Read koorete Matoose 21 Bible Online

Matoose 21 - koorete bible

Matoose 21

¹Yesuusaara esaara hangichashitaaray Yerusaleeme handi uddhi yesine Zayte Bakkaa yese Beetefaage katamaa u ello. Yenniyani be erusichoshitaafa lam'i axe

²<<Hi buro yese katamaa hanguwayte! Hamenawoko ganuttese bidzi harre e darmiyara yaha hi degexe. Uso birshi oowayte!

³Ooneni hinumba oyco'ayko <Laaxi uso wordineko> yeydi hiwayte. Yenniyawoko ye harrita e anxe>> yeydi e hido.

⁴Ye esini kaayaxuna zeeruttechashi <<Xhiyoone katamase <Ne kaati gawwo aako maaddhi harre gara uttisine darme gara yesine e yoone> hidi hiwwayte>> yeydi hiyuttechashi aaloronikeko e maaddho.

⁶Handi Yesuusay biya woossonike e erusichoshiti u mato.

⁷Harre e darmiyara u oodo. Ye u shashaani be maa'ita u gaddine Yesuusay u gara e utto.

⁸Axi lagaafani angussi ogiya be maa'o ollicha fedeesitini mixi dahe tarshi oge gidda u dakkicha.

⁹Yesuusase e buro buro hidiyara e geede geede hidiyara hangicha laga axiti <<Kuxay maaquwaye[13] Dawite yelese! Laaxi sunxuna yoonesi suuzuttesesako! Kuxay Wontose wona afaaka maaquwaye>> hidi hissine maggana u uwwicha.

¹⁰Yesuusay Yerusaleeme handi elloniya katama axiti be uddina yekke wokke hidi <<Ha esi oonena?>> hidi hissine u koysso.

¹¹Axitini <<Ha esi Yesuusako, Galila wudiya yese Nazrate katamafa yooda kaayaxuko>> yeydi u hido.

¹²Yesuusay Wonto Hayla Zawa qeyshi giddaa gelli yaha e gawwaa zal'ichashitaara woongichashitaara uddi e gooddo. Miijhe e gara gaddi u arxicho xharabheeza assi woyya zal'ichashiti e gara utticho wombariyaraysi e gufunso.

¹³Ususeni << <Ta zaway shi'e zawako hidiko e xheygutte> hidiko e diizuttese. Hinunimay fuuliti googgoko mati essa hi yese>> yeydi e hido.

¹⁴Aafe bal'iti toke doomiti esuko Wonto Hayla Zawaa u yoonne uso e loolusso.

¹⁵Kahinituse afana maagitaara Muse woga eruseesitaaray Yesuusay du'usesa hantine be beedoniyakaara nayshiti Wonto Hayla Zawa giddaa <<Kuxay maaquwaye Dawite yelese!>> yeydi u uwwesa be siidoniyakaara u huullo.

¹⁶<<Ha nayshiti ohesa siyaka ne yese?>> yeydi esuko u hido. Yesuusani <<Siyako ta yese. <Nayshi nuunannaara dhange xhahiti nuunannaara kundese galatako neese e naddho> yeydi diizuttesesa zeerusobaytuwa?>> yeydi e hido.

¹⁷Usoni yaha dhaddi ye katamaafa kessi dhaddi Biitaniya handi yahani e adho.

¹⁸Hanke ketiya sho'e katamaa yoosine e naayutto.

¹⁹Oge da'aa bidzi belese[14] hiyutte mixe beedi esuko handi ye mixi gara washewo baaka abani degexe e dheeddo. Hine <<Hattiyafa ayti koolo makkina aafe kaxhofuna!>> yeydi e hine yenniyawo ye mixi mello.

²⁰Ye esani be beedoniya e erusichoshiti <<Waakidini ha belesey hattewo e mello!>> hidi u micco.

²¹Yesuusani <<Aadewoko hinuse ta ohe, eezzo badi <Wontoy ha esa mahoko e mahe> hidi hi aadessako tani ha belese mixi gara matonikewo mahese danda'ako hi danda'e. Fetto ye esawo e maaddho baane ha bakkani <Dendi bagadiya unguwa> hidi hiidako ungoko e unge.

²²Wonto hi shi'eniya hi shi'esa aba e maaddhakoni <Efako nu ekke> hidi hi aadessako efako hi ekke>> yeydi e hido.

²³Yesuusani sekke Wonto Hayla Zawaa gelli yaha erusiya e yecha. Yenniyani kahinituse afana maagitaara gate cimitaaray esuko yoodi <<Ha zeerita ne hantesi an adetonana? Ha adeto neese inday oonena?>> yeydi u oycco.

