Read koorete Matoose 25 Bible Online

Matoose 25 - koorete bible

Matoose 25

¹Sekkeni Yesuusay <<Yenniyaka afa kaatetey ha esako e bishe. Be faqe etti ekke na'e mokkese kessa tammi woduraxhey u yecha.

²Ye esini usaafani ichichi muyita ichichi gaxaxita u maaqicha.

³Woduraxhe muyiti faqe etti faqese e da'aa koso maaqe zayte etto badi u yecha.

⁴Ye gaxaxitini be faqiyara wolko be miijhiya faqese e da'aa koso maaqe zayte ayti u yecha.

⁵Kuula handechashiti yoowe deccinne uddina dossey aytinne u geto.

⁶Ekke wodhakka e maaddhine <Kuulaxitako yooda, kessi mokkuwayte> hidi hinne koysi sinto.

⁷Yenniyani ye woduraxhey be gehunsaafa birti be faqe u naddho.

⁸Hade muya maaqicha woduraxheni gaxaxita <Nu faqey bayesuko hine, odde, hi zaytiyafa nuuse inguwayte!> yeydi u hido.

⁹Usini <Oo'o, hinuseni nuuseni ellesa keenguwanxhiko. E zal'utte godo handi hinuse woonguwayte> yeydi u hido.

¹⁰Muyitini zayte woomese dhaddi u hando. Handi u yesune kuulay yoonne, naqutti kakkicha woduraxhey usaara kuula zawaa wolko u gello, gasani aykutto.

¹¹Ye e geedeni muyiti yoodi <Laaxo! Odde, nu laaxo! Gasa nuuse do'uwa!> yeydi u hido.

¹²Esini <Aadewoko hinuse ta ohe, fetto tani hinumba eruwasso> yeydi ususe e mato.

¹³Ha e gisha wontaara saatiyara hi eruwa gisha birti kakkuwayte>> yeydi e zeerdo.

¹⁴Assi Yesuusay <<Afa kaatetey ha esako e bishe. Bidzi adey e yecha. Esini fede wude dhaddi hangisine be maalita xheydi be keengesa usuko e indo.

¹⁵U danda'e aallo u bidzi bidzise shahisine bidzuse ichichi sigire miijhe[19] fedase lam'i sigire miijhe se esuseni assi bidzi sigire miijhe hissi taddi fede wude dhaddi e hando.

¹⁶Ichichi sigire miijhe ettechashi yenniyawo handi esuna hanti fede ichichi sigire miijhe e gara e kosso.

¹⁷Lam'i sigire miijhe ettechashini yeydiwo hanti fede lam'i sigire miijhe e gara e kosso.

¹⁸Maaqe baaka bidzi sigire miijhe ettechashini ye be laaxi miijhe saha bootti essaa e mooddo.

¹⁹Laga bera geedeni ye maaliti laaxi yoodi be miijhe uso oyce e ayto.

²⁰Ichichi sigire miijhe ettechashini fede ichichi sigire miijhe kossi etti yoodi <Ta laaxo! Ichichi sigire miijheko taako ne indecha, hay tani fede ichichi sigire miijheko hanti e gara ta kosso> hidi e hido.

²¹E laaxini <Hasshu, neni muxhuraxe maaqe maalako! Modheko ne hanto. Oddhe basuna muxhuraxe maaddhi ne bento gisha laga basi garako niya ta maagexe. Yoodi taara wolko magguwa> yeydi e hido.

²²Lam'i sigire miijhe ettechashini be laaxuko yoodi <Laaxo, lam'i sigire miijheko ne indecha, fede lam'i sigire miijheko hanti e gara ta kosso> yeydi e hido.

²³E laaxini <Hasshu neni muxhuraxe maaqe maalako! Modheko ne hanto. Oddhe basuna muxhuraxe maaddhi ne bento gisha laga basi garako niyani ta maagexe. Yoodi taara wolko magguwa> yeydi e hido.

