Read koorete Matoose 17 Bible Online

Matoose 17 - koorete bible

Matoose 17

¹Izzunxo wonte geede Yesuusay Phexhrose, Yayqoobe esindo na'i Yohanise yeysi beera etti bidzi orje bakka gara beesewo u kesso.

²U buro yaha e bishay arto, hade qoossuke e aafushay faddho, e maa'oni bootti aafiya e caddicha.

³Yenniyawo Musiyara Elaasiyaray Yesuusaara zeerusune u beedo.

⁴Phexhroseni Yesuusa <<Ta Laaxo, haya ni yesesi niise waydese modhena! Ne eeha'ayko bidzo neese bidzo Musese bidzo Elaasese hissi haydzi ashita ta keexxheere>> yeydi e hido.

⁵Hagawo Phexhrosey zeereniya lehhidese dhumay yoodi uso e fassho. Ye dhumaannani <<Esuna ta magge ta eehe yeley ha esako, esuse siwwayte>> yeydi hine kato u siido.

⁶Ye esani be siidoniya leemo be kesso gisha e erusichoshiti sahaa deemona u undo.

⁷Yenniyani Yesuusay usuko shidhi be kuchena uso ayti <<Aadekoydi hidofita! Denduwayte, jhasshofita>> hidi e hido.

⁸Wokke keddaydi u beesune Yesuusawo baaka ooneni beyutto baasso.

⁹Bakkaafa yekke u hodhusune Yesuusay <<Tani axi yeley haybowafa ta dendoro aallo ha hi beedosa oonekoni zeerdofita>> hidi hissine be erusichoshituse minsi e oto.

¹⁰Usini <<Muse woga eruseesiti <Mesihey yooneesume burona Elaaseko yoowe e worguse> hidi ame uyne?>> yeydi esa u oycco.

¹¹Esini <<Aadeko! Elaasey buronako e yoone, uddi baseni naqako e naqe.

¹²Hinuse ohoko ta ohe, yoowema Elaasey ollowoko e yoodo. Axitini esa e maaqesa erdo badiko be eetonike e gara u hanto. Ye esukewoko taa axi yeleni maddha u beyse>> yeydi e hido.

¹³Yeydi e hine e zeerdosi Xhamaqicha Yohanisese e maaqesi yenniya ususe e gello.

¹⁴Usini yekke laga axituko u yoodo wogga bidzi axi Yesuusako yoodi e toke gara undi

¹⁵<<Ta Laaxo! Odde, ta yele maaruwa! Jhiicey[10] iitana esa aytiko tamaani waassaani laga woggaaka olli e maddhunxe.

¹⁶Ne erusichoshituko ta oonneko loolusey uso iissho>> yeydi e hido.

¹⁷Yesuusani <<Hinuni waydi aadexuwa gizo oge eruwasitani! An aallona hinunaara ta yese? An aallowa hinumba ta danda'e? Mee, yele taako oowayte>> yeydi e hido.

¹⁸Yesuusani xhooze kasshine yenniyawo xhoozi esa dattine ye yeley loollo.

¹⁹Ye e geede e erusichoshiti be goshewo yesine Yesuusako uddhi <<Abasuna nuni xhooze goode danda'e nu dheeddo?>> hidi hissine u oycco.

²⁰Yesuusani <<Goode hi dheeddosini Wonto gara hi keenge aadexo eeretenako. Aadewoko hinuse ta ohe, saamo aafe genni aadexoy hinuka yessako ha bakka <Hayafa dendi se bade garuwa!> yeydi hiidako maaqoko e maaqe. Hinumba iiche abakoy baasso. [

²¹Haanke yese xhoozi Wonto hi shidho baasaara hi xhoondo baasaara goodese danda'uwaytako]>> yeydi e hido.

²²Bidzi wonte e erusichoshiti Yesuusaara wolko Galilaa u bhikkilutto. Yenniyaka esini <<Tani axi yeley axiti kuchiya gardi ta ingutte.

²³U wodhe, haybowafani haysso wonteta dende>> yeydi e hine e erusichoshiti orjena u higillo.

²⁴Yesuusay be erusichoshitaara Qifirnahoome katamaa handoniya Wonto Hayla Zawase gaalo ekkichaashiti Phexhroseko uddhi <<Hi Laaxi Wonto Hayla Zawase gaalo gaala e gaaleni, gaaluwannikeni e hido?>> yeydi u oycco.

²⁵<<Gaalako e gaale>> yeydi e hido. Zawa hanke Phexhrosey gelline burona Yesuusay <<Simoone, am niya e bishe? Ha saha kaataxhey qaraxhaara gaaluwaara oone garafana u ekke? Be axi garafaani fede wude axi garafaara?>> yeydi e oycco.

²⁶Phexhroseni <<Fede wude axi garafako>> yeydi e matine Yesuusay <<Hinne beese e wude axiti gaalo gaaluttuwasso yeydi hiyoma!

²⁷Maaqe baaka uso nu huuluseesume manxhaqo[11] aandi bagadiya datti burona ne ayke gulxhe assha dodhi Wonto Hayla Zawa gaalose elle miijheko ne degexe. Ye esa neesaara taasaara aandi gaaluwa!>> yeydi e hido.