap jơh hơđang ngkòi alàng

¹⁹mơ đơs mơ ală cau dong broă khai dê lah: “Lik lòt tĕ lài mơ añ, añ rơp lòt jat bol mê.” Mơya khai ò yal Nabal bau khai in git.

²⁰Tòm tŭ Abigail hào alàng khai dê mơ mù dô nơm thòng, Dabit mơ ală cau khai dê mù hơ đah Abigail, mơ Abigail tòmtìp mơ bol hơ̆.

²¹Mơ Dabit neh đơs lah: “Ngan bơta hơ̆ la ò kwơ añ in, bơh añ neh sền gàr ală phan mơna cau klau do tòm ƀlàng ngềt ngơt, tian gơs ò roh dô nơm phan lơi gơrê mơ khai. Khai neh ai bơta iơh tơm wơl bơta niam añ jê.

²²Dan Yàng Tom Trồ lơh gơwèt mơ Dabit oă rlau tai, dilah tus diàng drim hìng añ lòi gam kis dô nă cau klau lơi gơrê bal mơ khai.”

²³Tòm tŭ Abigail gŏ Dabit gen khai sơrbac sơrbang mù bơh alàng mơ tơmbic să blup mat tòm ù di đap Dabit.

²⁴Khai cùn di jơng Dabit mơ đơs lah: “Ơ kơnràñ añ jê, lòi glài hơ̆ gơtuh hơđang mìng dô nă añ. Dan lòi cau duh broă kơnràñ dê đơs mơ kơnràñ; dan iat tĕ ală jơnau đơs cau duh broă ồng dê.

²⁵Dan cau tòm añ jê bañ kòp cau iơh bơsak hơ̆ la Nabal. Khai ngan la tòm toh be sơnđan khai dê; sơnđan khai la tùl gơla, mơ bơta tùl gơla ơm bal mơ khai. Mơya đah mơ añ la cau duh broă kơnràñ dê, añ ò gŏ ală cau mơ cau tòm añ jê neh sồr lòt tus.

²⁶Tŭ do, ơ cau tòm añ jê, kung be Yàng Jehôwa kis sùm mơ kung be să tòm ồng kis sùm, tài bơh Yàng Jehôwa neh tơnruc ồng bơh glài lơh gơhòr mhàm mơ sal tê bơh tê tòm he dê; tŭ do lòi ală cau sò tơm ồng dê bal mơ jơh ală cau kòñ lơh iơh di cau tòm añ jê rơp gơlik gơs kung be Nabal.

²⁷Mơ lòi phan ơn do mơ cau duh broă kơnràñ dê neh cèng tus cau tòm añ in, geh ai pà ală cau in lòt jat kơnràñ.

²⁸Dan toh glài cau duh broă kơnràñ in, bơh ngan la Yàng Jehôwa rơp bơtào kơ̆ jơi bơtiàn cau tòm añ jê tài bơh kơnràñ tòmlơh ală bơta tòmlơh Yàng Jehôwa dê; mơ bơta iơh rơp ò jòi bàn tòm jơh rài kis ồng dê.

²⁹Dilah gơs cau lơi ting jat ồng nàng tă bơta kis ồng dê, gen bơta kis cau tòm añ jê rơp geh jơm gòm tòm bơta sền gàr Jehôwa Yàng Tom Trồ ồng dê tòm mpồl ală cau kis; mơya bơta kis ală cau sò tơm ồng dê rơp gơkòl sơrbì ngài kung be pơnai lŭ bơh di sơna sơrbì lŭ.

³⁰Tòm tŭ Yàng Jehôwa neh lơh cau tòm añ in jơh ală bơta niam mơ Kơnràñ neh ho mơ neh pồ bơtào cau tòm añ jê lơh gơs cau at bồ Israel,

³¹gen cau tòm añ jê rơp ò gơkòl jê sồt mơ lah pơrhơng tòm nùs, tài bơh neh lơh gơhòr mhàm ò bồ nàng sal tê he in. Mơ tòm tŭ Yàng Jehôwa neh lơh gơlik gơs ală bơta niam hơ̆ cau tòm añ in, gen dan kah wơl cau duh broă ồng dê.”

³²Dabit đơs mơ Abigail lah: “Jòng ro Yàng Jehôwa la Yàng Tom Trồ Israel dê, bơh Kơnràñ neh sồr ai tus tìp añ tòm ngai do.

³³Dan ai in geh bơta lơngai bơh bơta kơlôi niam ai dê, mơ dan bơta lơngai ai in, la cau neh kơryan añ lơh gơhòr mhàm tòm ngai do, klàs bơh bơta sal tê añ in mơ tê tòm añ jê.

³⁴Bơh di ngan kung be Yàng Jehôwa la Yàng Tom Trồ Israel dê kis, la Bơtau neh kơryan añ lơh iơh di ai, dilah ai neh ò mhar lòt tus tìp mat mơ añ, gen tus àng drim hìng ò gơs dô nă cau klau lơi gam kis bal mơ Nabal.”

³⁵Gen Dabit dòp bơh di tê Abigail ală phan mơ khai neh cèng Dabit in, mơ đơs lah: “Ai rê hìu tĕ lơngap lơngai. Añ neh iat ală jơnau ai đơs mơ dòp jơnau ai dan.”

³⁶Tòm tŭ Abigail rê tus hơ Nabal; Nabal bơñul oă ngan, ơm ñô sa tòm hìu khai dê be bơta ñô sa dờng cau bơtau dê. Nùs Nabal dê hòn chò ngan tòm khai. Behơ̆ Abigail ò đơs jơnau lơi mơ khai jơl tus di ngai hìng.

³⁷Gen tòm àng drim hìng, tòm tŭ Nabal neh rài bơñul, bau ùr khai yal wơl khai in jơh ală bơta hơ̆, gen Nabal chơt kơng tòm nùs mơ khai gơlik gơs kung be lŭ.

³⁸Pơgap tòm jơt ngai tơnơ̆ gen Yàng Jehôwa lơh Nabal, mơ khai chơt.

³⁹Tòm tŭ Dabit kơno Nabal neh chơt, gen khai đơs lah: “Jòng ro Yàng Jehôwa neh cahrña bơh Nabal neh sền òsơp dê añ, Kơnràñ neh kơryan cau duh broă Kơnràñ dê klàs bơh di bơta lơh tìs, mơ neh lơh bơta tìs Nabal dê tuh wơl hơđang bồ tòm khai dê.” Gen Dabit sồr đơs mơ Abigail, dan lùp bau mơ khai.

⁴⁰Tòm tŭ ală cau duh broă Dabit dê lòt tus hơ Karmel, đơs mơ Abigail lah: “Dabit sồr bol hi lòt tus nàng lùp ai lơh gơs bau ùr khai dê.”

⁴¹Abigail cùn khoai blup mat tòm ù mơ đơs lah: “Cau ùr duh broă ồng dê la dô nă cau dĭ nàng rào jơng ală cau duh broă cau tòm añ jê.”

⁴²Chòp Abigail sơrbac sơrbang hào dô nơm alàng, gơs pram nă cau dĭ ùr khai dê lòt bal, jat ală cau kong sồr Dabit dê mơ gơlik gơs bau ùr khai dê.

⁴³Dabit kung neh bau mơ Ahinôam bơh Jejreel; mơ bàr nă bol khai gơlik gơs bau ùr khai dê.

⁴⁴Mơya Sol neh ai kòn ùr khai dê la Mikal, bau ùr Dabit dê, bau mơ Palti, kòn klau Lais la cau Gallim.