Read koorete Matoose 27 Bible Online

Matoose 27 - koorete bible

Matoose 27

¹Ketiya sho'e kahinituse afana maagitaara gate cimitaaray Yesuusa wodhusese wolla u kundo.

²Esani tutti etti handi ye wude ahicha Philaxhosese garsi u indo.

³Ye woggani garsi esa indecha Yuuday e gara e yaa'uttosa beedi be hantosuna iitana e higillo. Kahinituse afana maagitukowara gate cimitukowara ye haydzi tammi birre etti oodi

⁴<<Geeshi axe haybose garsi ta indosuna baysiko ta yese>> yeydi e hido. Usini <<Hinne am nuu dhida? Niyako e maddhunxe!>> yeydi u hido.

⁵Ye haydzi tammi birreni Wonto Hayla Zawaa yaha buddi dhaddi kessi biya gitti e woddho.

⁶Ye haydzi tammi birre kahinituse afana maagiti bhikkilli etti <<Ha miijhey suuxi wooma miijheko. Wonto Hayla Zawase inguttechashaara bidzi godo nu gadoronike bishuwassho>> hidi uydo.

⁷Hinne wolla kundi borsiti essa mooguttorosa ota bache meddhichashi saha u wondo.

⁸Ye e gishako hanzo aallo ye sahay <<Suuxi saha>> hidi e hiyutte.

⁹<<Isra'eele geri casshecho e wooma maaqe haydzi tammi birre u etto.

¹⁰Ye esini Laaxi taa woosechonikeko ota bache meddhichashi sahase u indo>> hidi kaayaxi Ermiyasena ohuttisine yecha kaayoy e itto.

¹¹Yesuusani ye wude ahicha Philaxhose buro u uqusso. Esini <<Neni Ayhuda kaatuwa?>> hidi e oycco. Yesuusay <<Hidiko ne yese>> yeydi e mato.

¹²Kahinituse afana maagitaara gate cimitaaramay esa luukusune hanke mahe e dheeddo.

¹³Yenniyani Philaxhosey <<Haanxhi zeerena niya u luukesa siya baannuwa?>> yeydi e hido.

¹⁴Dhonxhidi e micoro aallo Yesuusay bidzi katoni hanke mahe dheeddi mikki e hido.

¹⁵Uddi bera aallo ye wude ahichashi Garo Massala wonte Ayhudaxiti oycco bidzi tufaxe birshi dafe e lossecha.

¹⁶Yenniyani bidzi birraxi <<Barbaane>> hidi hisso eruttese tufaxi e yecha.

¹⁷Axiti bhikkilutto geede Philaxhosey <<Ooni ta birchorosa hi worge? Barbaaniyani Mesihe hiyutte Yesuusana?>> hidi hissine uso e oycco.

¹⁸Yeydini e oyccoshi dhiidhana Yesuusa garsi u indosa be ericho gishako.

¹⁹Philaxhosey yaa'ese uttiya yesune e machi <<Ye gizo axi gara abani hantofuna! Onxe qamako e gisha afukkana laga ta maddhundese>> hidi hissine esuko i woosso.

²⁰Kahinituse afana maagitaara gate cimitaaray yenniyawo axiti <<Barbaaney dafuttuwaye! Yesuusay hay'uwaye!>> hidi hissine u oycoronike uso be maxo gara u mahicha.

²¹Sekke assiwo ye wude ahichashi <<U lam'ukaafa ooni ta birchorosa hi worge?>> hidi hissine axita e oycco. Usini <<Barbaaneko>> yeydi u hido.

²²Philaxhoseni <<Hinne Mesihe hiyutte Yesuusa waani ta hise?>> hidi e hido. Be uddinani <<Suxhuttuwaye!>> yeydi u hido.

²³<<Hinne am e bayso?>> yeydi e oycco. <<Suxhuttuwaye, suxhuttuwaye!>> hidi hissine fettowo uwwa u lagusso.

²⁴Philaxhoseni beynesa dheeddi <<Ha zeerena yoona toora denxesuko uyne>> hidi hissine waaxe oowussi <<Ha axi haybose tani essaa geluwasso, hi eehenike hisuwayte>> hidi hissine laga axi buro be kuche e shoto.

²⁵Axitini be uddina <<E suuxuna elle gomey nu garaara nu nayshi garaara maaquwaye>> yeydi u hido.

²⁶Philaxhoseni yenniya Barbaane birshi datti Yesuusani be durusosi geede u suxhoronike e indo.

²⁷Ye e geedeni Philaxhose tooraxiti Yesuusa Philaxhose qeyshi giddaa etti u hando. Yaha yecha tooraxitani uddina e googe u bhikkillo.

²⁸E maa'o kessi zo'o maa'o[21] u mayso.

²⁹Anke xhaaxhi naddhi e qino gara u gaddo. E oshichi kuchiyani oddhe shomboqo kallo[22] ayssi e buro bocunti <<Ayhuda kaato! Modhetey neese maaquwaye>> yeydi dhaadisine

³⁰cuche e gara cutti ye kallo e kuchiyafa etti e qinowa esuna u oxhicha.

³¹Yeydi e gara be dhaaddo geedeni zo'o maa'o e garafa kessi e maa'o maysi suxhese etti u hando.

³²Yahafa kessiya yesine Qarana wude axe Simoone sungesa degessi Yesuusay e gara suxhutte mixe osana esa u iddusso.

³³Ye e geedeni Golgota hisso godo u ello. <<Golgota>> hidi hiyoy <<Qino qooce>> yeydi hiyoko.

