Read koorete Matoose 24 Bible Online

Matoose 24 - koorete bible

Matoose 24

¹Wonto Hayla Zawa karaafa kessi Yesuusay hangusune e erusichoshiti Wonto Hayla Zaway waa waydi e keexhuttosa beysese esuko u uddho.

²Yesuusani <<Ha esa uddi beyama hi yesesi? Aadewoko hinuse ta ohe, ha shuchi shuchi gara beyesenike bidzini woddo badi attuwasso>> yeydi e hido.

³Yesuusay Zayte Bakka[18] gara uttusune esuko e erusichoshiti be goshewo uddhi <<Haanxhi basi uddi maaqesi aydena? Ne yoowesaara ha saha aallicirasaara e yeragoy amuna? Nuuse ohuwa>> yeydi hissine u oycco.

⁴Yesuusani <<Ooneni hinumba qaarusoppe hinumba kakkuwayte!

⁵<Tani Mesiheko> hidi hissineko ta sunxuna lagiti u yoone, lagitani u qaaruse.

⁶Hi ukke tooray dende fakkiyani toora odoko hi siine. Maaqe baaka du'eydofita! Haanxhi uddi maaqeko e worguse. Ha zeerey maaqusune <Aalliciray yoodosso> hidi hidofita!

⁷Bidzi wudey fede wude gara, kaatini kaati gara toora e denxe, seya haya naayaara saha en'uwaaray e maaqe.

⁸Haanxhi maddhay uddi haga hade zersoke aykesako.

⁹Yenniyani maddhase hinumba ayti garsi u inge, hinumbani u wodhe, ta gishani uddi wude axi hinumba iitana u inxha'e.

¹⁰Lagitini be aadexo dhaddi u dhumutte sekke hanke wola garsi u inge woli gara dendi wola u inxha'e.

¹¹Laga kaayaxe maaquwasiti <Nuni kaayaxuko> hidi zaaddeesiti dendi laga axitani u haluxe.

¹²Iitetey e lage gisha laga axi eehay e toyye.

¹³Maaqe baaka danda'ona aallicira aallo miingesa Wontoy esa maarako e maare.

¹⁴Ato maaqese modhe odo be nuunana nuunana zeere axi uddi siyoronike Wonto kaatete modhe odoy be wude wude yese axituse uddi e ohutte, aallicirani yenniyawo e yoone.

¹⁵Kaayaxi Dan'eeley zeerdonike hayla maaqicha godowa dhohusesaara darrise abakowaray eedhi yesune hi beene -- Ha esani zeerusesi eruwaye --

¹⁶yenniyani Yuuda wude yeseesiti bakkita ba'uttuwaye!

¹⁷Shuchi keexi qinowa yese godo yeseesiti abani efese be zawaa yekke hodhofe.

¹⁸Woota yesesi be maa'o efese be geede hanke maaddhoppe.

¹⁹Ye wogga gawwaara yeseesitusaara dhanxe dhamuseesitusaara uso baduffu!

²⁰Ye hi ba'e wontay bargowara sanbata wontaara e maaqeeme Wonto shi'uwayte.

²¹Esume hi shi'esini yenniya sahay meddhuttosafa ayti hatte aallo benti eruwa maddhaara waayyaarako maaqesa. Buro garani ye esa bishe maddhaara waayyaaray yoowasso.

²²Ye wontita hatuse e dheeddako bidzi axini maaruttese danda'uwadiko yecha. Maaqe baaka xharutta axumeko ye wontita e hatuse.

²³Yenniyaka ooneni <Beewwa, Mesihey hayako e yese!> oo'oyne <Sey seyako e yese> yeydi e hidako <Aadeko> hidi hidofita.

²⁴Mesihe maaquwasiti <Tani Mesiheko> kaayaxita maaquwasiti <Tani kaayaxuko> hissineko zaadaxiti yoodi Wontoy xhardechoshita danda'a'ayko haluxese hissine hantuttese danda'uttuwa yeragowara micushe abakowara u hante.

²⁵Siwwayte! Ha esi maaqeesume burona hay uddi hinuse zeerdiko ta yese.

²⁶Yoonase <Saha melaako e yese> hidi u hidako yaha handofita. Sekkeni <Orkako e yese> hidi hidako <Aadeko> hidi hidofita.

