Read koorete Matoose 7 Bible Online

Matoose 7 - koorete bible

Matoose 7

¹Yesuusay sekke <<Hi gara e yaa'utteesume hinuni oone garani yaadhofita!

²Axi gara hi yaa'enikeko hi garani e yaa'utte. Essa hi makkesunako hinuseni e makkutte.

³Ne aafiya yese mudduno gaxxhi beedo badesine fede axi aafiya yese diira ame ne beene?

⁴Hinne ame ne aafiya muddunoy yesune fede axuse <Mee, ne aafiya yese diira haayya ta kessoore> yeydi neyne?

⁵Neno awshacho! Burona ne aafiya yese mudduno kessuwa! Ye e geedeko fede axi aafiya yese diira ne kessoronike modhussi ne aafey e beene.

⁶Hayla maaqe base kanase indofita, bentuwa seelo abakoni girme buro dattofita! Yeysi hi maho'ayko girmiti be tokenako u dheqe, kaniti hanke maaddhiko hinumba fosshi u gusse.

⁷Shi'uwayte, hinuse inguttoko e ingutte. Worguwayte, degexako hi degexe. Sumaa eedhi xheyguwayte, hinuse gasay do'uttoko e do'utte.

⁸Ye esini shi'eesuse uddiko e ingutte, worgesini degexako e degexe, sumaa eedhi xheygesuseni do'uttoko e do'utte.

⁹Ade maaqisine hinukaafa yeley boora gadhako shuche ingesi ooneni?

¹⁰Gulxhe e ga'ete shooshe inga e inge?

¹¹Yoonase hinuni iita maaqisine hi nayshushe modhe ingo inge erako hi ere. Hinne afaa yese hinadey biya shi'eesituse waanidini modhe abako hinume afana garsi e inguwaane?

¹²Yoonase axi hinuse mahorosa hi worge abako uddi hinunini yeydiwo axuse mahuwayte. Muse wogay ohesaara kaayaxiti erusichoshaaray ha esako>> yeydi e hido.

¹³Sekkeni Yesuusay <<Xhuumo sumaanna geluwayte! Baysuwa gelse sumay aako maaqusune e ogeni gafusuwaa modheko. Yaha geleesitini lagitako.

¹⁴Maaqe baaka yesuwa gelse sumay xhuumo maaqusune e ogey maddhunxesako, ye esa degexe axiti baretako>> yeydi e hido.

¹⁵Assi Yesuusay <<Kaayaxe be maaquwasa kaayaxe bisshi yoonesi garafa hinumba kakkuwayte. Wude badena hade dore bisshiko hinuko u yoone, be gawwaana hade shoddi ekke sudhamituke yeseesitako.

¹⁶U hanta aafenako oone u maaqesa hi ere. Anke garafa modhe weyne aafey moggore garafani modhe belese aafey maxhuttuwasso.

¹⁷Ye esini mixi modhey uddina modhe aafeko e kaxhe, mixi iitay iita aafeko e kaxhe.

¹⁸Mixi modhey iita aafe kaxhese danda'uwasso, yeydiwo mixi iitay modhe aafe kaxhese danda'uwasso.

¹⁹Aafe modhe kaxhuwa mixi uddina burdiko tamaa e dafutte.

²⁰Yeydiwo ye axita u hanta aafenako oone u maaqesa hi ere.

²¹Afaa yese nuwadey worge hanta hantesa baaka <Laaxo! Laaxo!> hinesi uddina afa kaatetiya gelesa maaquwasso.

²²Aallicira yaa'a wonte lagiti <Laaxo! Laaxo! Ne sunxuna Wonto kato zeerdo baanxhiya? Ne sunxuna xhooze gooddo baanxhiya? Ne sunxuna laga micushesha hanto baanxhiya?> yeydiko taako uyne.

²³Yenniyaka <Tani fetto hinumba eruwasso, hinuno iita axito, ta garafa zaruwayte> hidiko tayne>> yeydi e hido.

²⁴Sekkeni Yesuusay <<Ha kato siidi hanta gara feyssheshi uddina kaacho modhussi kaashi be keexe keexha gaxe keenge axuko e bishe.

²⁵Iray buttine wulqani wul'i agexini agetti ye keexe iitana naadhi hinne modhe kaacho gara be keexhuttecho gisha ye keexi unge e dheeddo.

²⁶Be siido ta kato hanta gara feysshuwashi mancha[5] gara be keexe keexha axi muyako e bishe.

²⁷Iray buttine wulqani wul'i agexini agetti iitana ye keexe e naadho. Yenniyawo ye keexi e undo. E undo ungeni fettona e iitto>> yeydi e hido.

²⁸Yesuusay ha zeerita zeerdi also geede yaha yecha laga axiti ye e erusosa siidi u micco.

²⁹U miccoshini Muse woga eruseesituke e maaddho baanne hade adeto keenge axuke e erusicho gishako.