Read koorete Matoose 13 Bible Online

Matoose 13 - koorete bible

Matoose 13

¹Ye wonte Yesuusay zawafa kessi bagade da'aa handi e utto.

²Iitana axi lagay esuko yoodo gisha zabhaa gelli e utto. Axitini bagade da'aa u ee'icha.

³Mamako mamatti laga base e erusso. Erusisine <<Bidzi adey ayla aylese e kesso.

⁴E aylusuneni mor'iyafa bidzi bidzi aafey oge da'aa undine kafiti yoodi maxxhi u muudo.

⁵Fede mor'eni laga saha be oomo keenguwa qaaqa gara e undo. Be oomo laga saha keenguwasa e maaqicho gisha ye mor'ey yenniyawo e mudho.

⁶Mu''eese baaka awway aydo geedeni shulli xhabho be dakke godo dheeddi e mello.

⁷Fede mor'eni haga cultiya yese anke gidda e undo. Ye ankeni dicci be oomo esa e ayto.

⁸Fede mor'eni modhe saha aylutti mudhi laga aafe e kaxxho. Badey xhiixe, badey izzuppi tamme, badey haydzi tammi aafe yeysi u kaxxho.

⁹Yoonase washe keengesi naddhi siwwaye!>> yeydi e hido.

¹⁰E erusichoshitini Yesuusako yoodi <<Mamakona ame axe ne eruse?>> yeydi u oycco.

¹¹Esini <<Afa kaatete gisha axi eruwasa hi eroronike hinuse maaddhiko e yese. Ususema u eroronike maaddho baasso.

¹²Ye esini keengeesituse assi e ingutte, orjena e lagge, keenguwasi garafa ye e keengicho oddheni fettonawoko e efutte.

¹³Mamakona ta zeeresi beesine beewasitukiyara siisine siwwasitukiyara gaxhuwasitukiyara u maaqe gishako.

¹⁴Yeydi e maaddhosi kaayaxi Isayasey <Siyama siitako hi siine, gaxhuwaytako. Beyema beetako hi beene, naddhi beewaytako.

¹⁵Ha axiti be muxhuro minsiko be washeni tucci be aafeni cinadhi u yese. Yeydi maaqe u dheeddako be aafenani beedi be washenani siidi be muxhurowani massi taako u yoodakoko ta loolusaane> yeydi diizechashi e aalloronikeko.

¹⁶Hinunimay hi aafey beene gisha hi washey siine gisha suuzuttesesako.

¹⁷Aadewoko hinuse ta ohe, laga kaayaxitaara gizo axitaaray hatte beya hi yesesa beyese col'iko u yecha, beyutto baasso. Siya hi yesesa siyese col'iko u yecha, siyutto baasso>> yeydi e hido.

¹⁸Assi Yesuusay <<Ayla ayle ade mamako birche siwwayte.

¹⁹Oge da'aa unda mor'ey Wonto kaatete gisha ohutta kato siidi gaxhuwa axuko. Iita Humbayey ukkena yoodiko e muxhurowa ayluttecha Wonto kato e ekke.

²⁰Qaaqa ayluttasi Wonto kato siidi yenniyawo maggana ekke axuko.

²¹Maaqe baaka woggasewo baaka xhabho keenguwasso. Wonto kato gisha maddhay oo'oyne goodoy maaddhako ukkenawoko dhumutti e unge.

²²Anke dhudha gidda ayluttasi Wonto kato woggasewo siine axuko. Ha saha maxowara wodunte eehaaray e muxhurowa kundi kato u gite, aafe kaxhuwasani e maaqe.

²³Modhe saha ayluttasi Wonto kato siidi gaxxhi ekke axuko. Ye e bisha axitaafa bidzi bidziti xhiixe fediti izzuppi tamme fediti haydzi tammi aafe yeysiko u kaxhe>> yeydi e hido.

²⁴Yesuusay fede mamakona ususe yeydi e oto. <<Afa kaatetey e bisheshi ha esako. Bidzi adey be wootaa modhe mor'e e ayllo.

²⁵Uddi axi geto geede iilaxi yoodi gossaaka wulela aylli e hando.

²⁶Gossay mudhi dicci kaxhe ayto geede gossaaka ye wulelay e bento.

²⁷Ye wootaade maaliti esuko yoodi <Laaxo, modhe mor'e ne wootaa ayllo badiya ne yecha? Hinne ayafani wulelay essaa bento?> yeydi u hido.

²⁸<Iilaxuko ha esa hanta> yeydi e hido. <Hinne, wulela nu shodorosa eehaa ne eehe?> yeydi e maaliti u oycco.

²⁹Esini <Maaquwasso. Wulela hi shodusune esaarako gossani haliya hi shode.

³⁰Dhagguwayte, gossay acuttoro aallo wulelani esaarawo yesuwaye. Ace woggay elleniya aceeshita <<Burona wulela maxhuwayte, tamana meggeseni e udumana udumana tukkuwayte. Ta gossa bhikkilli ta li'iya gelsuwayte>> yeydiko tayne> hidi ye wootaade e hido>> yeydi e hido.

