Read koorete Matoose 26 Bible Online

Matoose 26 - koorete bible

Matoose 26

¹Yesuusay haanxho uddi erussi be also geede be erusichoshituko

²<<Hi erenike lam'i wonta geede Garo Massalako yesa. Yaha taa axi yele ta suxhuttorosako garsi ingusso>> yeydi e hido.

³Ye woggaa kahinituse afana maagitaara gate cimitaaray Qayaafa sunge kahinituse afana adeso u bhikkilutto.

⁴Yesuusani zaadena qaxxhi aykesaara wodhesaara yaha wolla u kundo.

⁵<<Axi toora denxoroome Garo Massala wonte mahuwanxhiko>> yeydi u hido.

⁶Yenniya Yesuusay Biitaniyaka kom'e harge keengicha Simoone zawaa e yecha.

⁷Esini tato gara utti e yesune bidzi indoy e woomay orje maaqe shittoy essa kundesesa albasxhirose bilqaaxhe etti esuko yoodi e qiniya ye shitto i gusso.

⁸Ye esani beedi e erusichoshiti huulli <<Ha shittoy ame yaho e baane?

⁹Laga miijheshe zal'utti ye miijhey jhi'ituse inguttesuko e danda'utticha>> yeydi u hido.

¹⁰Uynesani Yesuusay erdi <<Ha indo ame yeysi hi maddhunxe? Taase modheko i hanto.

¹¹Jhi'iti uddi wogga hinunaarako u yese, tanimay uddi wogga hinunaara haya yesuwasso.

¹²Ha shitto ta gara i gussosunako tani mooguttese naqutto.

¹³Aadewoko hinuse ta ohe, ha saha gara uddi ha modhe odoy ohutte godowa ha i hantosuna axi iso massiko u zeere>> yeydi e hido.

¹⁴Yesuusay erusicho tamma lam'ukaafa bidzi esini Asqorotaxi Yuuday kahinituse afana maagiti da'aa handi

¹⁵<<Garsi Yesuusa hinuse ta ingete am taase hi inge?>> yeydi e oycine qangaafa hantuttese miijhe haydzi tammi birre esuse u indo.

¹⁶Ye wontiyafa ayti Yesuusa garsi ingese bissheshe wogga e worgicha.

¹⁷Helto Boora Massalase acha wonte e erusichoshiti Yesuusako uddhi <<Garo Massala tato ne miyoronike ayani neese nu naqorosa ne worge?>> yeydi u oycco.

¹⁸Esini <<Katamaa ebeloso handi <Laaxi <<Ta woggay ellosso, ta eruseesitaara Garo Massala tato ta muunesi ne zawako>> yeydiko e hine> hidi hiwwayte>> hidi e hido.

¹⁹Yesuusay woossonikeni e erusichoshiti u hando. Garo Massala tatoni u naddho.

²⁰Sahay qandine be erusicho tamma lam'aara wolko tato gara e utto.

²¹Miya u yesune Yesuusay <<Aadewoko hinuse ta ohe, hinukafa bidzi garsiko taa e inge>> yeydi e hido.

²²E erusichoshiti e zeerdosuna orjena higilli be bidzi bidzina <<Hanno tamba neyneni?>> hidi hissine esa oyce u ayto.

²³Yesuusani <<Garsi ta ingesi taara wolko sanqiya anxiya yesesako.

²⁴Tani axi yeley ta gisha e diizuttonikema hay'oko ta hay'e. Maaqe baaka axi yele garsi inge axe baduffu! Ye axi yelutte dheeddesako esuse bishako e bishaane>> yeydi e hido.

²⁵Esa garsi ingese hine Yuuday <<Laaxo, tamba neyneni?>> yeydi e hidine <<Otima ne yesesi>> yeydi e hido.

²⁶Miya u yesuneni Yesuusay boora densi Wonto e galatto. Be erusichoshituseni boora meyssi <<Hii'eyte, muuwayte. Ha esi ta garako[20]>> hidi hissine e indo.

²⁷Essa ushushoosha densi Wonto be galatto geede ususe indi <<Hi uddina ha essafa ushuwayte!

²⁸Ha esi Wonto caaqoy esuna ee'e cubboy attoronike lagituse gukke ta suuxuko.

²⁹Hinuse ohoko ta ohe, nuwade kaatetiya hinunaara weyne daana sekke kille mati ta ushoro wonte aallo ha weyne usshaafa sekke ushuwassho>> yeydi e hido.

