Read koorete Matoose 9 Bible Online

Matoose 9 - koorete bible

Matoose 9

¹Yesuusay zabhaa gelli bagade fotti be yecho katamaa e hando.

²Beenna hantese danda'uwa e tokey docceshe bidzi axe abako gara woysi axiti Yesuusako etti u yoodo. <<Loolusako e looluse>> hidi hissine u aadessosani beedi Yesuusay ye doccesheshushe <<Ta yelle, oseywa! <Ne cubboy attuwaye> hidi hiyuttiko e yese>> yeydi e hido.

³Muse woga eruseesitaafa bidzi bidziti yenniyaka <<Yeydi hiyey Wonto cashema!>> yeydi hissine be muxhurowa u masso.

⁴Yesuusani u maxo erdi <<Ame ha iita zeere hi muxhurowa hi maxe?

⁵<Ne cubboy attuwaye> hidi hiyemiyara <Dendi dhaddi hanguwa> hidi hiyemiyara a'esana shawukesa?

⁶Tani axi yeley axi cubbo <Attuwaye> hidi hiyese ha saha bakkaa adeto ta keengesa eruwayte!>> hidi hissine doccechaashushe <<Doo, dendi e gara niya woysechosha etti ne zawa hanguwa!>> yeydi e hido.

⁷Dendi be zawani dhaddi e hando.

⁸Ye esani beeda axiti dhonxhidi micci haanke yese adeto axuse inda Wonto kedda kedda u hisso.

⁹Yesuusay yahafa dhaddi hamiya yesine bidzi Matoose sunge qaraacey qaraxha be qaraxhicho godowa e uttusune beedi <<Taara aadhuwa!>> hidi e hido. Matooseni dendi esaara hando.

¹⁰Yesuusay tato gara Matooseso uttusune laga qaraacitaara iita hantichaashitaaray yoodi yaha yecha Yesuusaara e erusichoshitaara wolko tato gara u utticha.

¹¹Farasaxiti ye esani beedi e erusichoshita <<Hi Laaxi qaraacitaara iita hantichaashitaara wolla ame e muune?>> yeydi u hido.

¹²Yesuusani ye esa siidi <<Hargaxituse baaka modhe yeseesituse dhaliyade worgusuwasso.

¹³Hayla Fissharowa <Tani worgesi maaro baaka kaasha worguwasso> yeydi diizuttasi birchey aba e maaqesa wordi degessi gaxhuwayte. Tani yoodosi cubbachita maarowa xheygese baaka <Tanko gizoy> hidi hine axita xheygese maaquwasso>> yeydi e hido.

¹⁴Yohanisey erusichoshitini hanke Yesuusako yoodi <<Nuura Farasaxitaaray uddina xhoomako nu xhoonge, ne eruseesiti ame u xhoonguwaane?>> yeydi hissine u oycco.

¹⁵Yesuusani <<Ekke na'i usaara yesune kuulase taafutteseesita higile worgusuwa e worguse? Ekke na'i u garafa shahutte wontay yootako e yoone, yenniyako u xhoonge.

¹⁶Maa'o cima gara ooneni kille olle docesha olluwasso. E olla'ayko kille olley maa'o cima be gara goosshi feeddhi fetto burome garsi e iisse gishako.

¹⁷Yeenkewo cima ogorowa kille weyne daana gadesi ooneni baasso. Yeysi eysako ye cima ogoroy feedhuttiko maruwasa e maaqe, weyne daanani wora gutti baane. Kille weyne daanay kille ogorowako e gadutte, hikketeko be lam'una modhenawo u yese>> yeydi hissine e zeerdo.

¹⁸Yeydi Yesuusay zeerusune Ayhuda afana maaga maaqicha bidzi axi esuko e yoodo. Yesuusa buro bocunti <<Ta busshiyoko hatte baadesa, neni yoodi ne kuche i gara gaddakoma loolako i loole>> yeydi e hido.

¹⁹Yesuusani dendi be erusichoshitaara wolko esso hangicha.

²⁰Yenniyawo tamma lam'i bera aallo suuxi i garafa gukkusune maddhungicha bidzi indoy Yesuusa geedena yoodi e maa'o bira i dollo.

²¹Yoodini dolese i dandadhosi <<Fetto ta kuchena e maa'o bira dollako loolako ta loole>> hidi hissine be muxhurowa massi beyecho gishako.

²²Yesuusay be geede hanke maaddhi iso beedi <<Nuunde, oseywa! <Loolusako e looluse> hidi hissine taa ne aadesso gisha loolliko ne yese>> yeydi e hido. Yenniyawo ye indoni i loollo.

²³Yesuusay ye afana maagaso handi be ello geede shuushule uydi higileesitaara yeekisine sekke hanke koyse axitaara e beedo.

²⁴<<Hi uddinawo hayafa kesuwayte. Ha busshi getiko i yesesa baaka baado baanniko!>> yeydi e hido. Esa dhaaddi e gara u miicco.

²⁵Axitani kessibe oosso geede Yesuusani i yecho zawaa gelli i kuche e aytine i dendo.

²⁶Ye wudiyani uddi ye e nashutto odoy e sinto.

²⁷Yahafa dendi Yesuusay hangusune u aafey baadese lam'i geri e geede hame ayti <<Dawite yele! Odde, nuu beewwa!>> hidi u uycha.

²⁸Zawa e gello geede ye bal'iti esuko u uddho. Yesuusani << <Aadewo, nuu loolusako e looluse> hidi aadexa hi aadexe?>> yeydi e oycco. Usini <<Eewa, Laaxo!>> yeydi hissine u mato.

²⁹Yesuusani u aafe be kuchena dolli <<Taa hi goddonike hinuse maaquwaye>> yeydi e hido.

³⁰Yenniyawo u aafeni beedo. Yesuusani <<Oonekoni ha esa zeerdofita, hinumba kakkuwayte!>> hidi minsi e oto.

³¹Usimay yahafa handi Yesuusay hantechosha ye wudiya uddina u addusso.

³²U aafe e loolusecho geriti yahafa kessi dhaddi handine xhoozi e gara yese muumo fede geriti hanke Yesuusako u oodo.

³³Ye muumo maaqicha axi garafa xhooze e goodosi geede zeere e gello. <<Isra'eele gerukaa haanke yesesi fetto benti eruwasso>> hissine yaha yecha axiti u micco.

³⁴Farasaxitimay <<Xhooze e goodesi xhoozuse afana maaga osanako>> yeydi u hido.

³⁵Yesuusay Ayhuda Bhikkilo Zawittaa erusisine Wonto kaatetese modhe odo ohisine laga axita be bishana bishana yese hargiyafa uddi loolusisine malla katamittaakani maaqqe giddha katamittaakani sekke hanke e hanticha.

³⁶Laga axita be beedo wogga hade yeengesa keenguwa dorituke maddhundi maraxe keenguwasituke yaha dhabutti u yecho gisha ususe e higillo.

³⁷Ye e gisha be erusichoshituse <<Gatiya kaxhese kaxay lagako, maaqe baaka ye kaxa hanke bhikkile hantaxiti eeroko.

³⁸Ha e gisha ye kaxaade <Kaxa bhikkile hantaxita anxuwa> hidi shi'uwayte>> yeydi e hido.