²⁴Yesuusani <<Hine tanini bidzi oyche hinumba ta oycceere. Hanke taase hi maho'ayko tanini uddina an adetona ta hantosa hinuse ohoko ta ohe.

²⁵Yohanisey Wontoy ansiniya e xhamaqichani axi ansinena?>> hidi e oycco. Usini sekke hanke wolko << <Wontokofako> hidi nu hikkete <Hinne ame <<Aadeko>> hidi esa efe hi dheeddo?> yeydiko e hine.

²⁶<Axukofako> hidi nu hita'ayko axi uddina <Yohanisey kaayaxuko e maaqicha> yeydi uyne gisha jhashoko nu jhashe>> yeydi wolko u kundo.

²⁷Ha e gisha Yesuusako <<Nuni eruwanxhiko>> hidi hissine u mato. Esini <<Hinne tanini an adetona ha esa ta hantesa hinuse ohuwasso>> hidi e hido.

²⁸Yesuusani <<Hine am hinumba e bishe? Lam'i nayshe keengicha bidzi adey e yecha. Burona bidziko uddhi <Ta yelliye, weyney yese godo hanzo handi hantuwa!> yeydi e hido.

²⁹Ye e yeleni <Tani hanguwasso> hidi e inxhadho. Ye e geedeni ye be maxo arsi hantaaka e hando.

³⁰Assi lakkokoni ye esukewo e otine ye yeleni <Modheko abbayo!> yeydi beydo geede hantaa hando badi e atto.

³¹Ye u lam'ukaafa biyadey woossosa hantasi a'esana?>> yeydi e hine <<Ye burosuko>> yeydi u hido. Yesuusani <<Aadewoko hinuse ta ohe. Wonto kaatetiya iita cubbachitaara seesaara haasaara hicha indowaxhitaarako hi burona gelesa.

³²Xhamaqicha Yohanisey gizo oge beysese hinuko yoodine <Aadeko> hidi hissine etto baytako. Hinuni efe dheeddakoni iita cubbachitaara seesaara haasaara hicha indowaxhitaaray u etto. Hinne ususe beedi ame hi maxo arsi esa efe hi dheeddo?>> yeydi e hido.

³³Yesuusani <<Fede mamako siwwayte! Be gatiya weyne zuuse tottecha bidzi adey e yecha. Be tottese weyne googe qeysheni e qeyjho. Ye weyne zuusi aafey esa cicutte godo e naddho. Kafese shuchi shakka e keexxho. Ye e geedeni ye tofuttecha weyne godo miijhe efese hanteesituse u hantorosa indi zara wude dhaddi e hando.

³⁴Ye weyne aafe maxhese woggay ello geede e bade e hantaxiti ooworonike miijheshe hantichaashiti gara e anso.

³⁵Usini ye e hantaxita ayti bidzo u durdo, bidzo u woddho, fedani shuchuna u icco.

³⁶Sekke ye adeni burositume laga be hantaxita e ansine hade burosukewo uyso.

³⁷Geede aallowa <Ha ta yele kuxako u kuxe> hissine usuko be yele e anso.

³⁸Ye e yele beedi <Ha esimay e dhaalaxuko. Yoowayte, esa nu woddheese! E dhaallichoshi nuusuko e maaqe> yeydi u hido.

³⁹Hinne ye yele ayti weyney tofuttecho godo qeyshume wude kessi u woddho.

⁴⁰Ye weyne tottecha adey be yoodoyna ye miijhe efese hantichaashiti gara am e hantesa hinumba e bishe?>> hidi e oycco.

⁴¹Usini <<Ye iita gerita waayye beysiko e bayse, ye weyneni kaxhenniya e woggana woggana e aafe biya elluse fede hantaxitusuko e inge>> yeydi u hido.

⁴²Yesuusani <<Hayla Fissharowafa fetto zeerusso baytuwa? Ye esini <Shuchuna keexhichashiti haassi dattecho shuchi hade boorey keexe aykenike zawa ayke shuche e maaddho. Ha esini Wonto hantako, nu aafeseni du'usesako> yeydi hinesako.

⁴³Ha e gisha hinuse <Wonto kaatetey hi garafa efuttiko ye kaatetese modhe aafe kaxhe fede axituse e ingutte.

⁴⁴[Ooneni ha shuchi gara ungesi medhiko e gukke, shuchi e gara unge axini fettonawoko gaacutti e baane.]> yeydiko tayne>> yeydi e hido.

⁴⁵Ye mamakita be siidoniya kahinituse afana maagitaara Farasaxitaaray Yesuusay zeerdosi ususe e maaqesa u gaxxho.

⁴⁶Yesuusa aykese wordechine <<Kaayaxuko>> hidi axi lagay hicho gisha axita u jhassho.