Read koorete Matoose 8 Bible Online

Matoose 8 - koorete bible

Matoose 8

¹Yesuusay bakkaafa hodhoniyaka laga axini esaara u hoddho.

²Kom'e harge hargicha bidzi axi yenniyawo Yesuusako e yoodo. E buro bocunti <<Laaxo, eeha'ayko taa geesheshuko ne danda'e[6]>> yeydi e hido.

³Yesuusani <<Eewa, eehako ta eehe, geejhuwa>> hidi hissine be kuche ansi e dollo. Yenniyawo ye axi be kom'e hargiyafa e loollo.

⁴Yesuusay esuko <<Oonekoni fetto ha esa zeerdofuna! Wonto zawa kahiney nemba beyorosa esuko hanguwa. Ye e geede Muse wogay ohenike kaasha Wontose uqusuwa. Ye esini ne loollonike axuse atoko e maaqe>> hidi e hido.

⁵Yesuusay Qifirnahoome katamaa gelusune bidzi Rooma wude axi xhiixi gara afana maagay Yesuusako e yoodo.

⁶Esini <<Laaxo, ta hantaxi hardi tokey doccinneko beenna hantey esa iisshine iitanawo maddhundi zawa woy'iya e yese>> hidi e shidho.

⁷<<Handiko ta looluse>> yeydi Yesuusay hido.

⁸Xhiixi gara afana maagani <<Laaxo, neni ta zawaa gele axe maaquwasso tani. Neese bidzi katowo odde zeeruwa, ta hantaxi loolako e loole.

⁹Taaseni tamba woosesako ta afana yesa, yeydiwo ta woose tooraxitako ta oomona yesa. Usaafa bidzo <Hanguwa!> hidi taykete e hange, fedani <Yoowwa!> hidi taykete e yoone. Ta maalani <Ha esa hantuwa!> hidi taykete e hante>> hidi e hido.

¹⁰Yesuusay ye esa be siido wogga micci beera hangicha gerituseni <<Aadewoko hinuse ta ohe, haanke yese orje aadexo keenge axe bidzoni Isra'eele feeqa degesso baasso.

¹¹Hay hinuse ohoko ta ohe, laga axiti hadursafani oshishafani yoodiko Abrahaamiyara Yissaaqiyara Yayqoobiyara afa kaatetiya massalaaka u utte.

¹²Ye kaatetoy ususe naquttechoshitimay yenniya shanna cenchaako wude u dafutte. Yahani u yeeke, gaggoni u qiice>> hidi e hido.

¹³Yesuusani ye e geede xhiixi gara afana maagase << <Maaqoko e maaqe> hidi ne aadessonike neese maaquwaye. Yoonase hanguwa!>> yeydi e hido. Ye e hantaxini yenniyakawo e loollo.

¹⁴Yesuusay Phexhrose zawaa gelli e boolti garay iitana misshine i woy'usune e beedo.

¹⁵I kuche e aytine micha hargey dhaddine i loollo. Yenniyawo dendi esuse worgusesa i hanto.

¹⁶Qamese e hisune axiti xhoozi aytecho laga axita esuko oodine u gara yecha xhoozeni e gooddo. Hargaxitani uddi e loolusso.

¹⁷Ye esani e matosi <<Nu gafeteni e etto, nu hargeni e iddo>> yeydi kaayaxi Isayasena zeeruttechashi e aaloronikeko.

¹⁸Yesuusay axi lagay be googe bhikkiluttesesa be beedo wogga be erusichoshita bagade semfa u fottorosa e oto.

¹⁹Muse woga eruse bidzi axi Yesuusako yoodi <<Laaxo, ayan ne hange godo neerako ta hange>> yeydi e hido.

²⁰Yesuusay <<Geedaliti essa be yese googgo, kafitini essa be gele keexe keemako u keenge. Tani axi yeley essaa gelli kaxe ta ekke godo keenguwasso>> yeydi hissine e mato.

²¹Feday assi e erusichoshitaafa bidzi <<Laaxo, neera yeseme buro nuwade handi ta taaggoose>> yeydi e hido.

²²Yesuusay <<Haydhasiti beese haydhase u taaggoronike dhagguwa, neni taara yoowwa!>> yeydi e hido.

²³Ye e geede Yesuusay zabhaa e gello. E erusichoshitini e geede gelline hame u ayto.

²⁴Hamiya u yesune waaxi gara osaxi jhirahoy dendo. Ye zabhaa waaxi gelline waaxi zabha oodhese hido. Yenniya Yesuusay ye zabhaa gehiya e yecha.

²⁵Hanke Yesuusako shidhini <<Laaxo, baadunxhiko! Nuu ha essaafa kessuwa!>> hidi hissine e erusichoshiti esa u birkusso.

²⁶Yesuusay <<Ame yeydi iitana hi jhashe? Hinuni Wonto hi gobbesi waakidi oddhewo e maaddho!>> hissine dendi agexeni waaxeni e kasshine fettonawo mikku e hido.

²⁷Ye geritini orjena du'eydi <<Ha esi waakeydese axuna? Agexini waaxini esuse woosuttesi>> yeydi u hido.

²⁸Yesuusay Galila waaxe fotti Gerasenoone wude e yoodo. Yahani lam'i axi xhoozi ayteseesiti boossa godowafa kessi esaara u muto. Fettona iita osaxita u maaqicho gisha ye ogiyaanna ooneni garese danda'uwadiko yecha.

²⁹<<Neno Wonto yele, niya am nuussa gelsesa? Woggay ellobaaniya nuu maddhunxiya ne yoodo?>> yeydi kato keddaysi u zeerdo.

³⁰Usume oddhe fakkidese godowa laga girmiti yeemuttiya u yecha.

³¹Ye xhooziti <<Odde, nuu gooda'ayko se girmitukaa nuu anxuwa!>> hissine esa u shidho.

³²Yesuusani <<Hanguwayte!>> hidi e hido. Ussaafa kessi yeemutticha girmitukaa handi u gello. Gaaga nuunaafa woxxhi hoddhi be kumenawo ye girmiti bagadiya gelli u baado.

³³Ye girmita yeengichashitini woxxhi badhi katamaa gelli maaddha base uddi u odusso. Xhoozi aytecho gerini abay maaddhonike uddi u oto.

³⁴Ye katama axiti be uddina Yesuusa beyese u yoodo. Beedini be wudefa dhaddi e hamoronike esa u shidho.