Read koorete Matoose 16 Bible Online

Matoose 16 - koorete bible

Matoose 16

¹Yesuusa naadhi beyese wordi Farasaxitaara Sodoqaxitaaray esuko yoodi <<Wontokofa maaddhese yerago micushe hanta nuu beysuwa>> hidi hissine u oycco.

²Yesuusay ususeni <<Qamese e hisune <Afay zodhiko yese, iray bukuwasso> yeydi hiine,

³assi ketiya sho'e hi dendoyna <Dhumay afaa ayti yesune e zodhese gisha, hanzo iray bukkako e bukke> yeydi hiine. Afama beedi abay maaqesa erese danda'ako hi danda'e, maaqe baaka beray aba maaqesa e yerago erese danda'uwaytako.

⁴Iitaara Wonto dhaddi fede wontoko hangesaara maaqe ha beraa yese axiti micushesha beyesuko u worge. Kaayaxi Yonase gara hantutta micushe hantame fede micushe hantay beysuttuwasso>> hidi hissine be oto geede Yesuusay fede godo dhaddi e hando.

⁵E erusichoshitini bagade semfa fotti be handoniyani gallase maaqe boora botti u handecha.

⁶Yesuusay be erusichoshitani <<Farasaxitusaara Sodoqaxitusaara maaqe iraacite garafa hinumba kakkuwayte! Oseywayte!>> yeydi e hido.

⁷Usini <<Boora nu oodo baa gishako yeydi e hido>> yeydi hissine sekke hanke wolla u zeerdo.

⁸Yesuusani u zeeresa erdi <<Tamba hi gobbesi waakeydiwo oddhe e maaddho. <Boora nu oodo baa gishako yeydi e hido> hidi hissine ame sekke hanke wolla hi zeere?

⁹Ada hinuse geluwaye? Ichichi kuma axuse ichichi boora bachey ellosaara atta baxe aanxhi kofa hi densechoshaara maxiya baytuwa?

¹⁰Yeydiwo oyddi kuma axuse laappi bache booray elline attase aanxhi kofa kume hi densechosha maxiya baytuwa?

¹¹Ta zeerdosi boorase e maaquwannike waydi ere hi dheeddo? Yebo Farasaxitusaara Sodoqaxitusaara maaqe iraacite garafa hinumba kakkuwayte>> hidi e hido.

¹²E erusichoshiti Farasaxitaara Sodoqaxitaaray erusesaafa biya u kaforonike baaka boora iraacitiyafa e maaquwannike e zeerdosa u erdo.

¹³Yesuusay Filphoose Qesaariya hisso katamay essa yese wude handi yaha be elloniya be erusichoshita <<Axiti taa axi yele oonekoydini uyne?>> hidi e oycco.

¹⁴Usini <<Bidzi bidziti <Xhamaqicha Yohaniseko>, feditini <Elaaseko>, assi feditini <Eremiyaseko> oo'oyne <Kaayaxitukaafa bidziko> hidiko uyne>> yeydi u hido.

¹⁵Yesuusani <<Hinne hinunichi? Oonekoydini taa hiine?>> yeydi e oycco.

¹⁶Yenniyani Simoone sungicha Phexhrosey <<Neni Mesiheko, en'a Wonto yeleko>> yeydi e hido.

¹⁷Yesuusay <<Yoona yele Simoone! Neni suuzuttesesako. Ha esa neese addusay afaa yese nuwade baaka axe maaquwasso.

¹⁸Phexhrose neese yeydiko tayne, neni shuchuko, ha kaacho shuchi garako ta zawa ta keexhe. Hayboy be osana ha ta zawa iichuwassho.

¹⁹Afa kaatete suma esuna ne do'esako neese ta inge. Sahaa ne tuttoy afaa tufuttesesako e maaqe, ha sahaa ne birshoy afaa birchuttesesako e maaqe>> yeydi e hido.

²⁰Yeydi beydosi geede be erusichoshituko bemba <<Ha esi Mesiheko>> hidi hissine oonekoni sekke u zeeruwannike e tucco.

²¹Ye woggaafa ayti Yesuusay be erusichoshituse <<Yerusaleeme hameko taa e worguse. Yahani gate cimitaara, kahinituse afana maagitaara, Muse woga eruseesitaaray laga maddha taa u beyse, taa u wodhuse. Wodhusuttuwaye baaka haybowafa haysso wonteko ta dende>> yeydi e ohicha.

²²Phexhrosey Yesuusa bade gara kessi <<Ta Laaxo! Wontoy ha esa ne gara oodoppe, fettoni niya elloppe!>> yeydi e kassho.

²³Yesuusay sekke maaddhi Phexhroseko <<Neno Humbaye, ta da'aafa haruwa! Neni maxesi axi maxoke baaka Wonto maxoke e maaquwa gisha taase dhumoko ne maaqe>> yeydi e hido.

²⁴Ye e geede Yesuusay be erusichoshituko <<Taara hamese worgesi yesa'ayko bemba dhaddi be suxi mixe iddi taara yoowaye.

²⁵Beese be yeso kafese worgesi uddina baysako e bayse, be yeso taame hissine garsi ingesimay yesoko e degexe.

²⁶Axi ha sahaaka yesesa uddina degexa be lubbo dheeba e hidako am esa e go'e? Axi be lubbo wozese danda'esa am e shange?

²⁷Tani axi yeley nuwade kuxa fuulana hayla ta woosaxitaara yootako ta yoone. Ye woggaako u bidzi bidzise u hantake wooma ta inge.

²⁸Aadewoko hinuse ta ohe, tani axi yeley afaafa ta kaateto kuxana ta yoosune be beyoro aallo haya yeseesitaafa hay'uwasitako yesa>> yeydi e hido.