Read koorete Matoose 22 Bible Online

Matoose 22 - koorete bible

Matoose 22

¹Sekke assi Yesuusay mamakona zeerisine,

²<<Afa kaatetey bisheshi ha esako. Bidzi kaati be yelese kuula naddhi

³kuulase xheyguttechashituko <Yoonase yoowayte!> hidi hissine be maalita ansine usini ye kuulaa yoowe u inxhadho.

⁴<Xheyguttechashituko handi <<Kuulase tato uddina naddhiko ta yese, ta sangitaara malla malla ta keemitaaray shufutti uddina naquttiko e yese. Kuulaa yoowayte>> hidi ohuwayte!> hidi hissine kaati fede be maalita e anso.

⁵Xheyguttasitini e otosa belxheydi bidzi bidziti be woota feditini be gadhesa u hando.

⁶Attasitini ye e maalita ayti usuna kaadhi u woddho.

⁷Kaati iitana e huullo. Be yebita ansi woddhechaashita woddhussi u katamani tamana e meggusso.

⁸Ye e geedeni be maalita <Kuulase kaxay naquttiko e yese. Xheyguttechashitimay bishutto baasso.

⁹Ha e gisha oge dagaa seya haya handi hi degexe axita uddi xheyguwayte!> yeydi e hido.

¹⁰E maalitini ogey yese aallo handi iita axitani maaqqe modhe axitani be degessosita uddinawo u bhikkillo. Kuulay essa gelicho zawa borsiti kundo.

¹¹Tato gara yecha borsita beyese ye kaati e gello. Yaha kuula maa'o maadho baa bidzi axe e beedo.

¹²Yenniyani <Doo, waydini kuula maa'o maadho badi haya ne gello?> hidi e oycco. Ye axi mikki e hido.

¹³Kaatini be hantaxita <E kuche e toke tutti shanna cenchaaka wude kessi dakkuwayte! Yahani yeseesiti u yeeke, be gaggoni u qiice> yeydi e hido.

¹⁴Xheyguttaasiti lagako, xharuttaasitimay oddheko>> hidi e hido.

¹⁵Yesuusay zeerdosuna esa qaxhese wordi Farasaxiti dhaddi handi wolla u kundo.

¹⁶Be erusichoshitaara Herodise bade maaqe axitaara Yesuusako u oycorosa u anso. <<Nu Laaxo! Aadaxe ne maaqesaara Wonto oge aadenawo ne erusesaara <Axi am taa ohe?> hidi hissine hooddi ne hantuwannike erako nu ere. Axi aafusha beedi hantuwannako.

¹⁷Rooma kaatuse[15] gaalo gaaluwa e hineni gaallofunani e hine? Am niya e bishe? Mee, nuuse ohuwa!>> yeydi u oycco.

¹⁸Yesuusay u maxo iiteteni erdi <<Hinuno awshachito! Abasun taa qaxhese hi worge?

¹⁹Mee, gaalose shamutte miijhe taa beysuwayte!>> yeydi e hido. Miijheni oodi esuko u indo.

²⁰<<Ha miijhe gara yese bishaara diizuttese sunxaaray ooni e bishe?>> yeydi uso e oycco.

²¹<<Rooma kaatuko e bishe>> yeydi u hido. <<Modheko, Rooma kaatuse maaqesa kaatuse, Wontose maaqesani Wontose inguwayte!>> hidi e hido.

²²Ye esani siidi micci datti dhaddi u hando.

²³<<Haydhasiti denduwasso>> hidi hine Sodoqaxiti ye wonte Yesuusako u yoodo.

²⁴Esani <<Nu Laaxo! <Be machi garafa bidzi axi yello badi e baadako esindo na'i ye e macho dhaalli yelli baada beyndo na'i sunxe xheysuwaye> yeydiko Musey hidecha.

²⁵Hinne bidzi indo na'axhey laappi nu da'aa u yecha. Na'i angussi macho etti yello baadesine e baado. Ye baadasi machoni e barsi dhaallo.

²⁶Lakkoni hayssoni yeydiwo se esi dhaala hay'o ha esi dhaala hay'o hissine be laappuna u itto.

²⁷U uddime geede ye indoy baado.

²⁸Iso be laappunako u ettecha haydhaasiti dende wonte oone machina i maaqe?>> hissine u oycco.

²⁹Yesuusani <<Hayla Fissharoy ohesaara Wonto osaara ere dheeddiko hi hale.

³⁰Haydhaasiti be dende wonte afaa yese Wonto woosaxituke u maaqesa baaka efuttuwasso geluttuwasso.

³¹Haybo denxo gisha Wontoy hinuse Hayla Fissharowa otechosha zeerusobaytuwa?

³²<Tani Abrahaame Wonto, Yissaaqe Wonto, Yayqoobe Wontoko> yeydiko e hido. Wontoy haydhi yeso keengeesiti Wontoko baaka haydhi yeso keenguwasiti Wonto maaquwasso>> yeydi e hido.

³³Axiti ye esa be siidoniyani e erusosuna dhonxhidi u micco.

³⁴Yesuusay Sodoqaxita zeerena iisshosha Farasaxiti siidi wolko bhikkilutti

³⁵esani qaxhese wordi usaafa Muse woga eraxi bidzi

³⁶<<Laaxo! Muse wogaafa uddime gare woossoy a'esana?>> yeydi e oycco.

³⁷Yesuusani <<Ne Laaxe ne Wonto fetto ne muxhurona, fetto ne lubbona, fetto ne maxona eehuwa!

³⁸Buronasaara uddime gare woossowaray ye esako.

³⁹Lakko woossoni ha esa bisheshako. <Fede axe uddina niya ne eehenikeysi eehuwa!> yeydi hinesako.

⁴⁰Ha lam'i woosso bakkaako Muse woga fissharowara kaayaxitusaaray[16] uddina e eedho>> yeydi e hido.

⁴¹Farasaxiti bhikkiluttesune Yesuusay

⁴²<<Mesihese am hi maxe? Oone yelena hinumba e bishe?>> yeydi e oycco. Usini <<Dawite yeleko>> yeydi hido.

⁴³Yesuusani <<Dawitey hine Ayaanana durkutti <Wontoy ta Laaxuse <<Ne iilaxita iisshi ne adeto oomo ta mahoro aallo ta oshishaa uttuwa!>> hidiko hidese> hidi abasuwa e hido? Hine waydini Dawitey Mesihe <Laaxo> hidi e xheyge?

⁴⁵Dawitey <Laaxo> hissine xheydine hine waydini e yele maaqese e danda'e?>> yeydi e hido.

⁴⁶Bidzini e zeere utta hanke esuse matay dheeddo. Ye wontiyafa bidzi oycheni sekke e gara uqusese naassay baasso.