Read koorete Matoose 20 Bible Online

Matoose 20 - koorete bible

Matoose 20

¹Sekkeni Yesuusay <<Afa kaatetey ha esukeko e maaqe. Bidzi adey weyney essa tofuttese saha e keengicha. Bidzi wonte ketiya sho'e kessi miijhena hanteesita worgiya e hando.

²Uso degessini bidzi wonte hanta wooma elle miijhe[12] ingese usaara kundi be gatiya e anso.

³Haydzi saate e maaqe woggani yeyna handi hanta keenguwadecha fede geriti hanta dheeddi yaha oge dagaa u ee'usune beedi

⁴usoni <Hinunini weyne ta tottese gatiya handi hantuwayte. Hi hantosuse maaqe miijheko ta inge> yeydi e hido.

⁵Usini hanta gara u hando. Ye weyniyadeni izzuppunaara odduppi saatenaara kessi yeysi e mato.

⁶Tamma bidzi saatenani kessi fede axiti ee'usune degessi <Hinuni wonta kume hanta baa haya hi feysshoshi abasuna?> hidi e oycco.

⁷Usitini <Nu hantusesa dheeddiko> yeydi uyne <Yebo, handi hinunini weyne ta tottese gatiya hantuwayte> yeydi e hido.

⁸Sahay qandine ye weyne tottecha sahaadey u gara be maagesechoshukoni <Hantaxitani uddina xheydi geede gellasitaafa ayti buro yecha hantaxiti aallo u hanta wooma inguwa!> yeydi e hido.

⁹Tamma bidzi saatena hante aytechashiti be bidzi bidzinani yoodi ye bidzi wonta be hanto wooma u etto.

¹⁰Burona hantaa gellechashiti wooma efese yoosine usume garesa be ekkenike u maxicha. Maaqe baaka usini ye bidzi wonte be hanto woomawo be uddina u etto.

¹¹Miijhe be etto geede hantusicha ade gara umbu umbu hidi uydo.

¹²<Ha usi geede aaluwa yoodi bidzi saatewo u hantechoyne wonta kume awwa dheekuna hantaa gatti feyshecha nuura woli genno ame ne mato?> hissine e gara u koysso.

¹³Ye weyniyadeni usaafa bidziko <Nuundo na'e, fetto niya miidho baasso. <<Bidzi wonta hanta woomako neese ta inge>> hidi neera kundo badiya ta yecha?

¹⁴Doo, niya ellesa etti hanguwa! Geede yoodaasituseni ne ettosi gennowoko <<Ta inge>> hidiko ta hidese.

¹⁵Ta eehenike taase ta miijhena hantese adeto keenguwamba? Hinne yeydi ta jherdo gishaa ne dhiidhe?> yeydi e hido.

¹⁶Ye esukeni burose maaqichashiti geedesuko u maaqe, geedese maaqichashitini burosuko u maaqe>> yeydi e hido.

¹⁷Yesuusani Yerusaleeme hamiya e yecha. Oge wolko hangichine be erusichoshita u goshewo hanke beeko bhikkilli

¹⁸<<Siwwayte! Yerusaleemeko nu hange. Yahani tani axi yeley Wonto Zawa kahinituse afana maagitusaara Muse woga eruseesitusaara gardi ta ingutte. Ta hay'oronikeni ta gara u yaa'e.

¹⁹Ayhuda maaquwasituse garsi u inge, usini ta gara u qozooze, jhiraafenani u dure, suxxhi u wodhe, Haybowafani haysso wonte ta dende>> yeydi e hido.

²⁰Zabdoose machi be lam'i na'axhiyara wolko hanke Yesuusako yoodi e buro bocunti be worge bidzi base e hantorosa i shidho.

²¹<<Am ta hantorosa ne worge?>> yeydi e oycco. <<Ha ta nayshi lam'e ne kaatetiya bidzo ne oshishaa bidzo ne hadursaa u uttorosa mahuwa!>> yeydi i shidho.

²²Yesuusay ususeni <<Hi shi'esani eruwaytako. Ta ushe maddha usshe usheshe danda'aa hi danda'e? [Tani xhamaqutte xhinqate xhamaquttese danda'aa hi danda'e?]>> yeydi e hine <<Eewwa, danda'ako nu danda'e>> yeydi u hido.

²³Esini <<Tani ushe maddha usshema aadewo ushoko hi ushe, ta oshishakaara ta hadursakaara hi uttoronike mahesi taa e maaddho baane nuwadeko. Esako ye be naddhese godo ususe be hidese axuse ingesa>> yeydi e hido.

²⁴Ye u shidhosa be siido wogga atta tammi e erusichoshiti ye lam'i wolindo na'axhiti gara u huullo.

²⁵Yesuusay u uddina beeko xheydi <<Ayhuda maaquwa ha saha gara yeseesituse u afana maagay axita osana u durkenikiyaara anguzaxheni uso be eehenike ahenikiyara erako hi ere.

²⁶Maaqe baaka hi giddani yeydi maaddhoppe. Hinukaafa ooneni afana maaqese worgesi hi maraxe maaquwaye.

²⁷Hinukaafa ooneni angusse maaqese worgesi hi maala maaquwaye.

²⁸Yeydiwo tani axi yeley ta yoodosi axe maresaara ta yeso garsi indi laga axe taanna wozesaarako baaka axi taa marorosa yoodo baasso>> yeydi e hido.

²⁹Yesuusaara e erusichoshitaaray Yarikofa kessi u hangusune laga axiti usaara wolla u hando.

³⁰Lam'i bal'ay oge nuuna uttiya u yecha. Yesuusay yeyna garesa siidi <<Dawite yele nu Laaxo! Odde, nuu beewwa!>> hidi hissine lagussi u uydo.

³¹Axitini <<Mikkuwayte!>> hidi hissine uso u gayllo. Inxhadhiwo <<Dawite yele nu Laaxo! Odde, nuu beewwa!>> hidi hissine lagussi kato keddaysi u uydo.

³²Yesuusani eedhi uso xheydi <<Am hinuse ta hantorosa hi worge?>> yeydi e oycco.

³³Usini <<Nu Laaxo, nu aafey beyorosako nu worge>> yeydi u hido.

³⁴Esini ususe higilli u aafe gara be kuche e gaddo. Yenniyawo u aafey beye aytine Yesuusaarani wolko u hando.