³⁰Ye e geede zingale zingalli kessi Zayte Bakka gara dhaddi u hando.

³¹Yenniyani Yesuusay be erusichoshituse << <Yeengichashe oxxhiko ta wodhe, yeemutticha doritini u budutte> yeydi e diizuttesenike hi uddinako ha qamaa dhumutti taa hi dhagge.

³²Maaqe baaka haybowafa ta dendosi geede hinume buroko dhaddi Galila ta gare>> yeydi e hido.

³³Phexhroseni <<Fediti uddi dhumutti niya dhaddakoni tani fetto niya dhagguwasso>> yeydi e hido.

³⁴Yesuusani <<Aadewoko neese ta ohe, ha qamaa lukkali ollo baaneko haydzi wogga <Tani esa eruwasso!> hidi ne zaadde>> yeydi e hido.

³⁵Phexhroseni <<Hay'e e worgusakoni neera ta hay'esa baaka niya dhagguwasso>> yeydi e hido. E erusichoshitini be uddina yeydiwo u hido.

³⁶Ye e geede Yesuusay be erusichoshitaara Getesemaane hisso zayte mixi tofutte godo u hando. Handi be elloniyani <<Seya handi ta shi'oro aallo haya uttuwayte>> yeydi e hido.

³⁷Phexhrosiyara, Zabdoose nayshi lam'aara beera etti handi higilliyara maddhumiyara e ayto.

³⁸<< <Haydhusso> tayoro aallo ta muxhuroy iitanako e maddhundese. Hinuni haya decuwayte, taara wolko miindi kakkuwayte>> yeydi e hido.

³⁹Oddhe fakkidi u garafa shidhi be deemona sahaa undi shi'isine <<Nuwadde, e danda'uttako ha maddha usshi ta garafa garuwaye. Ha esini ne maxoke baaka ta maxoke maaddhoppe>> yeydi e hido.

⁴⁰Hanke maaddhini be erusicho haydzuko yoodi geti u yesune beedi Phexhroseko <<Fetto taara bidzi saatiyani waani birti kafese danda'e hi dheeddo?

⁴¹Naa'owa gelli hi unguwannike oseywayte, shi'uwayte. Axi be maxona naquttoko naqutte, achomay gafaxuko>> yeydi e hido.

⁴²Lakkunxoni Yesuusay sekke handi <<Nuwadde! Ha maddha usshe ta ussho baane garuwasa e maaqo'ayko ne maxoke maaquwaye>> yeydi e shidho.

⁴³Assi hanke maaddhi e yoonne gehunxi uso ayti iishecho gisha hatteni gehiyaka u yecha.

⁴⁴Yaha uso dhaddi assiwo handi haysso woggaani buro be shidhechonike sekke Wonto e shidho.

⁴⁵Hanke be erusichoshitukoni yoodi <<Haha'e! Yenawa hatte aallo gehiya hi yese? Hi kaxe efiya hi yese? Hay, woggani elliko yese, tani axi yeley cubbachiti kuchiya gardiko ta ingutte.

⁴⁶Denduwayte, nu hammeese, beewayte, garsi taa ingesi yoodiko e yese>> yeydi e hido.

⁴⁷Hagawo ye esa e zeerusune e tamma lam'ukaafa bidzo maaqicha Yuuday e yoodo. Laga axitini esaara wolko satataara bikkaara ayti kahinituse afana maagitaara gate cimitaaray ansine u yoodo.

⁴⁸Yesuusa garsi ingese hicha Yuudani <<Hi aykorosi ta muuxhe axuko, esa aykuwayte>> hidi yerago e otecha.

⁴⁹Yenniyawo Yesuusako yoodi <<Sawo, ta Laaxo!>> hidi hissine e muuxxho.

⁵⁰Yesuusani <<Nuundo na'e, esume ne yoodosa alsuwa>> yeydi e hine yenniyawo axiti e gara gutti esa u ayto.

⁵¹Yesuusaara yechashitaafani bidzi be satata kessi kahinituse afana ade maala gara dendi e washe e burso.

⁵²Yesuusani esuse yenniya <<Satata kesseesiti satatanako beese u baane. Ha e gisha ne satata e koofiya gelsuwa.

