Read koho I Samuel 30 Bible Online

I Samuel 30 - koho bible

I Samuel 30

¹Tòm tŭ Dabit mơ ală cau khai dê rê tus hơ Jiklak tòm ngai dơ̆ pe. Cau Amalek neh brồ lơh Negep mơ Jiklak, bol khai neh brồ lơh Jiklak mơ chu gơ,

²mơ kup cèng ală cau ùr mơ jơh ală cau tòm hơ̆, cau dềt bal mơ cau dờng; bol khai ò tơnchơt dô nă cau lơi tòm bol hơ̆, mơya cèng jơh ală bol khai lòt bal tòm gùng bol khai dê.

³Tòm tŭ Dabit mơ ală cau khai dê tus hơ Jiklak, bol khai gŏ ƀòn neh ồs sa; mơ ală bau ùr, ală kòn klau mơ ală kòn ùr bol khai dê neh cau kup cèng.

⁴Gen Dabit mơ ală cau khai dê ñìm nggà dờng jơl tus di tŭ bol khai òsô ñìm tai.

⁵Bàr nă bau ùr Dabit dê kung gơkòl kup cèng, hơ̆ la Ahinôam bơh Jejreel mơ Abigail, ùr bơnrau Nabal dê tòm Karmel.

⁶Dabit ơm tòm bơta sơbơng roh ngan, tài bơh ală làng bol tòmbơyai cơm lŭ di khai, bơh bol khai sràt bơtang ngan tòm nùs tài bơh ală kòn klau mơ ală kòn ùr bol khai dê. Mơya Dabit geh pràn kơldang tòm Jehôwa Yàng Tom Trồ khai dê.

⁷Gen Dabit đơs mơ Abiatha cau gơnoar ơn phan duh khoai, kòn klau Ahimelek lah: “Cèng tĕ ephot añ in.” Behơ̆ Abiatha cèng ephot Dabit in.

⁸Mơ Dabit hòi lùp Yàng Jehôwa lah: “Añ pal ting jat mpồl phà kơñau do sơl? Añ rơp bàn bol khai sơl?” Yàng Jehôwa ho lah: “Ting jat tĕ, ngan mê rơp bàn bol khai mơ rgơi dong tă ală cau kòl kup.”

⁹Behơ̆ Dabit bal mơ prau rhiang nă cau khai dê lik lòt, bol khai tus tòm Thòng Besor; bàr rhiang nă cau ơm wơl tơnơ̆,

¹⁰Dabit neh ting jat bal mơ poan rhiang nă cau klau; mơ bàr rhiang nă ơm tơnơ̆, bơh bol khai òsô lòt gan thòng Besor.

¹¹Bol khai bàn dô nă cau Ejiptơ ơm tòm ƀlàng gen lam khai tus hơ Dabit. Bol khai ai cau hơ̆ in dà hùc mơ phan sa,

¹²hơ̆ la dô pet ƀañ plai ƀal ro mơ bàr nơm ƀañ plai ño. Khai neh sa mơ gơs pràn wơl bơh khai neh ò sa phan lơi hala hùc dà lơi tòm pe ngai mơ pe mang.

¹³Dabit lùp khai lah: “Mê gơrê bal mơ ñcau mơ tus bơh tiah lơi taih?” Khai ho lah: “Añ la cau Ejiptơ ơm dĭ mơ dô nă cau Amalek. Cau tòm añ jê neh sang añ, tòm tŭ añ kòl kòp jê neh pe ngai do.

¹⁴Bol hi neh brồ lơh Negep tòm Keret ù tiah gơrê mơ cau Juda, mơ Negep Kalep dê; mơ bol hi neh chu Jiklak.”

¹⁵Dabit lùp khai lah: “Mê rgơi lam añ tus hơ mpồl brồ lơh hơ̆ sơl?” Khai ho lah: “Srat să tĕ mơ añ di đap Yàng Tom Trồ la ală ồng ò tơnchơt añ hala jào añ tòm tê cau tòm añ, gen añ rơp lam ồng tus hơ mpồl hơ̆.”

