Read koorete Matoose 19 Bible Online

Matoose 19 - koorete bible

Matoose 19

¹Yesuusani ye esa zeerdi be also geede Galilaafa dendi Yuudaaka Yordanose waaxi semfa yese wude e hando.

²Laga axitini e geede u handine hargaxita yaha e loolusso.

³Farasaxitini yenniya esa naadhi beyese yoodi <<Abani maaqe abakona be macho axi daforonike wogana ohuttiya e yese?>> yeydi u oycco.

⁴Yesuusani <<Meddha Wontoy burona asanxaara maachiyara e meddhonike fetto fissharo zeerusso baytuwa?

⁵Assi Wontoy <Ye e gishako axi biyadiyara beyndowara dhaddi be machiyara wolla e zuqutte, be lam'una bidzi axe u maaqe> hidi hidosa zeerusso baytuwa?

⁶Ha esuna usi bidzi axe u maaqesa baaka lam'e maaquttuwasso. Wontoy zuddhi bidzo matosa axi shatoppe>> yeydi e hido.

⁷Farasaxitini <<Hinne ame Musey <Adey be macho esuna be dakke diizuttese ato indi dakkuwaye> hidi e hido?>> yeydi u oycco.

⁸Esini <<Musey hi maaco hi daforosa e matosi hi muxhuro miimetena maddhunxeesita hi maaqe gishako. Ha sahay meddhuttowafa ayti yeydi maaquwadiko e yecha.

⁹Tanimay hinuse fedaara i laggetto baasa be macho datti feda ekkesi laggetako e laggete [i adey datto indo ekke adeni yeydiwo laggetako e laggete] yeydiko ta hine>> yeydi e hido.

¹⁰E erusichoshitini <<Hinne adesaara machishaara u feeqa yese zeerey yeydi e maaddhako efe dhabeko bishesha>> yeydi u hido.

¹¹Yesuusani <<Wontoy uso matoosita baaka haanke yesesi uddi axuse geluwasso.

¹²Ye esini bidzi bidzi abakona ekkuwasako yesa. Maachiyara aqese danda'uwasa maaddhi yeluttesako yesa, axi bursine efese danda'uwasako yesa, feditini assi afa kaateteme hissine ekkuwasako yesa. Haanke yesesa efese danda'esi siidi ekkuwaye>> yeydi e hido.

¹³Yesuusay nayshi giddhiti gara be kuche gaddi e suuzoronike axi esuko oowiya u yecha. Oocha axita e erusichoshiti u gayllo.

¹⁴Yesuusani <<Afa kaatetey ha nayshi giddhituke yeseesituse e maaqe gisha dhagguwayte, nayshiti taako yoowuttoose, oossofita!>> yeydi e hido.

¹⁵Be kuche u gara gaddi suuzzi yahafa dhaddi e hando.

¹⁶Bidzi wonte bidzi axi Yesuusako yoodi <<Laaxo! Koolo makkina yeso degexese aba modhe hantani hante taa e worguse?>> hidi e oycco.

¹⁷Yesuusani <<Modhe zeere gisha ame taa ne oyce? Modhe maaqesi Wonto goshewoko. Yesuwa gele worgo'ayko Wonto woossita kakkuwa>> yeydi e hido.

¹⁸Ye axi <<An woossituna ne ohe?>> yeydi e oycco. Sekke Yesuusani esuse << <Axe woddhofuna, laggettofuna, zaade ateydofuna,

¹⁹niyadiyara neyndowara kuxuwa, niya ne eehenikeysi fede axe uddi eehuwa> hidi hine woossoko>> yeydi e mato.

²⁰Ye axini <<Ha woossitani uddinawoko ta kattese, ha esume feda am ta hanto?>> yeydi e oycco.

²¹Yesuusani <<Fetto orjena modhe maaqese ne eeha'ayko ne keengesa handi zal'i jhi'ituse miijhe inguwa! Wodunteko afaa ne degexe. Ye e geede yoodi taara yesuwa>> yeydi e hido.

²²Ye axini ye esa be siidoniya laga wodunte be keengicho gisha higilsine dhaddi e hando.

²³Ye e geede Yesuusay be erusichoshituse <<Aadewoko hinuse ta ohe, wodumase afa kaatetiya geley fettona maddhunxesako.

²⁴Assi hinuse ohoko ta ohe, wodumay Wonto kaatetiya geleesume gaaloy narfe wulaanna gardakoko e shawuke>> yeydi e hido.

²⁵E erusichoshiti ye esa be siidoniya orjena dhonxhidi micci <<Hinne ooni loolese danda'esa?>> yeydi u hido.

²⁶Yesuusay usuko caddi beedi <<Axuse ha zeerey danda'uttuwasso, maaqe baaka Wontosuwoko uddi e danda'utte>> yeydi e hido.

²⁷Phexhroseni yenniya <<Hay, uddi base dhaddiko neera nu yoodese, hinne am nuni ekke?>> yeydi e oycco.

²⁸Yesuusani <<Aadewoko hinuse ta ohe. Uddi abakoy kille e maaqeniyaka tani axi yeley kaateto etti orje kuxa fuulana yoodi ta utteniya hinuni taara hangeesiti yenniyaka tamma lam'i kaatuko hi maaqe. Isra'eele maaqe tamma lam'i omma gara kaate maaddhiko hi yaa'e.

²⁹Taame hissine be zawitani oo'oyne beyndo na'axhe, oo'oyne beyndo bunaycitani, biyadeni maaqqe beyndoni yeydiwo be nayshitani, be wootani, e maaqo'ayko dhadda axi ooneni xhiixi dakkeko e ekke. Koolo makkina yesoni esusuko e ingutte.

³⁰Maaquwaye baaka burose maaqicha lagitini geedese u maaqe, geedeesitini burose u maaqe>> yeydi e hido.