³¹Yesuusay fede mamako yeydi ususe e mamatto. <<Afa kaatetey ha esako e bishe. Bidzi axi be woota aandi hade saamo aafekese senafice hidi hiyutte mor'e e ayllo.

³²Isini fede mor'eme uddi eerdeseniyoko. Be dicco geede ha saha gara ayluttesesaafako uddi i gare. Diccini mixe maaddhi i hange garani kafiti keexe keexxhi essa u yese>> yeydi e hido.

³³Feda assi mamakisine <<Afa kaatetey haydzi jhal'a dhiila matti etti dhon'a indo iraaciteko e bishe. Hinne aalliciraaka ye dhiilay be kumena e dendo>> yeydi e hido.

³⁴Haanxhi zeere uddina Yesuusay mamakona axituse e zeerdo. Mamako keenguwasa bidzoni ususe zeerdo baasso.

³⁵Yeydi e maaddhosini kaayaxi <<Ta zeere mamakonako ta adduse, sahay meddhuttosafa ayti ijhaa yecha zeereko ta zeere>> yeydi hiyuttechay aaloronikeko.

³⁶Yesuusay beera yecha axita yaha dhaddi zawa e gello. E erusichoshitini esuko hanke uddhi <<Ha gossaa benta wulela mamako nuuse birshi ohuwa>> yeydi u hido.

³⁷Yesuusani <<Modhe ayla ayllasi axi yeleydi hiyuttesako.

³⁸Wootay ha sahako, modhe mor'ey Wonto kaatete axitako, wulelay iita maaqe Humbaye bade maaqe axitako.

³⁹Wulela ayllasi iilaxi Humbayeko. Acci bhikkile woggay ha saha alsoko, aceeshiti Wonto woosaxituko.

⁴⁰Wulelay shodutti bhikkilutti tamana megguttenike ha sahay aalusuneni yeenkeko e maaqe.

⁴¹Cubbowa aange basitaara iita hanteesitaara uddina e kaatetiyafa bhikkilli u kessoronike axi yele hidi hiyuttasi be woosaxe e anxe.

⁴²Iitana eexhe tamaani u dafutte, yahani u yeeke, be gaggoni u qiice.

⁴³Yenniyani gizo axiti biyade kaatetiya qoossukeko u faqe. Yoonase washe keengesi naddhi siwwaye!>> yeydi e hido.

⁴⁴Sekkeni Yesuusay <<Afa kaatetey woota giddaa aachutti yese danda'uttuwa laga miijheko e bishe. Bidzi axi ye miijhe degessechine yaha dhaddi be maddosuna be keengichosha handi uddinawo zal'i ye gate e woondo>> yeydi e hido.

⁴⁵Yesuusani assiwo <<Afa kaatetey woomani zal'ani hidi aqe axi e woomay keddaydese shushaafa hantuttese seelo abako woomese worgesako e bishe.

⁴⁶Moddhi kuxuttesesa be degesso geede ye axi uddinawo be keengichosha zal'i ye bidzi modhe baseni e woondo>> yeydi e hido.

⁴⁷Sekke Yesuusani <<Afa kaatetey bagadiya dafutti gulxhe e bishake e bishakeysi bhikkilli ayke maarabeko e bishe.

⁴⁸Gulxhe aykeesiti ye esa e kundoyna goosshiko bagade nuunaa u kesse. Modhe modheni xhardi be miijhiya u gade, iita maaqeesita kessi wora u dakke.

⁴⁹Ha saha also wonteni ye esukeko e maaqe. Wonto woosaxitini yoodi gizo axitaafa iita axita u shahe.

⁵⁰Iitana eexhe tamaani u dafutte, yahani u yeeke gaggoni u qiice>> yeydi e hido.

⁵¹Yesuusay <<Ta zeerdosi uddina hinuse geliya e yese?>> yeydi e oycine <<Eewwa>> hidi uydo.

⁵²Esini <<Ooneni Muse woga erusesi afa kaatete oge hame be ayto geede bidzi woduma axi kuxuttese be miijhe bhikkilli be gaddecho godofa burosaara geedesaara shati kessi gadda axuko e bishe>> yeydi e hido.

⁵³Ha mamakita zeerdi be ellusso geede yahafa Yesuusay

⁵⁴be wude Nazrate katamaaka e yoodo. Ayhuda Bhikkilo Zawaani e erusso. Ye esa siidasiti uddi du'eysine <<Ha axi ha eraara ha micushe hantaara ayafani e etto?

⁵⁵Gere, esi mixe massichashi yele maaquwaye? Esindoy Maarame maaquwayya? Esindo na'axhey Yayqoobe, Yoosefe, Simooniyara Yuudaara maaquttuwaye?

⁵⁶Esindo bunaycey uddina nuura maaquwaye u yesesi? Hinne haanke yese era ayafani e degesso?>> yeydi hissine

⁵⁷e zeerdosa siye inxhadhi u dhaddo. Yesuusani <<Kaayaxi fede wudiyako e kuxutte, e wude axitaara e zawa axitaaramay esa kuxuttuwasso>> yeydi e hido.

⁵⁸Esa aadekoydi efe u dheeddo gisha yaha laga micushesha hanto baasso.