Read koorete Matoose 18 Bible Online

Matoose 18 - koorete bible

Matoose 18

¹Ye woggawo e erusichoshiti Yesuusako yoodi <<Afa kaatetiya uddiyade garesi oonewa?>> hidi u oycco.

²Bidzi yele oddhe u gidda xheydi essi

³<<Aadewoko hinuse ta ohe, hinumba arsi yele oddhe bisha hi maaddho baasa afa kaatetiya fetto geluwaytako.

⁴Afa kaatetiya angusse maaqesi ha yele oddhekeysi bemba ullaysesako.

⁵Ta sunxuna haanke yese yele oddhe mokkesi taani mokkako e mokke.

⁶Taa aadexe ha baraxhitaafa bidzo dhumuse axi deexho woxha be ontaa tutti bagade oomo undi yaha e baadakoko esuse e bishe>> yeydi e hido.

⁷Sekke Yesuusani <<Dhumo oowese danda'e basituna kundi u yese gisha ha saha gara yese axita baduffu! Dhumusesi yoodo badi dhagguwasso. Dhumoy esuna yoone axe esa fetto baduffu!

⁸Ne kuchey oo'oyne ne tokey niya dhumusese hitta'ayko sena ne garafa bursi dakkuwa. Lam'i kuche keengisine Gaanname hiyutte koolo makkina yese tamaa ne dafutteesume bidzi kuche keengisine yesuwa geleko neese bishesha.

⁹Bidzi ne aafey niya dhumusese hitta'ayko ne garafa kessi wora dakkuwa! Lam'i aafe keengisine Gaanname hiyutte bayese danda'uwa tamaa ne dafutteesume bidzi aafe keengisine yesuwa geleko neese bishesha.

¹⁰Ha baraxhitaafa bidzoni hi haassuwannike hinumba kakkuwayte. Hinuse ohoko ta ohe. Ususe afaa yese Wonto woosaxiti uddi woggako nuwade buro u ee'e.

¹¹[Axi yeleydi hiyuttasi yoodosi baadechashe loolusesuko.]>> yeydi e hido.

¹²Assi Yesuusay <<Mee, ohuwayte! Xhiixi dorita keenge bidzi adey usaafa bidzi baadako waani e hine? Ye be yeengichosha odduppi tamma odduppe bakka gara dhaddi baadase worgiya hanguwaye?

¹³Aadewoko hinuse ta ohe, be degessoyna baadobaa odduppi tamma odduppe garsi baadechine benta bidzusuko e magge.

¹⁴Yeydiwo afaa yese hinadey ha baraxhitaafa bidzi bayoronike worguwasso>> yeydi e hido.

¹⁵Sekkeni Yesuusay <<Neyndo na'i niya miidhako esaara neerawoy wolla yesune niya e miidhosa ohuwa. Ne otosa e siita'aykoni sekke neyndo na'e maaddhiko e yese.

¹⁶Neese inxhadhi siye e dheeba'ayko zeerey lam'unaara haydzunaara ato maaddhi e miinge gisha lam'e oo'oyne haydzi axe e gara etti hanguwa.

¹⁷Ye ususeni e inxha'ayko Wonto zawa axituse zeeruwa. Ye Wonto zawa axituse e inxha'ayko Wonto bade maaquwasukiyara higilli hanke maaquwa cubbachukiyara esa mati taakuwa.

¹⁸Aadewoko hinuse ta ohe, sahaa hi tuttosi afaa tufuttesesako e maaqe. Sahaa hi birshoshini afaa birchuttesesako e maaqe.

¹⁹Assi hinuse ohoko ta ohe, hinukaafa lam'i ha sahaaka abani e maaqo'ayketese <Ha esuse Wonto nu shi''eese> hissine wolla hi kundako afaa yese nuwadey ususe mahoko e mahe.

²⁰Esume taynesini ta sunxuna lam'eni haydzeni maaddhi bhikkiluttuso godowa u giddaako ta bente>> yeydi e hido.

²¹Phexhrosey Yesuusako uddhi <<Ta Laaxo! Nuundo na'i taa miidhako aanxhi woggani <Attuwaye> hidi ta hiyaane? Laappi woggaakani?>> hidi e oycco.

²²Yesuusani <<Laappi woggawo maaquwasso, laappi tammi wogga laappi aallo attuwaydi hiwwa.

²³Afa kaatetey bidzi kaati be miijhena be maaliti hantosa beyese e wordosako e bisshe.

²⁴Be miijhe kaati taabe e aytine fettona taabutti ituwa geley e gara yese bidzi e maala esuko u gelso.

²⁵Ye gele shamey esa iisshine Laaxini <E machi, e nayshi, e keengesi uddiwo zal'utti ta geley shamuttuwaye> yeydi e hido.

²⁶Ye e maalay be laaxi toke gara undi <Ta laaxo! Odde, oddhe wogga taase inguwa. Uddina ne gele shamako ta shange!> yeydi iitana e shidho.

²⁷Ye kaatini fettonawo higilli ye e gara yecha geleni <Attuwaye> hidi dhaddi esani e datto.

²⁸Ye maalay yahafa kessi hangichine xhiixi birre esuse be tal'echo beera hanticha ye kaati maala beedi esa gitti ayti <Neese ta tal'echo miijhe taase mahuwa!> yeydi e hido.

²⁹Ye esaara hantichashi e toke gara undi <Odde, oddhe wogga taase inguwa! Shamako ta shange> yeydi esa e shidho.

³⁰Esini inxhadhiwo be gele e shamoro aallo fetto tufe zawa e gelsusso.

³¹Fediti esaara e hantichoshitini ye maala gara e hantosa beedi fettonawo u higillo. Be kaatukoni handi e gara e mato base uddi u oto.

³²Ye kaatini ye be maala xheygussi <Doo, ha iita axo! Taa ne shidho gisha ne gara yecha yeenxhi ta gele uddina <<Attuwaye>> hidi dhaddo baamba?

³³Hinne tani ta gele dhaddonike neera wolla hantichashushe ne gele dhabe niya worgusuwadiya e yecha?> yeydi hidi

³⁴ye kaati e bakka huulli ye be gele e shamoro aallo esa tufe zawaa waayye beysarasituse garsi e indo.

³⁵Yoonase hinuni hinindo na'axhese hi muxhurowafa <Attuwaye> hiye hi dheeddako afaa yese nuwadey hi bidzi bidzina yeenkewoko e mahe>> yeydi e hido.