³⁴Dhooqe basaara worquttese weyne daana Yesuusase u uqusso. Maaquwaye baaka uudhi be beedo geede ushe e inxhadho.

³⁵Yesuusa suxxhi e maa'o hixha olli u shato.

³⁶Utti yaha esa u kakkicha.

³⁷Esa esuna be luukichoshani e qinowanna e bakka e suxhutto mixi gara <<Ha esi Yesuusako, Ayhuda kaatuko>> hidi diizuttesesa u gaddo.

³⁸Yesuusaarani ye wogga lam'i fuulita bidzo e oshishaa bidzoni e hadursaa hissi u suxxho.

³⁹E da'aanna garya yecha axiti esa haassi be qino en'usisine

⁴⁰<<Doo, Wonto Hayla Zawa woddussi haydzi wontenako ta keexhe hichayo! Haayya, niya maaruwa! Mee, Wonto yele maaqo'ayko sussaafa hodhuwa!>> hidi hissine esa dhaadiya u yecha.

⁴¹Yeenkewo kahinituse afana maagiti Muse woga eruseesitaara gate cimitaaray

⁴²<<Fedeesita e maardo, biya maarese ada danda'uwaye? Isra'eele kaate maaqo'ayko ha sussaafa mee hatte hodhuwaye! Nunini esa aadexako nu aadexe.

⁴³Wonto gobbe matiko <Tani Wonto yeleko> hidi e hidese, yebo, Wontoy esa eehesa maaqo'ayketese esa maaruwaye>> yeydi hissine qozooziya u yecha.

⁴⁴Esaara suxhuttecha fuulitini yeydiwo esa u cashicha.

⁴⁵Izzuppi saatiyafa ayti odduppi saate aallo sahay kumena e ceendo.

⁴⁶Odduppi saate e maaqusune Yesuusay be kato keddaysi <<Elohe! Elohe! Laama sabaqitaanii?>> yeydi e hido. Ye e bircheni <<Ta Wonto! Ta Wonto! Ame taa ne dhaddo?>> yeydi hiyoko.

⁴⁷Yaha ee'iya yecha axitaafani bidzi bidziti siidi <<Elaaseko e xheyge>> yeydi u hido.

⁴⁸Yenniyawo usaafa bidzi woxxhi handi hade huxha bisheshesha etti dhoodhese usshaaka gelsi e xhunxhorosa shomboqo qinowa gaddi e uqusso.

⁴⁹Fedeesitini <<Dhagguwa! Mee, Elaasey yoodi maaresa nu beyyeese!>> yeydi u hido.

⁵⁰Assinawo sekke kato keddaysi uydi kaxe e kesso.

⁵¹Yenniya Wonto Hayla Zawa giddaa hade gilbake fasshecha maa'oy be qinowafa ayti toke aallo feedhutti lam'e e kesso. Sahani en'o, shuchi mallitini u bay'utto.

⁵²Boossay do'uttineni haydhecha Wonto axita maaqe haylaxitaafa lagay u dendo.

⁵³Boossaafani u kesso. Yesuusay haybowafa dendo geedeni geeshi katamaa Yerusaleeme u gelline laga axi uso u beedo.

⁵⁴Xhiixi gara afana maagaara esaara wolko Yesuusa kakkichashitaaray sahay en'osaara fede maaddha basitaara beedi <<Ha esi aadena Wonto yeleko e maaqicha>> hidi fettonawo u jhassho.

⁵⁵Laga indowaxhitini zara yesine beeneesitini yaha u yecha. Yesuusa marisine Galilaafa ayti yoochashitako u maaqicha.

⁵⁶Usaafani Magdoolaxhi Maarame, Yayqoobiyara Yoosefiyara yella Maarame, Zabdoose na'axheyndowaraydiko u maaqicha.

⁵⁷Qamese e hisune Yoosefe sunge bidzi wodumay Armatiyase katamaxi e yoodo. Esini Yesuusay erusichoshako e maaqicha.

⁵⁸Yesuusa aha efese Philaxhoseko handi e shidho. Esini <<Inguwayte>> hidi e hido.

⁵⁹Yoosefey Yesuusa aha etti talbaafa meddhuttese geeshi maa'ona e acco.

⁶⁰Kille maaqe boossa beese essa mooguttese shuche wocci bootti be naddhechoshaa aandi e woyso. Shuchi orje andarsi oodi ye boossa suma tucci dhaddi e hando.

⁶¹Magdoolaxhi Maaramiyara ye fede Maaramiyaray yaha boossa buro uttiya u yecha.

⁶²Massalase u naquttichoshume geede wonte ketiya kahinituse afana maagitaara Farasaxitaaray Philaxhoseko handi

⁶³<<Nu laaxo! Ye esi haydho badesine <Haysso wonte geedeko ta dende> hidi e hidechoshako nuuse maxutta.

⁶⁴Ha e gisha boossa haydzi wonte aallo oseydi u kaforonike ohuwa. Kafuse ne dheeba'ayko e erusichoshiti kayssi etti <Haybowafa dendosso> hidiko axe u qaaruse. Burosume geede e haluxesako garesa>> yeydi u hido.

⁶⁵Philaxhoseni <<Kakkeesiti hinunaarama u yesesi. Handi hi erenike kafusuwayte>> yeydi e hido.

⁶⁶Usini handi ooneni boossa do'ese danda'uwannike zitti tucci baysi be tooraxituna u kafusso.