Read koorete Matoose 6 Bible Online

Matoose 6 - koorete bible

Matoose 6

¹Yesuusani assi zeerisine <<Modhe hanta hantisine <Hagaa, axi taa beyye> hissine hi hante hanta garafa hinumba kakkuwayte. Yeenke maaqo'ayko afaa yese hinade garafa aba woomani degexuwaytako.

²Jhi'ose ingisine axi uddi eroronike matofita. Axi nashoronike Ayhuda Bhikkilo Zawaakani ogiyakani hanteesiti awshachitako! Aadeko hinuse ta ohe, be efashe wooma ettiko u yese.

³Nenimay jhi'ose ingo ne inge woggaaka ne ingoy ijhaanna e maaqorosa oshichi kuchena ne ingesa hadursi kuchey fetto erdoffe! Ijhaanna ne hantosa beene niyadey ne hanta woomako neese e inge>> yeydi e hido.

⁵Yesuusani assi <<Shi'isine hade awshachituke shidhofita! Usini shi'e u eehesi axi uso beyorosa hissine Ayhuda Bhikkilo Zawaakaara oge dagaakaara eedhiko u shi'e. Aadewoko hinuse ta ohe, be efashe wooma ettiko u yese.

⁶Nenimay shi'isine ne zawa gelli gasa ayti ijhaa yese bentuwa niyade shi'uwa. Ijhaanna ne hantosa beene niyadey ne hanta wooma neese ingako e inge.

⁷Wonto bidzi abako gisha shi'isine hinuni Wonto bade maaquwasituke galalsi shidhofita! Bidzi abako galalsi u shi'esuna Wontoy ususe siinesako uso e bishe.

⁸Hi shidho baanne hinumba worgusesa hinadey buronawo e ere gisha hinuni usuke maaddhofita.

⁹Yoonase ha esuke shi'uwayte: <Nuwadde afaa yeseyo, hayla ne sunxi kuxuttuwaye.

¹⁰Ne kaatetoy yoowaye, ne maxoy afaa be hantuttenike yeydiwo ha sahaani maaquwaye.

¹¹Hanzose maaqe boora nuuse inguwa!

¹²Nuu miidhasituse <<Attuwaye>> hidi hiya nu yesenike nenini nu miidhosa <<Attuwaye>> hidi hiwwa.

¹³Ye iita garafa nuu maaruwa baaka naadhi beene abakowa nuu gelsofuna! [Kaatetey, osay, kuxay koolona neesuko, ameen.]>

¹⁴Axi hinumba miidhosa <Attuwaye> hidi hi hitta'ayko afaa yese hinadey hi miidhosa <Attuwaye> hidiko e hine.

¹⁵Hinuni axi miidha <Attuwaye> hidi hiye hi dheeddako hinadeni hi miidha <Attuwaye> hidi hiwasso>> yeydi e hido.

¹⁶Sekke Yesuusay <<Wontomeysine hi xhoongeniya hade awshachiti hantenike higilse aafusha beyse axuke maaddhofita. Wontome hissine u xhoongesa axi erorosako be aafusha u iisse. Aadeko hinuse ta ohe, be efashe wooma ettiko u yese.

¹⁷Nenimay ne xhoongeniya ne aafusha shoti ne qino tishuwa.

¹⁸Ye esuke ne xhoongesa ijhaa yese niyadewo baaka ooneni feday eruwasso. Ijhaanna ne hantosa beene niyadey ne hanta wooma neese ingako e inge.

¹⁹Hinuse wodunte ha sahaaka qooqannanaara[4] wuhanaara e baane godo kaysitini meyssi gelli kayse godo eelusofita!

²⁰Maaqe baaka afaaka hi wodunte qooqannanaara wuhanaara bayese e danda'uwa godo kaysitini meyssi gelli kaysese danda'uwa godo eelusuwayte!

²¹Esume yeydi ta hinesi eellese hi woduntey yese godo hi maxoy yahaka yese gishako>> yeydi e hido.

²²Yesuusay <<Aafey garase hade faqeke yesesako. Ne aafey modhe yesesa e maaddhako ne garay kumenako fo'e e maaqe.

²³Ne aafey harga'ayko ne garay kumenako cenchawo e maaqe. Hinne neeka yese fo'ey cencha e maaqo'ayko waakidini cenchay shanna cencha e maaquwaane?>> yeydi e hido.

²⁴Yesuusay assi <<Bidzi axi lam'i laaxuse woosuttese danda'uwasso. Ha esa e inxha'e, se esa e eehe. Ha esuseni uddhi e woosutte, se esa e haasse. Miijhe hi wontokeysi hi mato geede Wontose woosuttese danda'uwaytako.

²⁵Tanimay hinuse hinesi <Am nu miiye? Am nu usshe? Am nu maa''e?> hidi hissine hi yesose maddhundofita. Miyutte kaxame axi yesoy garuwaye? Maa'utte maa'ome axi garay garuwaye?

²⁶Haaya mee, kafita beewayte. Ayluttuwasso, acuttuwasso, li'iyani gelsuttuwasso. Afaa yese Wontoko hinadey uso muussesa. Hine ye kafitume hinuni fetto garuwaytuwa?

²⁷Hinukaafa be maxona maddhundi be bera gara fetto bidzi wonte kosese danda'esi ooneni?

²⁸Maa'ose ame hine hi maddhunge? Haaya mee, gubba yese fiiriti waydi diciya u yesesa maxuwayte! Hantay uso gafusuwasso, beese zuquttuwasso.

²⁹Iitana moddhese maa'o maadha kuxa fuula keengicha kaati Salamoneni fetto usaafa hade bidzikeysi maadho baasso.

³⁰Hinuni Wonto hi gobbesi waakidi oddhe e maaddho! Wontoy gubba yese maata hanzo benti guta tamaa dafuttesa yeysi waarussi maysesa be maadho geede hinumba hine waani gardesesa e maysuwaane?

³¹Ha e gisha <Am nu miiye? Am nu usshe? Am nu maa''e?> hidi massi maddhundofita!

³²Wonto bade maaquwasiti yeenke yesesa uddi degexesuko u kardutte. Uddi haanxho hinumba e worgusenike afaa yese hinadey erako ere.

³³Burussi Wonto afa kaatetemiyara Wonto gizo hantamiyara karduttuwayte. Yeenkesesi uddiko hinuse e ingutte.

³⁴Yoonase gutase maddhundofita, gutase yese maddhay gutase ellako e elle. Wontay be bidzina bidzina biya elle maddhako e keenge>> yeydi e hido.