Read koorete Matoose 5 Bible Online

Matoose 5 - koorete bible

Matoose 5

¹Yesuusay yeenxhi axi laga be beedoniya bakka gara kessi e utto. E erusichoshitini yenniya esuko yoodinne

²uso erusisine

³<<Beese be qinese Wonto buro gafaxe be maaqenike ereesiti magguttuwaye, afa kaatetey ususuko.

⁴Be muxhurowafa higileesiti magguttuwaye, Wontoy ususe osako e inge.

⁵Gawwo aako maaqeesiti magguttuwaye, ha saha dhaalesi usuko.

⁶Wonto gizete naayeesitaara sazzeesitaaray magguttuwaye, gizete degessi mishoko u mishe.

⁷Maareesiti magguttuwaye, Wontoy uso maarako e maare.

⁸Wontose geeshi muxhurona yeseesiti magguttuwaye, Wonto beetako u beene.

⁹Naqowara modhetiyaray yesoronike hanteesiti magguttuwaye, Wonto naysheydiko u hiyutte.

¹⁰Wonto gizo hantame goodowara maddhaara ekkeesiti magguttuwaye, afa kaatetey ususuko.

¹¹Ta gisha axiti hinumba cashushuniyara maddha u beysusuniyara zaaddi iitana uddi hi sunxe u baysusuniyara hinuni magguwayte.

¹²Yeydiwo goodowara maddhaara hi buro yecha kaayaxiti garani ellussiko u yecha. Afa kaatetiya hi degexe woomay orje e maaqe gisha fetto iitanawo magguwayte, ililli hidi hiwwayte!>> yeydi e hido.

¹³Sekkeni Yesuusay <<Hinuni ha saha gara yese axuse sogoko. Sogoy loo'e dheeddako hine waydini be loo'ete sekke degexese e danda'e? Sena wude dafutti axi tokena e garana hantewo baaka fetto sekke abani maruwasso.

¹⁴Bakka gara yese katamay fashuttese danda'uttuwasso. Yeydiwo hinuni ha saha gara yese axuse faqeko.

¹⁵Faqe faddhi zawa yeseesituse uddi e beysorosa e fo'ey bente keddaydese godoko e gadesa baaka kofa e bakka gufunxesi ooneni baasso.

¹⁶Yeenkewo axiti modhe hi hanta beedi afaa yese hinade u kuxoronike faqe maaddhi axi buruwa faquwayte>> yeydi e hido.

¹⁷Sekkeni assi Yesuusay <<Muse wogaara kaayaxiti zeerdechoshaara densi ooxese ta yoodosa hinumba bishofe! Ye u otechoshi aalorosa ta yoodosa baaka densi ooxese yoodo baasso.

¹⁸Aadewoko hinuse ta ohe, afaara sahaaray yese aallo uddi basi itoro aallo Muse wogay hanta gara e feyshesha baaka wogaafa bidzi diizzo beytani yeydiwo fooxhuttesesini attuwasso.

¹⁹Ye woossowafa eero maaddhese bidzoni fetto woddusesaara feditini woddusoronike erusesaaray afa kaatetiya uddime barsuko e maaqe. Maaqe baaka woosuttecha woossita katti fede geritini kaforonike eruse axi afa kaatetiya uddime angussuko e maaqe.

²⁰Hinuse ohoko ta ohe, hi gizetey Muse woga eruseesitumiyara Farasaxitumiyara e gardo baasa fetto afa kaatetiya geluwaytako.

²¹Buro yecha gerituse ohuttase siidiko hi yecha. <Axe woddhofuna, axe wodhesi gara yaa'uttoko e yaa'utte> hidi hinesako.

²²Tanimay hinuse yeydiko tayne. Axi gara huulesi uddiko e yaa'utte. Axe ooneni <Maxo keenguwannako!> hidi casha'ayko uddi yaa'eesiti buroko e uqe. <Aya yecha muyaw!> yeydi casha'ayko uddi Gaanname hiyutte bayese danda'uwa tamasuko e yaa'utte.

²³Wontose e gara kaashushooshi buro uddhi ne ingo ingese hissine feday neese keenge zeerey yesesa gaxho'ayko

²⁴ne ingo e gara kaashushooshi da'aa yaha dhaddi burona handi neese zeere keenge axaara wolko naquttuwa. Ye e geede yahafa maaddhini Wontose inguwa.

