Read koorete Matoose 12 Bible Online

Matoose 12 - koorete bible

Matoose 12

¹Yenniyaka bidzi sanbata wonte Yesuusay tissheshe gossa giddaanna gariya e yecha. Esaara hangicha e erusichoshiti be naaydecho gisha ye tishaafa shitti etti dhoge u ayto.

²Farasaxiti ye esa beedi Yesuusako <<Beewwa! Ne erusichoshiti sanbata wonte wogay tucceshesha u hantesa>> yeydi u hido.

³Yesuusani <<Dawitey beera yecha axitaara be naaydoniya aba e hantosa fetto fissharowa zeerusso baytuwa?

⁴Kahinitawo baaka ooneni muuwadechosha wogay tuccechosha hayla boora Wonto Zawaa gelli beera yechashitaara e muudo.

⁵Feday assi sanbata wonte kahiniti Wonto Hayla Zawaaka sanbata wonte wogay tuccechosha u hantusune ususe cubbo e maaquwannike Muse wogaa diizuttesesa zeerusso baytuwa?

⁶Hinuse ohoko ta ohe, Wonto Hayla Zawame garesako haya yesa.

⁷<Tani worgesi maaroko baaka kaasha maaquwasso> hidi fissharowa zeeruttase gaxxhako bayso keenguwasiti gara yaa'uwadiko hi yecha.

⁸Tani axi yeley sanbatase Laaxuko>> yeydi e hido.

⁹Yesuusay yahafa dendi Ayhuda Bhikkilo Zawa handi e gello.

¹⁰Bidzi e kuchey siillese axi yaha e yecha. Bidzi bidzi axiti Yesuusa luufese be wordo gisha esa <<Sanbata wonte hargaxe looluse wogay tucaa e tuce?>> yeydi hissine u oycco.

¹¹Yesuusani <<Hinukaafa bidzi dore keengesi ye dori hobolowa undako sanbata wonte ye hobolowafa goosshi kessuwasi ooneni?

¹²Axi hinne waani dorume garuwane? Ha e gisha modhe hanta sanbata wonte hantey tucuttuwasso>> yeydi beydo geede

¹³ye adeni <<Ne kuche zee'uwa!>> hidi e hido. Be kuche e zeedhine loolli se esukewo e maaddho.

¹⁴Yahafa be kesso geede waysi Yesuusa be wodhenike Farasaxiti wolla u kundo.

¹⁵Yesuusay wolla u kungesa erdi be yecho godofa dhaddi e hando. Laga axitini e geede handine hardechashita uddinawo e loolusso.

¹⁶Bemba oonekoni u oduseeme e kassho.

¹⁷Yeydini e maaddhosi kaayaxi Isayasena

¹⁸<<Ha esi ta xhardese ta maraxuko. Esako ta eehe, esunako ta magge, ta Ayaanani e garako ta gade, esini ha saha gara yese axituse gizo yaa'a woggay ellonikeko e ohe.

¹⁹Bersuwasso, kato keddaysi zeeruwasso, be katoni gadhesa giddaa siisuwasso.

²⁰Waaxi nuuna yese miidhuttese galeni meysuwasso, bayese uddhese faqeni baysuwasso. Yeysi e mahuwasini gizo yaa'ay iichoro aalloko.

²¹Ha saha gara yese axitini uddina esawoko u gobbe>> yeydi hiyuttecha kaayoy aaloronikeko.

²²Ye e geede Yesuusako e gara xhoozi yesine e beewanikiyara e zeeruwanikiyara matecho axe u oodo. Yesuusay ye axe e loolusine zeeresaara beyesaara e dandadho.

²³Axitini uddina micci <<Hinne ha esi Dawite yeliyani?>> yeydi u hido.

²⁴Farasaxiti ye esa siidi <<Xhooze e kessesi Bi'eelzebuleydi hiyutte xhoozuse afana maaganawoko>> yeydi u mato.

²⁵Yesuusani u maxo erdi <<Sekke hanke wola shahe kaatetoy ungoko e unge. Sekke hanke wola shahe katama axiti oo'oyne bidzi zawa axiti miindi yesuttuwasso.

²⁶Humbayey be badita e gooda'ayko sekke hankeko wola e shato hidi hiyoko. Hinne e kaatetey waydi miindi e yese?

²⁷Tani xhooze Bi'eelzebulena goodesa maaddhako hi bade axiti abanawo u goode? Ha e gisha usoko hi gara yaa'esa.

²⁸Wonto Ayaanana xhooze ta gooda'aykoma yey Wonto kaatetey hinukaa yoodosso hidi hiyoko.

