Read koorete Matoose 4 Bible Online

Matoose 4 - koorete bible

Matoose 4

¹Ye e geedeni Yesuusa Humbayey naadhi beyorosa Ayaana Geeshi saha melaa e aando.

²Yaha oyddi tammi wonta qama xhoondi e naayutto.

³Yenniyani naadhi beyena eruttese Humbayey Yesuusako yoodi <<Neni Wonto yele maaqo'ayko ha shuchita <Mee, boora maaquttuwaye!> hidi hiwwa>> yeydi e hido.

⁴Yesuusani << <Axi yesesi Wontoy zeerdo katona uddi baaka booranawo maaquwasso> yeydiko e diizuttese>> yeydi e hido.

⁵Ye e geedeni Humbayey hayla maaqe katamaaka Yerusaleeme esa e aando. Wonto Hayla Zawa qinowa keddaydese godowa essi

⁶<< <Niya u kaforonikeko Wontoy be woosaxituko e ohe, ne tokey shuchi gara oxheesume be kuchenako niya wokke u ayke> hidiko e diizuttese. Ha e gisha neni Wonto yele maaqo'ayko hayafa yekke doondi hodhuwa!>> yeydi e hido.

⁷Yesuusani <<Fede godo <Ne Laaxe ne Wonto naadhi beedofuna!> hidiko assi e diizuttese>> hidi e hido.

⁸Assini Humbayey Yesuusa orjena keddaydese bakka gara e aando. Ha saha gara be kaatetona kaatetona yese iitana moddhese kuxa fuula keenge wudita uddina beysi

⁹<<Bocunti taase ne akkirdako haanxho uddiko neese ta inge>> yeydi e hido.

¹⁰Yesuusani <<Neno Humbaye, hanguwa hayafa! <Ne Laaxuse ne Wontose akkiruwa, esawo kuxuwa!> yeydiko e diizuttese>> yeydi e hido.

¹¹Ye e geedeni Humbayey Yesuusa datti dhaddi e hando. Wonto woosaxitini esuko yoodi worgusesa esuse u mahicha.

¹²Yesuusay Yohanisey aykutti tufuttosa be siido geede Galila wude e hando.

¹³Nazrate katamaafa dhaddi Qifirnahoomeydi hiyutte katamaa handi e utto. Qifirnahoomey bagade da'aa yese katamako. Ye katamay Zabiloone katamaara Naftaleeme katamaaray essaaka yese wudiyako e yese.

¹⁴Yeydini e maaddhosi kaayaxi Isayasey zeerdechoshi e aaloronikeko.

¹⁵Isayasey ohisine <<Zabiloone wudiyara Naftaleeme wudiyaray yese godo bagadiya aange oge da'aaka Yordanose waaxi semfa Ayhuda maaquwasiti essa yese Galila!

¹⁶Cencha godowa yese axiti orje fo'eko u beedo. Hayboy hade dooshuke fasshi yecho wudiya yese axituse fo'ey kesso>> yeydi hidechoshako.

¹⁷Yenniyafa ayti Yesuusay <<Afa kaatetey uddhese gisha hi cubbo dhaddi maaquwayte>> yeydi hissine ohe e ayto.

¹⁸Yesuusay Galila bagade da'aanna garichine wolindo na'axhe lam'e e beedo. Usini Phexhroseydi hiyutta Simooniyara esindo na'i Indiraasiyarako u maaqicha. Gulxhe aykeesita be maaqicho gisha esuna aykuso maarabe waassaa u dakkicha.

¹⁹Yesuusani <<Taara yoowayte, tani hinumba gulxhe hi aykenike axe hi ooworosako ta mahe>> yeydi e hido.

²⁰Usini be maarabita yaha datti yenniyawo esaara u hando.

²¹Yahafani haga e garusune fede lam'i wolindo na'axhey Zabdoose nayshi Yayqoobiyara Yohanisiyaray zabhaaka biyade Zabdoosiyara yesine maarabe naqiya u yesune beedi <<Yoowayte taara!>> hidi e hido.

²²Yenniyawo essa be yecho zabhaara biyadiyara yaha dhaddi Yesuusaara u hando.

²³Yesuusani Ayhuda Bhikkilo Zawittaaka erusisine afa kaatetese modhe odo ohisine axiti gara yecha be bishana bishana yese hargiyafa uddi loolusisine Galila wude gawwo uddi e hanticha.

²⁴Hargaxe e looluse odoy Sooriya wude aallo uddi e sintinne be bishana bishana hardi maddhundechaashita uddina Yesuusako u oodo. Ye hargaxitaafa xhoozi aytechoshiti jhiice[3] harge keengeesitaara beenna hantese danda'uwa tokey doccesheeshitaaray usaaka yecha. Yeenxhita Yesuusay uddina e loolusso.

²⁵Galilaafani <<Tammi Katama>> hidi hiyutte wudefani Yerusaleemefani Yuudaafaara Yordanose waaxi semfafaara yoodaasiti iitana axi lagay Yesuusaara u hando.