Read koorete Matoose 23 Bible Online

Matoose 23 - koorete bible

Matoose 23

¹Ye e geede laga axitusaara be erusichoshitusaara Yesuusay

²<<Muse woga eruseesitaara Farasaxitaaray erusese Muse godoko u uttese.

³Ha e gisha u oheesita uddina hantuwayte, kakkuwayte. Maaqe baaka u hantesa hantofita! Ye esini be erusenike beese hantiya u baa gishako.

⁴Maddhunxesaara deexho iddaarako tutti axe u idduse beese be gil'a birana dole worguttuwasso.

⁵<Hagaa, axiti taa beyye!> hidiko u hante, Hayla Fissharowafa efutti diizuttesesa be gara be tukke abako u aakuse, be maa'o wuucarani oyddi godowa fettonawo u galalse.[17]

⁶Massalaakani kuxa godo, Ayhuda Bhikkilo Zawaakani burona yese godowo ayti utte u worge.

⁷Gadhesaakani axi ususe kuxa sawo sawusorosaara <Laaxo!> hidi xheygorosaarako u worge.

⁸Hinunimay uddinawo wolindo na'axhita hi maaqe gishaara hinumba erusesi bidziwo maaqe gishaara <Laaxo!> hidi xheyguttofita!

⁹Yeydiwo bidzi adewoy afaa yesesi hinuse yese gisha ooneni ha saha bakkaa <Abbayo!> hidi xheydofita!

¹⁰Erana durke laaxi Mesihewo e maaqe gisha <Laaxo!> hidi xheyguttofita.

¹¹Hinukaafa uddime afana maaqesi hi maraxe maaqesako.

¹²Biya keddaysesi ullako e hine, biya ullaysesi kedda keddako e hine>> yeydi e hido.

¹³Sekke Yesuusay <<Muse woga eruseesito, Farasaxito, hinuno awshachito! Afa kaatetiya axi gele suma hi tuce gisha hinumba baduffu! Hinuseni geluwayta, gelese worgeesitani hi tuce.

¹⁴[Muse woga eruseesito Farasaxito, hinuno awshachito! Hinumba baduffu! U adey baadese indowaxhe hi bonqe, ye esa fasheme hissine galalsi hi shi'e. Yeydi hi hante gisha hi gara gardese yaa'ako ellesa!]

¹⁵Muse woga eruseesito, Farasaxito, hinuno awshachito, hinumba baduffu! Bidzi axi hi aadexesa e aadexorosa mahese bagade garanani saha garanani seya haya hi hante. Hinuka hi mato geede hinume garsi lam'i dakke Gaanname tamase naquttesesa e maaqoronike hi mahe.

¹⁶Hinuno bal'a maaqe durkeesito, hinumba baduffu! Bidzi axi <Ha Wonto Hayla Zawiffa!> hidi e caadhako <Waako hiwasso> hidi hiine, Wonto Hayla Zawaa yese worqena e caadhako <E caaqoko esa aykesa> yeydiko hiine.

¹⁷Muyitaara bal'itaara maaqeesito! Worqemiyara worqe haylonxe Wonto Hayla Zawamiyara a'esana garesa?

¹⁸Yeydiwo kaasha e gara kaashushooshuna axi caadhako <Waako hiwasso> hidi hiine. Kaashuttese uddha abakona e caadhako <Ye caaqoy esa aykesako> yeydi hiine.

¹⁹Hinuno bal'ito! Kaashamiyaara kaasha hayla mahe kaashay e gara kaashuttesumiyara a'esana garesa?

²⁰E gara e kaashuttesuna caaqesi e gara e kaashuttesunaara ingutte kaashanaarako e caaqe.

²¹Wonto Hayla Zawana caaqesi Wonto Hayla Zawanaara essaaka yese Wontonaarako e caaqe.

²²<Wo afiffa!> hidi caaqesini Wontoy ahese e gara uttesunaara e gara utte Wontonaarako e caaqe.

²³Muse woga eruseesito, Farasaxito, hinuno awshachito! Xhatallafaara afusutafaara uuyyowafaara ye usita bishe qimamitaafa wontose tanxo hi inge. Inguwayte baaka Wonto wogaaka yese orje orje base hi dhagge. Ye usini gizo yaa'a yaa'e, maaro mahe, fetto maaddhi Wonto aadexe ha malla zeere hantisine ye uso maheko hinumba e worgusicha.

²⁴Hinuno bal'a maaqe durkeesito! Huzahuzoke yesesa hi ushe usshaafa hi ooxe, gaaloke yese malla hi oodhe.

²⁵Muse woga eruseesito Farasaxito, hinuno awshachito, hinumba baduffu! Burcuqowara sanqiyara wudena shoti hi geeshe, gawwanamay bonqiyara <Uddi base taase taase!> hidi hiyowarako hinuka kundesa.

²⁶Neno bal'a maaqe Farasaxo! Burcuqo gawwanaara sanqe gawwanaara burona shoti geeshuwa. Yenniyako wudenani e geejhe.

²⁷Muse woga eruseesito, Farasaxito, hinuno awshachito! Booqana tishuttese boossa keela hi bishe gisha hinumba baduffu! Wudena moddhi tishuttese boossa keelay be oomona haydhese axi meqetiyara fede fede sandese abakowaray beekaako laga e aytese.

²⁸Yeydiwo hinuni wudena axituse gizo axuko hi bishe, hi gawwaaka awshaara iitetiyarako kundesa.

²⁹Muse woga eruseesito, Farasaxito, hinuno awshachito, hinumba baduffu! Kaayaxiti boossa keela modhussi hi keele, gizo axiti boossa keela bishushi hi naqe.

³⁰<Olo nuwadiyaxhiti yecho bera yesesako usaara wolla kaayaxita wodhese kunguwadiko nu yecha> hidiko hiine.

³¹Ye esuna kaayaxita woddha axiti nayshe hi maaqenikeko hi gara hi ateyne.

³²Hinne hinuni hinadiyaxhi ayti yecho hanta alsuwayte.

³³Hinuno shooshito, gappasshi nayshito! Gaanname tama yaa'aafa waanidini tulxhese hi danda'e?

³⁴Hinne tani kaayaxitako, eraxitako, eruseesitako hinukaa ta anxe. Usaafa bidzi bidzita hi wodhe, feditani hi suxhe, feditani hi Bhikkilo Zawaakani hi dure, feditani ha katamaafa se katamaafa hi goode.

³⁵Ha e gisha gizo maaqichine wodhutta Aabeele suussaafa ayti Wonto Hayla Zawaseni kaashay e gara kaashuttesuseni e gidda hi woddho Beraakiyo yele Zakaraase suuxi aallo saha gara hi gusso gizo axiti suuxuse uddi hi gara yaa'ako ellesa.

³⁶Aadewoko hinuse ta ohe, ha bera yese axiti garako haanxhi yaa'ay uddi e elle>> yeydi e hido.

³⁷Sekkeni Yesuusay <<Yerusaleeme, Yerusaleeme! Kaayaxita wodheyo! Neeka anxuttechaashitani shuchuna iceyo! Lukkali be fange oomo be nayshita bhikkilenike aanxhi woggani ne axita bhikkilese ta wordo. Hinunimay <Eehuwanxhiko> yeydi hiido.

³⁸Yoonase ha hi zaway kayako e atte.

³⁹Hinuse ohoko ta ohe, <Laaxi sunxuna yoonesi suuzuttesesako> hidi hiyoro aallo hattiyafa ayti sekke taa beewaytako>> yeydi e hido.