Read koorete Matoose 14 Bible Online

Matoose 14 - koorete bible

Matoose 14

¹Galila wude ahesa maaqicha kaati Herodisey yenniyaka Yesuusay hanto odo e siido.

²Be hantaxituse <<Ha axi Xhamaqicha Yohaniseko. Esako haybowafa denda. Ha e gishako ha micushe hanta hantese osa e keenge>> yeydi e hido.

³Ye esume buro Herodiseyndo na'i Filphoose macho maaqicha Herodiyada gisha Yohanisey <<Wogay oossechosha Herodiyada neese macho mati ne ettosi modhe maaquwasso>> hidi e hicha. Hinne Herodisey Yohanise aykussi tufussi tufe zawa e gelsusso.

⁵Yohanise wodhese wordi Ayhudaxiti <<Kaayaxuko>> hidi uycho gisha uso e jhassho.

⁶Herodisey yelutto kuxa wonte Herodiyada bushoy xheyguttecha borsiti buro yoodi ose sekke hanke dholli kaadhi Herodise iitana i maggusso gisha

⁷<<Ne worge abako taa oycuwa! Aadewo ingako ta inge>> hidi hissine Herodisey caadho.

⁸Ye busshini beyndoy otonike <<Xhamaqicha Yohanise qino abako gara gaddi hattewo taase inguwa>> yeydi iido.

⁹Ye i otosuse kaati e higillo. Maaqe baaka be caaqo gishaara tato gara beera uttecha borsiti <<Am taa ohe?>> hissiniyara Yohanise qinoy isuse inguttorosa e oto.

¹⁰Axe ansi tufe zawaa Yohanise qino e bursusso.

¹¹Sanqiya gaddi oodi ye be burso qino busshishe u indo, isini beyndose aandi i indo.

¹²E erusichoshiti yoodi e aha etti mooddi handi ye esani Yesuusako u oto.

¹³Yesuusay Yohanise haybo be siidoniya be goshe yesese axi baa godo zabhaa gelli e hando. Laga axiti e handosa be siido wogga beyecho katamittaafa kessi e geede sahaanna be tokena u hando.

¹⁴Yesuusay zabhaafa kessi laga axita beedi ususe higilli hargichaashita usaafa e loolusso.

¹⁵Sahay qandine e erusichoshiti hanke esuko uddhi <<Ha godoy essaa abakoy baa mela godoko, sahani iitana qandiko e yese. Handi be ukke yese katamittaafa kaxa beese u woomoronike ha axita dakkuwa!>> yeydi u hido.

¹⁶Yesuusani <<Hame uso worgusuwasso. U muunesa hinuni inguwayte>> yeydi e hido.

¹⁷Usini <<Nuni haya oddhe ichichi bache booraara lam'i gulxhiyara baaka abani keenguwanxhiko>> yeydi u mato.

¹⁸Esini <<Ye esita hana taako oowayte>> yeydi e hido.

¹⁹Leddo gara axiti uttoronike e oto. Ichichi booraara lam'i gulxhiyara etti afaa beedi Wonto e galatto. Boora meyssi gussi be erusichoshituko e indo. Usini ye axituse uqusso.

²⁰Be uddina muudi u missho. Atta baxe tamma lam'i kofa kume e erusichoshiti bhikkilli denso.

²¹Ye boora muudasiti indowaxhitaara nayshitaaray taabutto baanne ichichi kuma elle asanxitako u maaqicha.

²²Yesuusay axita dakkisine be erusichoshita <<Zabhaa gelli taame burona semfa fottuwayte>> hidi e aallusso.

²³Axitani be datto geede bidzi bakka gara shi'ese be goshe e kesso. E qandineni yaha be goshewo e yecha.

²⁴Yenniyaka bagade nuunafa zabhay orjena e zardo. Agexi u burona hanke oxhiya e yecho gisha sekke hanke jhirahoy zabha maddhunxiyaka e yecha.

²⁵Yesuusay be erusichoshituko waaxi garana tokena hanti qamaafa odduppi saate geede e yoodo.

²⁶E erusichoshitini waaxi garana tokena e hantusune be beedo wogga orjena leemo kessi <<Gomaxuko!>> hidi hissine be jhasshoshi geede u uydo.

²⁷Yesuusay ukkenawo usuko zeerisine <<Aadeko hidofita, tambako, jhasshofita!>> yeydi e hido.

²⁸Phexhroseni yenniya <<Ta Laaxo, fetto niya e maaqo'ayko tamba <Waaxi garana tokena hanti taako yoowwa> hidi hiwwa>> yeydi e hido.

²⁹Yesuusani <<Taako yoowwa!>> yeydi e hido. Phexhroseni zabhaafa kessi Yesuusako hamese waaxi garana hame e ayto.

³⁰Hanguwaye baaka agexi iitana oxhicho gisha e jhasshinne waaxi esa oodhese hinne <<Laaxo, taa kessuwa!>> hidi hissine e uydo.

³¹Yenniyawo Yesuusay ansi ayti <<Doo, taa ne gobbesi waakidi oddhe e maaddho! Ame taa ne eeze?>> yeydi e hido.

³²Zabhaa handi u gelloniya agexi mikki hido.

³³Be uddinawo ye zabhaa yechashiti <<Aadewo neni Wonto yeleko!>> hidi hissine Yesuusa buro u akkirdo.

³⁴Bagade semfa fotti Yesuusaara e erusichoshitaaray Genserexheydi hisso godo u yoodo.

³⁵Ye wude axiti Yesuusa e maaqesa erdi uddi be googe yecha wudittaa e yoodosa axi siyorosa woosso u anso. Hargaxita uddi esuko oodi

³⁶e maa'o bira u dolorosawo Yesuusa u shidho. Dollaasitini be hargiyafa uddiwo u loollo.