⁵³Tani nuwade shidhako yenniyawo izzuppi kuma kuma aytese tamma lam'i godowa shahuttese tooraxitume afana maaqe Wonto woosaxita anxese danda'uwasuwa niya e bishe?

⁵⁴Hinne yeydi ta shidhakoma <Maddha efeko esa e worguse> yeydi hine ha Hayla Fissharo katoy waanidini e aale?>> yeydi e hido.

⁵⁵Sekke yooda laga axituse <<Fuulo aykusonike satataara bikkaara etti taa aykesuwa hi yoodo? Wonto Hayla Zawaa wontana wontana erusisine uttiya ta yesune taa ayto badiko hi yecha.

⁵⁶Haanxhi uddi yeydi e maaddhosi kaayaxituna diizuttechay itoronikeko>> hidi e hido. Yenniyawo e erusichoshitini be uddina esa datti u badho.

⁵⁷Yesuusa ayti axiti yenniya Muse woga eruseesitaara gate cimitaaray bhikkiluttecho kahinituse afana ade maaqe Qayaafaso u aando.

⁵⁸Phexhrosemay kahinituse afana adeso aallo zara zaraydi Yesuusa geede e hando. Zeerey waydi aalesa beyese hissine qeyshi giddaa gelli hantaxitaara yaha e utto.

⁵⁹Kahinituse afana maagitaara Ayhuda gate aheesitaaray be uddina Yesuusay hay'oronike yaa'usese zaadena ateynesa u worgicha.

⁶⁰Laga zaade atoy e gara uddhakoni haybose esa elluse ato fettona degexutto baasso. Aalliciraka lam'i atoy uddhi

⁶¹<<Ha axi <Wonto Hayla Zawa woddussi haydzi wontena keexhese danda'ako ta danda'e> hidiko e hido>> yeydi hissine u oto.

⁶²Kahinituse afana adey dendi <<Haanxhi ne gara ateyneesuse hanke ne mahe uttay baye?>> hidi hissine Yesuusa e oycco.

⁶³Esini mikki hido. Sekkeni esuse kahinituse afana adey <<Yeso maaqe Wonto sunxunako niya ta oyce. Wonto yele Mesihey niya maaqesa nuuse aadewo caadhi ohuwa>> yeydi e hido.

⁶⁴Yesuusani <<Hidiko ne yese, maaqe baaka hinuse ohoko ta ohe. Ha esume sekke tani axi yeley uddi base danda'e Wonto oshishaa uttusuniyara yeydiwo afa dhumaanna ta yoosuniyaarako hi beene>> yeydi e hido.

⁶⁵Yenniyani kahinituse afana adey huulli be maa'o feeddhi <<Hay, Wonto casshiko e yese, hinuni e casshosha siidiko hi yese. Ha e geede aba atona feda e worguse?

⁶⁶Hine am hi ohe?>> yeydi e hido. <<Hay'eko esuse bishesha!>> hidi hissine sekke esuse u mato.

⁶⁷Cucheni e aafusha u cutto, u durdo, esa baqiya yesineni

⁶⁸<<Mesihe, niya baddhay oonena? Mee, kaayaxe maaqo'ayko nuuse ohuwa!>> yeydi u hicha.

⁶⁹Kahinituse afana adeso qeyshi gidda Phexhrosey uttiya yesune bidzi maaki hanke esuko uddhi <<Doo, nenini Galilaxi Yesuusaarama ne yechoshi>> yeydi i hido.

⁷⁰Esini <<Fetto ha ne zeeresi taase geluwasso>> yeydi uddiyade buro e zaaddo.

⁷¹Qeyshi suma e kesusune feden'i beedi yaha yecha axituse <<Ha esini Nazrataxi Yesuusaarako e yecha>> yeydi i hido.

⁷²Phexhroseni sekke assiwo caadhi <<Ye axe tani eruwasso>> hidi e zaaddo.

⁷³Oddhe wogga decci yaha eedhecha axiti esuko shidhi <<Ha ne zeeresako an wude axe ne maaqesa niya erusesa. Aadenawo neni u badeko>> hidi uydo.

⁷⁴Esini <<Ye axe eruwasso>> yeydi hissine biya aaciyara caaqiyara e ayto. Lukkalini yenniyawo oollo.

⁷⁵<<Lukkali oollo baanneko haydzi wogga <Esa eruwasso> hidi neyne>> hidi Yesuusay zeerdecho kato e masso. Dhaddi wude kessi suuxi aafunxe e yeetto.