²⁵Ne iilaxi niya luuttinne esaara yaa'a zawa hangisine ukkenawo ogiya wolla naquttuwayte! Naqutte hi dheeba'ayko yaa'axusuko ne iilaxi garsi niya e inge. Yaa'esini be yebose niya ingeteko tufe zawa ne gele.

²⁶Aadewoko hinuse ta ohe, ne gara unda miijhe bidzi saanteni shato badi ne shamoro aallo yahafa kesuwannako>> yeydi e hido.

²⁷Sekkeni assi Yesuusay << <Laggettofuna!> yeydi ohuttase siidiko hi yese.

²⁸Tanimay hinuse hinesi maacho beedi be muxhurowanna iso col'asi uddina be muxhurowanna yenniyawo isaara laggettiko e yese.

²⁹Yoonase oshichi ne aafey cubbowa niya gelsesa e maaqo'ayko kessi ne garafa dakkuwa! Kume ne garay Gaannamiya dafutteesume ne garafa bidzi baadako bishako e bishe.

³⁰Oshichi ne kuchey cubbowa niya gelsa'ayko ne garafa bursi dakkuwa! Kume ne garay Gaannamiya dafutteesume ne garafa bidzi baadako bishako e bishe.

³¹<Be macho dakkesi uddi esuna be dakkesa diizuttese ato isuse inguwaye!> yeydiko assi e hiyuttecha.

³²Tanimay hinuse hinesi i laggetto baanne fede zeereme hissine be macho dakkesi uddi i laggetoronikeko e mahe. Dafutta indoni ekkesi uddi laggetako e laggete>> yeydi e hido.

³³Yesuusani assi <<Buro yecha gerituse <Wontose ne caadhecho caaqo itusuwa! Ne caadhechosha buddofuna!> yeydi ohuttase siidiko hi yecha.

³⁴Tanimay hinuse hinesi <Ta zeeresi aadeko> hissine fetto caadhofuna. <Wo afafa> hidi caadhofita. Ye esini Wontoy essa utti kaatiya yese godoko.

³⁵<Ha sahafa> hidi caadhofita. Ha sahani Wontoy be toke e gara gade godoko. <Yerusaleemefa> hidi caadhofita. Malla kaatuse e katamako.

³⁶Hi qinona caadhofita. Fetto bidzoni hi qino ufussaafa booxe mahese oo'oyne karxe mahese danda'uwaytako.

³⁷Zeerese hi worgesi <eewa> e maaqo'ayko <eewa>, <oo'o> e maaqo'ayko <oo'o> hidi hiwwayte. Ye esume gare zeerey Humbaye garafako>> yeydi e hido.

³⁸Yesuusay assi << <Aafe baysasuse e aafey baawaye, gaggo meysasuse e gaggoy me'uwaye> yeydi ohuttase siidiko hi yecha.

³⁹Tanimay hinuse hinesi iita neese hanta axuse iita matofita. Oshichi ne anqaa baqesuse hadursi ne anqani assi arsi beysuwa.

⁴⁰Bidzi axi ne shaamijhe efese niya luuttako ne kooteni dhagguwa effeere.

⁴¹Bidzi axi <Oddhe oge taara aadhuwa> hidi niya e maddhunsako, e otechoshume e dakke esaara hanguwa.

⁴²Niya shi'esuse inguwa. Ne garafa tal'e worgesa oossofuna.

⁴³<Ne lagge eehuwa, ne iilaxeni inxha'uwa!> yeydi ohuttase siidiko hi yecha.

⁴⁴Tanimay hinuse hinesi hi iilaxe eehuwayte, hinumba goodeesitusaara maddhunxeesitusaara shi'uwayte.

⁴⁵Ha esuke hanta'ayko afaa yese hinadese e nayshe hi maaqesako hi beyse. Esi iitaseni modheseni be meddho qoossuko e kesse. Gizo axituseni cubbachituseni yeydiwoko ira e bukuse.

⁴⁶Hinuni hinumba eehe axitawo hi eetako aba woomani Wontoy hinuse e inge? Axe maddhunxe qaraacitini yeenkewoko u hante.

⁴⁷Hinuse hi badewo sawusesa hi maaqo'ayketese aba gardesesani hantiya hi yese? Wonto bade maaquwasiti yeenkewo maaquwaye u hantesi?

⁴⁸Afaa yese hinade maaqe Wontoy beese fetto orjena modhe e maaqenike hinuni yeydiwo fetto modhe maaquwayte!>> yeydi e hido.