²⁴Bidzi sigire miijhe ettechashini yoodi <Laaxo, ne ayllo baasani ne acesha, ne buddo baa godofani bhikkilesa danda'uttuwa axe ne maaqenike erako ta ere.

²⁵Ye e gishako jhasshi handi ne miijhe saha bootti essaa ta mooddo. Hii, ekkuwa ne miijhe!> yeydi e hido.

²⁶E laaxini <Doo, iitaara belxhaxaara maaqe maalako neni! Ta ayllo baa godofa ta acenike, ta buddo baa godofa ta bhikkilenike haasichi ne eresi!

²⁷Hinne ta miijhe esuna hanti laguseesituko ingeko niya e worgusicha, tani ta yoodonniya e kosowarako ta efaane.

²⁸Yey, ha miijhe esukofa etti tammi sigire miijhe keengesuko inguwayte.

²⁹Keengesuse ooneseni kosuttoko e kosutte, fettoko e lage, keenguwasi garafa fetto ye e keengichoniyoko efuttesa.

³⁰Ha go'uwa maala cenchaaka wude kessi dakkuwayte! Yaha axiti u yeeke, be gaggoni u qiice> yeydi u laaxi e hido>> hidi e hido.

³¹Sekkeni Yesuusay <<Axi yele hidi hiyuttasi kuxa fuulana uddi Wonto woosaxitaara yoodi yenniya kaatese kaati uttuxo gara e utte.

³²Be wudefa wudefa axi uddi e buro u bhikkilutte. Doritani deyshitaafa yeengesi shahenike axitani e shahe.

³³Doritani be oshichi badena deyshitani be hadursi badena e esse.

³⁴Yenniyakani kaati be oshishaa be essositani <Hinuno nuwadey suuzeseesito, yoowayte! Sahay meddhuttowafa ayti hinuse naquttese kaatete gelli ekkuwayte.

³⁵Hi ekkesini ta naaydine taa muussiko hi yese, ta sazzineni usshiko hi yese, borsa maaddhi ta yoonne taa mottiko hi yese,

³⁶ta gundusine maysiko hi yese, ta hardine oycciko hi yese, ta tufuttine taako yoodi oycciko hi yese> yeydi e hido.

³⁷Gizo axitini yenniya <Laaxo! Ne naaydine beedi aydeni niya nu muussecha? Ne sazzine beedi aydeni niya nu usshecha?

³⁸Borsa niya mati aydeni nu mottecha? Ne gundusine beedi aydeni niya nu maysecha?

³⁹Ne hardine oo'oyne ne tufuttine beedi aydeni niya nu oyccecha?> yeydi uyne.

⁴⁰Ye kaatini <Aadewoko hinuse ta ohe, ha nuundo na'axhitaafa uddime eerose hi hantosi uddi taase hi hantosako> hissine e mahe.

⁴¹Ye e geedeni be hadursaa yeseesituse <Hinuno aacutteseesito, taakofa zaruwayte! Humbayesaara e woosaxusaara naquttese koolo makkina yese tamaa hanguwayte!

⁴²Ta naaydine taa muusso bayta, ta sazzine taa ussho bayta,

⁴³borsa maaddhi ta yoonne taa motto bayta, ta gundusine taa mayso bayta, ta hardine ta tufuttine taa oycco baytako. Ye e gishako tamaa hi hange> yeydi e hidine

⁴⁴usitini <Laaxo, ne naaydine oo'oyne ne sazzine oo'oyne borsa maaddhi ne yoodine oo'oyne ne gundusine oo'oyne ne hardine oo'oyne ne tufuttine beedi aydeni niya mare nu dheeddecha?> hidiko esuko uyne.

⁴⁵Ye kaati <Aadewoko hinuse ta ohe, uddime eerose mahe hi dheeddosi taase mahe hi dheeddosako> yeydi e hine.

⁴⁶Ye usitini koolo makkina yaa'a u hange. Maaqe baaka gizo axiti koolo makkina yesese u hange>> yeydi e hido.