Read koorete Matoose 15 Bible Online

Matoose 15 - koorete bible

Matoose 15

¹Yerusaleemefa Farasaxitaara Muse woga eruseesitaaray Yesuusako yoodi

²<<Ne erusichoshiti olofa yecha gate wogana ame u hantuwaane? Woga gardiko kuche shoto badi[9] kaxa u muune>> yeydi hissine u oycco.

³Yesuusani <<Hinunichi? Hi wogame hissine Wonto woosso gariya baytuwa?

⁴Ye esini Wontoy <Niyadiyara neyndowara kuxuwa!> assi <Biyade oo'oyne beyndo casheshi fetto hay'uwaye> yeydiko e woosese.

⁵Hinunimay <Bidzi axi biyadese oo'oyne beyndose go'esa ingese beychosha <<Wontosuko ta indo>> hidi e hidako

⁶biyade oo'oyne beyndo kuxe worgusuwasso> yeydiko hiine. Ye esukeysi hi gate wogame hissineko Wontoy otechosha hi bayse.

⁷Hinuno awshachito! Hi gisha kaayaxi Isayasey zeerdo kaayoy aadeko.

⁸Zeerisineni <Ha geriti be nuunanawoko taa u kuxe, u muxhuromay taakofa zardiko yese.

⁹Axukofa kessa era Wonto woga mati erusisineko yaho taase u akkire> yeydi e hidecha>> hidi e hido.

¹⁰Yesuusay beeko hanke axita xheydi <<Siwwayte, gaxhuwayte!

¹¹Axe dhohusesi axi nuunafa kesesako baaka hanke asshaanna gelesa maaquwasso>> yeydi e hido.

¹²E erusichoshiti esuko hanke uddhi <<Ha ne zeerdosa siidi Farasaxiti ne gara u huullosa eriyaka ne yese?>> hidi hissine u oycco.

¹³Esini <<Afaa yese nuwadey totto baa tofey uddinawoko e shodutte.

¹⁴Beese bal'itaara bal'a durkeesitaara u maaqe gisha uso dhagguwayte! Bal'ay bal'a durko'ayko hobolowako be lam'una u unge>> yeydi e hido.

¹⁵Phexhroseni Yesuusa <<Ha ne zeerdo zeere nuuse birshi ohuwa!>> yeydi e hido.

¹⁶Yesuusani <<Hinuni hatte aallo gaxhuwasituwa?

¹⁷Asshaanna gelesi gawwa handi uddinawo wude e kesenike gaxhuwaytuwa?

¹⁸Maaqe baaka nuunaanna kesesi muxhurowafako e kese. Ye esako axe dhohusesi.

¹⁹Muxhurowafa kesesi iita maxo, axe wodhe, laggete, maaquwa ogena wolla muhe, kayse, zaade ateye, axe cashe uddi ha esako.

²⁰Axe dhohusesi ha esa bissheshe zeere baaka kuche shoto badi miyemay axe dhohusuwasso>> yeydi e hido.

²¹Yahafa dhaddi Yesuusay Xhirosiyara Siidooniyara hisso katamay essa yese wudiyaka e hando.

²²Kene'aanaxhiyo maaqicha indoni yahafa Yesuusako yoodi <<Ta Laaxo, Dawite yele! Ta bushoko xhoozi ayti iitana maddhunxe, odde taa beyashuna?>> yeydi uwwisine i oto.

²³Esini bidzoni mahe baaka mikki e hido. E erusichoshiti hanke esuko uddhi <<Ha indoy nu geede yoodi uwwesa, odde, iso anxuwa>> yeydi u shidho.

²⁴Esini <<Isra'eele geritaafa hade baada doruke hideseesitusewoko tani anxutto>> yeydi e hido.

²⁵Maaqe baaka ye indoy uddhi e toke gara undi <<Ta Laaxo, odde, taa maruwa>> yeydi i hido.

²⁶Yesuusani <<Nayshiti boora etti kanase dafey bishuwassho>> yeydi e hido.

²⁷Isini <<Ta Laaxo! Ye esini aadeko. Maaqe baaka kanitini fetto be laaxiti tatowafa gukkesako maxxhi u muune>> yeydi i hido.

²⁸Yesuusani <<Neni ta gara ne keenge gobboy orjeko, ne worgenike maaquwaye>> yeydi e hine yenniyawo ye i bushoy loollo.

²⁹Yesuusay yahafa dendi Galila bagade da'aanna gardi bakka garani kessi yaha e utto.

³⁰Fettona laga axiti esuko toke doccesheeshita, bal'ita, doomita, muumitaara fede hargaxitaara etti u yoodo. E buro oodi u gaddine e loolusso.

³¹Axiti toke doccechaashitini loolusune, doomitini gizzi hangusune, bal'itini beesune, muumiti zeerusune be beedoniyaka orjena micci Isra'eele Wonto kedda kedda u hisso.

³²Be erusichoshita beeko xheydi Yesuusay <<Ha axiti haydzi wonte aallo taara u deceshe gishaara u muunesi haya baa gishaara higilsako taa u higilse. Hangisine naaydi ogiya gatti u ungeeme abani u muudo baanne <Dhaddi hi zawa hanguwayte> hidi hiye worguwasso>> yeydi e hido.

³³E erusichoshitini <<Hinne haanxhi axuse elle boora ayafani ha saha melaa nu efe?>> yeydi u hido.

³⁴<<Aanxhi boorana hi keenge?>> yeydi e oycco. <<Laappi bache booraara oddhe giddha gulxhitaarawoko nu keenge>> yeydi u hido.

³⁵Yesuusani axituko <<Sahaa uttuwayte>> hidi e hido.

³⁶Ye laappi bache booraara gulxhiyara etti Wonto e galatto. Meyssi gussi be erusichoshituko e indine usini axiti buro u garso.

³⁷Be uddina muudi u misshine atta baxe e erusichoshiti laappi kofa kume bhikkilli u denso.

³⁸Muudasiti indowaxhitaara nayshitaaray taabutto baane oyddi kumako u maaqicha.

³⁹Yesuusay axita be buddo geede zabhaa gelli Magadoone wude e hando.Ee'o