Read koho I Samuel 8 Bible Online

I Samuel 8 - koho bible

I Samuel 8

¹Tòm tŭ Samuel neh kra, gen khai bơtào ală kòn klau khai dê lơh gơs kwang cahrña Israel in.

²Kòn klau tơnhoa khai dê sơnđan la Jôel, kòn dơ̆ bàr sơnđan la Abija; mơ bol khai cahrña tòm Beerseba.

³Mơya ală kòn klau khai ò jat ală gùng khai dê, mơya wèt hơ cồng nha is, dòp phan sa loă, mơ lơh rkwet rkwe bơta song ring.

⁴Gen jơh ală kwang kra Israel dê pơjum bal mơ lòt tus hơ Samuel tòm Rama.

⁵Bol khai đơs mơ khai lah: “Ồng neh kra rau mơ ală kòn klau ồng ò jat ală gùng ồng dê; tŭ do dan pồ bơtào bol hi in dô nă bơtau nàng tề lam bol hi kung be ală làng bol ndai.”

⁶Mơya jơnau hơ̆ ò niam nùs Samuel tòm tŭ bol khai đơs lah: “Ai tĕ bol hi in dô nă bơtau nàng tề lam bol hi,” Behơ̆ Samuel hòi dan mơ Yàng Jehôwa.

⁷Mơ Yàng Jehôwa đơs mơ khai lah: “Iat tĕ jơh ală jơnau mơ làng bol neh đơs mơ mê; hơ̆ ò di la bol khai sang lòi mê; mơya bol khai neh sang lòi Añ la Bơtau at bồ bol khai dê.

⁸Be bol khai neh lơh di Añ bơh ngai Añ neh cèng bol khai lik bơh Ejiptơ jơl tus di ngai do, sang lòi Añ mơ duh broă ală yàng ndai; gen bol khai kung rơp lơh di mê behơ̆ sơl.

⁹Gen tŭ do iat tĕ bol khai, mơya mê mìng bơto pơhìn bol khai in dô bă kràñ cê mơ yal bol khai in git ală gùng dà cau bơtau at bồ rơp lơh hơđang bol khai.”

¹⁰Behơ̆ Samuel yal wơl jơh ală jơnau Yàng Jehôwa dê làng bol in la ală cau neh dan Kơnràñ ai dô nă cau bơtau.

¹¹Khai đơs lah: “Do la bơta cau bơtau at bồ bol mê dê rơp lơh hơđang bol mê: Khai rơp kup ală kòn klau bol mê dê at ală rơndeh lòs tòmlơh mơ lơh gơs ală cau ling hào ơseh, mơ ntoat lài mơ ală rơndeh lòs tòmlơh khai dê.

¹²Khai pồ bơtào khai in ală cau kwang ling at bồ dô rbô nă cau mơ ală kwang ling at bồ pram jơt nă cau, cau ƀà tai lơòr ù khai dê mơ toès kòi khai dê, cau ƀà tai rơp tiar pềs tà tòmlơh mơ lơh phan ngui tòm ală rơndeh lòs tòmlơh khai dê.

¹³Khai rơp kup ală kòn ùr bol mê dê nàng lơh gơs mơñà ƀô bơlhu, trŭ gơm phan sa mơ cau buh piang lă.

¹⁴Khai rơp ai phan niam rlau jơh bơh di ală ƀlàng sre, ală suơn ño, mơ ală suơn ôlibe bol mê dê nàng ai cau duh broă khai in.

¹⁵Khai rơp tă dô pơnah jơt kòi mbo mơ suơn ño bol mê dê nàng ai ală cau kwang ling mơ ală cau duh broă khai in.

¹⁶Khai rơp kup ală dĭ klau dĭ ùr bol mê dê mơ ală phan poan jơng mơ alàng niam rlau jơh bol mê dê mơ ngui tòm broă khai dê.

¹⁷Khai rơp ai dô pơnah jơt ală mpồl belàt bol mê dê, mơ să tòm bol mê rơp gơs dĭ khai dê.

¹⁸Tòm ngai hơ̆ bol mê rơp rac dan tài bơh cau bơtau at bồ bol mê dê mơ bol mê neh sac rwah, mơya Yàng Jehôwa rơp ò ho wơl bol mê in tòm ngai hơ̆.”

¹⁹Mơya làng bol ò bài iat Samuel; bol khai đơs lah: “Ò! Mơya bol hi lơh nền pal gơs dô bơtau at bồ hơđang bol hi,

²⁰nàng bol hi rơp gơlik be ală làng bol ndai, dô nă bơtau nàng at bồ bol hi mơ lik lòt hơđap bol hi tòm ală bơta tòmlơh.”

²¹Tòm tŭ Samuel neh kơno jơh ală jơnau làng bol neh đơs gen khai đơs wơl ală jơnau hơ̆ di đap Yàng Jehôwa.

²²Yàng Jehôwa ho lah: “Iat tĕ jơnau bol khai dê mơ ai bol khai in dô nă bơtau at bồ.” Gen Samuel đơs mơ ală cau Israel lah: “Kòp nă rê tĕ hơ hìu bol mê dê.”