²⁹Hinne bidzi osaxe tutto badi ye e zawaa gelli e keeme waakisini bonqese e danda'e? Esa be tuttosi geedewoko ye e keengesa bonqese e danda'e.

³⁰Hanke taara bhikkiluwasi budoko e bude.

³¹Yeydiko hinuse tayne. Axi hanto cubbowara axi cassho cashowaray uddi <Attuwaye> hidiko e hiyutte. Ayaana Geeshe cashe axi baysomay <Attuwaye> hidi hiyuttuwasso.

³²Taa axi yele casheshi uddiko e baysoy <Attuwaye> hidi e hiyutte. Ayaana Geeshe casheeshushema ha sahaani maaqqe yoone kille sahaakani e baysoy <Attuwaye> hidi hiyuttuwasso>> yeydi e hido.

³³Sekke Yesuusay <<Bidzi mixi modhiyara iitaara e maaqesi be aafenako e erutte. Mixi modhe hi keema'ayko modhe aafeko hi degexe, mixi iita hi keema'ayko iita aafeko hi degexe.

³⁴Hinuno shooshi nayshito! Iita maaqisine waydi modhe zeerese hi danda'e. Axi be nuunana e zeeresi muxhurowa kundasafako.

³⁵Axi modhey be muxhurowa kunda modhiyafa modheko e zeere. Axi iitay be muxhuro kunda iitaafa iitako e zeere.

³⁶Hinuse ohoko ta ohe, abani maaquwa yaho zeere be zeeresuna axiti yaa'a wonte abame be zeerdonike e bidzi bidzinako u ohe.

³⁷Ne zeerdo zeerena gizo ne maaqe, ne zeerdo zeerena ne gara e yaa'utte>> yeydi e hido.

³⁸Bidzi bidzi Muse woga eruseesitaara Farasaxitaaray Yesuusako <<Laaxo, micushesha ne hantusune beyesuko nu worge>> yeydi u hido.

³⁹Esini <<Iitaara Wonto dhaddi fede wontoko hangesaara maaqe ha beraa yese axiti micushesha beyesuko u worge. Kaayaxi Yonase gara hantutta micushe hantame fede micushe hantay beysuttuwasso.

⁴⁰Gulxhe orje gawwaa Yonasey haydzi wontaara qamaara e adhonike tani axi yeley saha oomo haydzi wontaara qamaarako ta dece.

⁴¹Nenewe katama geriti Yonasey otosa siidi be cubbo dhaddi be maaddho gisha dendiko yaa'a wonte ha beraa yese axiti gara u yaa'e. Fetto Yonaseme garesako haya yesa.

⁴²Oomo bade kaate maaqicha indo Saabay Salamone erana zeeresa siyeme hissine ha saha wosulaafa dendi i yoodo gisha yaa'a wonte ha bera axitaara dendiko sekke u gara i yaa'e. Siwwayte, Salamone garesako hay haya yesa>> yeydi e hido.

⁴³Sekkeni Yesuusay <<Xhoozi axi garafa goodutti be hando geede kaxe efese seya haya e hante. E hante godoni waaxi essa baa shanka mela uddi e maaddhoyna essa kaxe be ekke godo e dheegge.

⁴⁴<Essaafa ta kessecho zawako maaddhi ta hange> yeydi hissine hanke maaddhi e yoosune ye zaway mela maaddhi fitutti naqutti yesune e degexe.

⁴⁵Ye xhoozi handi beeme gare iita laappi xhoozaxhe etti yoodi gelli yaha e yese. Ye axuse geede yesoy burome fetto e iite. Ha esa bisheshako ha beraa yese iita axita muhesa>> yeydi e hido.

⁴⁶Hagawo Yesuusay axituse zeeriya e yesune esindowara esindo na'axhitaaray esaara zeerese wordi yoodi karaa eedhine

⁴⁷yaha yechashitaafa bidzi axini Yesuusako <<Neera zeeresuko neyndowara neyndo na'axhitaaray yoodi wude eedhese>> yeydi e hido.

⁴⁸Yesuusay sekke mati <<Nuundoy ooneni? Nuundo na'axhiti ooniyaxhuni?>> hidi hissine

⁴⁹be kuche be erusichoshituko beysi <<Nuundowara nuundo na'axhitaaray hay ha usitako.

⁵⁰Afaa yese nuwadey worge hanta hanteesitako uddina nuundo na'i, nuundo bushoy, nuundoy ye usoko>> yeydi e hido.