¹⁶Khai lam Dabit tus, gen gŏ bol hơ̆ ơm làm tòm dô nơm ƀlàng dờng, sa ñô kơnhơl chò hòp tài bơh neh pìt kup geh oă ngan phan mơna bơh lơgar Philistin mơ bơh Juda.

¹⁷Dabit brồ lơh bol khai bơh tŭ trồ mòr mang jơl tus di mho ngai hìng, ò gơs cau lơi tòm bol khai geh klàs, lòi mìng poan rhiang nă cau pơnu hào làkđa mơ dô.

¹⁸Dabit ai wơl jơh ală phan mơ cau Amalek neh ai, mơ dong tă bàr nă bau ùr khai dê.

¹⁹Ò gơs phan lơi roh, cau dềt hala cau dờng, kòn klau hala kòn ùr, phan pìt kup hala phan lơi bol hơ̆ neh ai; Dabit cèng brê wơl jơh ală phan.

²⁰Dabit kup jơh ală mpồl belàt mơ kơnrồ; ală cau khai dê lam ală phan poan jơng hơ̆ lòt lài mơ ală phan ndai, mơ đơs lah: “Do la phan Dabit neh pìt geh.”

²¹Gen Dabit tus hơ bàr rhiang nă cau neh bòl glar ò jai lòt jat khai mơ khai neh lòi ơm di Thòng Besor. Bol hơ̆ lik lòt rò Dabit mơ làng bol lòt bal mơ khai. Tòm tŭ Dabit mơ ală cau khai dê tus rềp gen Dabit lùp còp bol khai.

²²Mơya jơh ală cau iơh bơsak mơ ală cau sơrdă sơrdơu ơm digùl ală cau neh lòt jat Dabit đơs lah: “Tài bơh bol khai ò lòt bal mơ bol he gen bol he rơp ò pà bol khai in ală phan pìt kup mơ bol he neh geh. Bulah behơ̆, kòp nă bol khai rgơi ai wơl bau mơ kòn khai dê mơ lòt.”

²³Mơya Dabit đơs lah: “Ơ ală oh mi añ jê, ò di behơ̆, ală oh mi ò di lơh behơ̆ bơh ală phan mơ Yàng Jehôwa neh ai bol he in. Kơnràñ neh sền gàr bol he mơ neh jào bol he in ală mpồl cau neh tus tòmlơh mơ bol he.

²⁴Ñcau rơp iat ală jơnau oh mi neh đơs taih? Pơnah tòmpà ală cau ơm sền gàr ală phan ngui sa in pal gơs ndròm bal mơ pơnah tòmpà ală cau lòt tòmlơh. Jơh tơl nă rơp geh tòmpà ring bal.”

²⁵Dabit bơtào gơs bơta boh lam mơ bơta sồr lam hơ̆ tòm Israel bơh ngai hơ̆ jơl tus di ngai do.

²⁶Tòm tŭ Dabit rê tus hơ Jiklak, khai pơyoa dô pơnah phan pìt kup hơ̆ tus hơ ală kwang kra Juda dê la ală cau oh mi bơyô bơh lài khai dê, mơ đơs lah: “Do la dô nơm phan ơn ală ồng in tòm phan pìt kup bơh di ală cau sò tơm Yàng Jehôwa dê.”

²⁷Khai pơyoa tus hơ ală cau tòm Betel, tòm Ramôt đah đơm, tòm Jattir,

²⁸tus hơ ală cau tòm Arôer, tòm Siphôt, tòm Estemoa,

²⁹mơ tòm Rakal, tus hơ ală cau tòm ală ƀòn dờng Jerameel mơ ală cau Kenit,

³⁰tus hơ ală cau tòm Horma, tòm Bôr Asan, tòm Athat,

³¹mơ tòm Hebrôn, mơ tus hơ ală cau tòm jơh ală tiah Dabit mơ ală cau khai dê neh lòt làm.