Read koorete Matoose 28 Bible Online

Matoose 28 - koorete bible

Matoose 28

¹Sanbatay gardine acha wonte ketiya Magdoolaxhi Maaramiyara ye fede Maaramiyaray e boossa beyese u hando. E maxutto baanne iitana saha en'oy e maaddho. Wonto woosaxini afaafa hodhi boossa suma tuccecha shuche andarsi e gara e utto.

³Woosaxi aafushani zeelunxuke faqicha e maa'oni shachuke booticha.

⁴Boossa kakkichashiti esani jhasshi koburdi haydhasuke u maaddho.

⁵Ye woosaxi indowaxhitani <<Jhasshofita, suxhuttecha Yesuusa hi worgenike erako ta ere.

⁶Haya baasso, be otechonikeko e dendese. Woydhi e yecho godo yoodi beewayte.

⁷Yoonase ukke handi <Haybowafa dendosso, Galilako dhaddi hi buro e gare, yahako esa hi degexe> yeydi e erusichoshituse ohuwayte. Tanini hay otusso>> yeydi e hido.

⁸Yenniyani indowaxhiti boossaafa haynani jhassho haynani magga hissine e erusichoshituse handi ohese allena u woxxho.

⁹Ogiya usaara muti Yesuusay <<Sawoyte>> yeydi e hido. Esuko uddhi e toke ayti e buro u akkirdo.

¹⁰Yenniyani Yesuusay <<Jhasshofita! Handi nuundo na'axhituse Galila u hamoronike ohuwayte. Yahako taa u beene>> yeydi e hido.

¹¹Ye indowaxhitini hamiya yesune boossa kakkicha tooraxitaafa bidzi bidziti maaddha base uddina kahinituse afana maagituko katamaa handi u oto.

¹²Kahinituse afana maagitaara gate cimitaaray bhikkilutti wolla be kundo geede be tooraxituse miijhe lagussi indi

¹³<< <Nu getesuneko e erusichoshiti qama yoodi aha kayssi u etto> yeydi axuse odusuwayte!

¹⁴Ayhuda gate ahichashini ha zeere e siita'ayko nuunko esaara zeerara, maddhay hi gara elluwannikeko nu mahe>> yeydi u hido.

¹⁵Ye tooraxitini miijhe etti hade u otechonike u mato. Ye odoy hanzo aalloni Ayhudaxiti gidda yeydiwoko e odusutte.

¹⁶E erusicho tamma bidzi Yesuusay otecho bakka gara Galila u hando.

¹⁷Esa beedini e buro u akkirdo. Maaquwaye baaka bidzi bidzitini eezzo.

¹⁸Yesuusani hanke usuko uddhi <<Adetoy uddi afaani sahaani taase inguttiko e yese.

¹⁹Yoonase be wude wude yese axituko uddi hanguwayte! Adena yelena Ayaana Geeshi sunxuna xhamaqisine hinumba ta woossosa uddi u kaforonike erusisine ta oge hangeesita mahuwayte. Yebo ha saha aallicira aallo uddi wogga tani hinunaara wolkoko ta yese>> yeydi e hido.