²⁷Zeelunxi afaa faddhi oshishaafa hadursi aallo e bentenike tani axi yeley yoone wonteni yeenkewo e maaqe gishako.

²⁸Ayani ahay yese godoko yewudday u bhikkilutte>> yeydi e hido.

²⁹Sekke assi Yesuusani <<Yeenxhi maddha wontiti geede yenniyawo qoossi e ceenge, agunnani be fo'e beysuwasso, xhoolintitini afaafa u gukke, afaaka yese ositini iitana u en'e.

³⁰Ye e geedeni axi yele yeragoni afaaka e bente. Saha gara be ommana ommana yese axiti uddi yenniya <Wu, wu, yiiy yiiy!> hidi u yeeke. Tani axi yeley adetonaara orje kuxa fuulanaara dhumaanna yoosune u beene.

³¹Keddaysi uwwe marachi katowara wolko Wonto woosaxitani e anxe. Usini hadursi badefani oshichi badefani afa badefani oomo badefani afa wosulaafa saha wosula aallo handi esuse xharuttese axita u bhikkile>> yeydi e hido.

³²Sekke Yesuusay <<Belese sunge mixi garafa bidzi abako eruwayte. Be gara e cultusune e washey dice ayti e jhilettoyna atoy uddhosako hi ere.

³³Yeenkewo haanxho uddi hi beeneniyaka axi yele hidi hiyuttasi yoowey e uddhonike eruwayte, fetto sumaa elliko e yese yeydi hiyoko.

³⁴Aadewoko hinuse ta ohe, haanxhi uddi ittoro aallo ha yeletay garuwasso.

³⁵Afani sahani baattako u baane, ta katomay miindi koolo aalloko e yese>> yeydi e hido.

³⁶Assi Yesuusay <<Ye wontaara ye saatiyara ayde e maaqenike adewo baaka afaa yese woosaxitani maaqqe e yeleni ooneni eresi baasso.

³⁷Nohe beraa be maaddhechonike tani axi yeley yoone beraani ye esukewoko e maaqe.

³⁸Ye beraakani bayso waaxume e buro fetto Nohey markabiya gello wonta aallo axiti miyakaara ushiyakaara efiyakaara geliyakaara u yecha.

³⁹Bayso waaxi yoodi uddinawo fitti uso etto aallo erdo badiko u yecha. Yeenkewoko tani axi yele yooweni e maaqe.

⁴⁰Ye wonte wootaa lam'i axi u yesune ussaafani bidzi efutte, lakkoni atte.

⁴¹Lam'i indowaxhini wolla woxhaa gaaciya yesune bidzi i efutte, lakkoni atte.

⁴²Yoonase ani wonte hi Laaxi yoonesa hi eruwa gisha oseydi miindi kakkuwayte.

⁴³Bidzi zawaadey qama kaysoy beeso yoodi bookke saate erdako birti kattiko kaysoy bootti geluwannike e tucaane. Ha ta otosa eruwayte.

⁴⁴Yeydiwo hi masso baa saatiya tani axi yeley ta yoone gisha hinumba naddhi katti yesuwayte!>> yeydi e hido.

⁴⁵Sekkeni Yesuusay <<E worguse aallo kaxa be zawa axuse e ingorosa zawaadey be zawaa e maagesso muxhuraxe maaqe gaxe keenge maalay oonewa?

⁴⁶Laaxi be yoone woggaa yeydi hantiya e yesune degexe ye maalay galatuttesesako.

⁴⁷Aadewoko hinuse ta ohe. Uddi be keenge abako garako esa e maagexe.

⁴⁸Maaqe baaka ye maalay iita maaddhi <Ta laaxi ukke yoowasso, dooggako e doogge> hidi be muxhurowa massi

⁴⁹hanta wolko esaara be hantichoshita dure ayti goojheshaara e muudakowara e ushakowara

⁵⁰ye iita maalase e laaxi e masso baa wontiyakaara e erdo baa saatiyakaarako e yoone.

⁵¹Ye be maala gara laaxi keddaydese yaa'ako e yaa'e, awshachiti yese godo esani e dakke. Ye godo yesesi u yeeke, be gaggo u qiice>> yeydi e hido.