Read koorete Matoose 3 Bible Online

Matoose 3 - koorete bible

Matoose 3

¹Ye woggaaka Xhamaqicha Yohanisey yoodi Yuuda wude yese saha melaaka ohe e ayto.

²Ohisineni <<Afa kaatetese woggay ellosso, hi cubbo dhaddi maaquwayte!>> yeydi e hicha.

³Kaayaxi Isayasey Yohanise gisha ohisine << <Laaxi oge naquwayte, modhussi gizusuwayte> yeydi hissine saha melaa uwwara axi kato>> hidi e hidecha.

⁴Yohanise maa'oy gaalo ufussaafa meddhuttesesako e maaqicha. Be elfani zalabhitena e gixhicha. E muucho kaxani booliyara ziizita degessi shidiyarako e maaqicha.

⁵Ye woggani axiti Yerusaleeme katamaafa Yuuda wudiyafa Yordanose googe yese wudittaafa uddi Yohaniseko u yoocha.

⁶Be cubbo u bazzicha, Yohanisey Yordanose waassaa uso e xhamaqicha.

⁷Yohanisey laga Farasaxitaara Sodoqaxitaaray xhamaquttiya esuko yoosune beedi <<Hinuno gappasshi nayshito! Qaaruseesito[2]! <Wontokofa yoone huulaafa kesoko nu kese> hidi waydi hi maxe?

⁸Hi cubbo dhaddi hi maaddhonike esuna eruso hanta hantuwayte!

⁹<Nuni Abrahaame nayshuko> hidi cee'uttofita! Hinuse ohoko ta ohe. Wontoy ha shushaafa etti Abrahaamese nayshe mahesuko e danda'e.

¹⁰Fetto hatte mixita e xhabhowafa bursi dafese gandey naquttiko e yese. Yoonase modhe aafe kaxhuwa mixiti uddina burdiko tamaa u dafutte.

¹¹Hay, tani hi cubbo dhaddi hi maaddhosi esuna eruttorosako waaxuna ta xhamaqe. Ta geede yoonesimay taame gare osaxuko, e toke kobhani iddese tani elluwasso. Ayaana Geeshunaara tamanaarako hinumba e xhamaqe.

¹²Esini kaxa butti falaafa e aafe esuna shahese haxhoole aytiko e yese. Aydaafa geesshi gossa li'iyako e gelse, falama bayese danda'uwa tamanako e megge>> yeydi e hido.

¹³Ye woggaaka Yesuusay Yohanisey xhamaqorosa Galilaafa Yordanose shoore e yoodo.

¹⁴Yohaniseni <<Ha esi maaquwasso, neni taa xhamadhakoko e bishe. Waanidi neni taako yoonne?>> yeydi hissine inxha'e e ayto.

¹⁵Yesuusani <<Wontoy woossosa uddi hante e worguse gisha dhagguwa, ta otonikewo mahuwa!>> hidi e hido. Yohaniseni ye zeere etti Yesuusa e xhamadho.

¹⁶Yesuusay xhamaqutti waassaafa kessonikewo afay e do'utto. Wonto Ayaanani hade woyya bisshi hoddhi Yesuusa gara e uttusune e beedo.

¹⁷Ye woggawo <<Ta eehe ta yeley ha esako, esuna maggako ta magge>> yeydi hine katoy afaafa e sinto.