Read koorete Marqoose 1 Bible Online

Marqoose 1 - koorete bible

Marqoose 1

¹Hayafa densi [Wonto yele maaqe] Yesuusi Kristosa gisha ohutta modhe odoko nu siine.

²Kaayaxi Isayase fissharowa <<Ne buro ne buroydi handi oge naqara ta woosaxuko ta anxe. <Laaxi oge naquwayte, modhussi gizusuwayte> yeydi hissine saha melaa uwwara axi kato>> hidi e diizuttechonike e maaddho.

⁴Hinneko Xhamaqicha Yohanisey <<Hi cubbo dhaddi maaddhi xhamaquttuwayte. Yeydi hi maaqete Wontoy hi cubbo <Attuwaye> hidiko e hine>> yeydi saha melaana oobadhisine e yoodo.

⁵Yuuda wudiyafani axi be yechoyna Yerusaleeme katamaafani uddina esuko yoodi be cubbo u bazzicha, Yohanisey Yordanose waassaa uso e xhamaqicha.

⁶Yohanisey gaalo ufuxuna meddhuttese maa'o maadhi be elfani kom'e zalabhitena e gixhicha. Booliyara ziizita degessi shidiyara e muucha.

⁷Esini <<Ullaydi e kobha tufe bircheshe tani bishuwashi taame mallay ta geedeko e yoone.

⁸Tani hinumba waaxunako ta xhamaqiya yese, esimay Ayaana Geeshunako hinumba e xhamaqe>> yeydi e oobadhicha.

⁹Ye woggaaka Yesuusay Galila wudiyaka yese Nazrate katamaafa yoodine Yohanisey Yordanose waassaaka esa xhamadho.

¹⁰Xhamaqutti waassaafa e kessonike yenniyawo afay feedhuttine Ayaana Geeshi hade woyya bisshi be gara hodhusune e beedo.

¹¹<<Ta eehe ta yeley nembako, neenna maggako ta magge>> yeydi hine katoy afaafa e sinto.

¹²Yenniyawo Ayaana Geeshi esa densi saha melaa etti e hando.

¹³Oyddi tammi wonta aallo Humbayey naadhi beesune yaha e dooddo. Bo'iti esaara yaha wolko yesune Wonto woosaxi yoodi esuse worgusesa u mahicha.

¹⁴Yohanisey aykutti tufe zawa gello geede Yesuusay Wontokofa anxutta modhe odo ohisine Galila wudiyaka e yoodo.

¹⁵Esini <<Wontay ellose, Wonto kaatetese woggay uddhose, hi cubbo dhaddi maaquwayte, ha modhe odo siidi <Aadeko> hissine ekkuwayte!>> yeydi e ohicha.

¹⁶Ye e geede Yesuusay Galila bagade da'aanna garichine Simooniyara esindo na'i Indiraasiyara e beedo. Usini gulxhe aykesa be maaqicho gisha esuna laga gulxhe be aykicho maarabe hissoosa aykese bagadiya u dakkicha.

¹⁷Yesuusani <<Taara yoowayte, tani hinumba gulxhe hi aykenike axita hi ooworosako ta mahe>> hidi e hido.

¹⁸Usini be maarabita yaha datti yenniyawo esaara u hando.

¹⁹Yahafa hagawo garichine lam'i wolindo na'axhe Yayqoobiyara Yohanisiyara e beedo. Usadeni Zabdoose e sungicha. Zabhaa yesine be maarabe u naqicha.

²⁰Yesuusani yenniyawo uso xheydi <<Yoowayte taara>> hidi e hido. Usini biyade Zabdoose e hantaxaara zabhaa datti esaara u hando.

²¹Yahafa gardi Qifirnahoome katamaaka u hando. Yaha e yesune sanbata wontay ello geede yenniyawo Ayhuda Bhikkilo Zawa gelli e erusso.

²²Yesuusay Muse woga eruse geruke maaddho badi e yesune, hade erana axe durke afana maagituke e erusicho gisha siidasiti micco.

²³Yenniyawo ye Bhikkilo Zawaaka xhoozi e gara yese axi e yecha. Esini

²⁴<<Nazrataxi Yesuusa! Am nuuka niya gelsesa? Numba baysesuwa ne yoodo? Tani oone ne maaqesa nemba erako ta ere. Neni Wonto maaqe haylako>> yeydi hissine e uydo.

²⁵Yesuusani ye xhooze <<Mikki hiwwa! E garafa kesuwa!>> hidi e kassho.

²⁶Ye xhoozi ye ade olli fardunsi keddaysi uydi datti dhaddi e hando.

²⁷Axiti be uddina micci <<Ha zeerey am? Xhooze be adetona e woose, fetto usini esuse siidi woosutte. Ha esi kille era maaquwaye?>> yeydi hissine sekke hanke wolla u zeericha.

²⁸Yenniyawo ye e nashoy Galila wude googe uddi handi odusutto.

²⁹Yesuusay ye e geede Ayhuda Bhikkilo Zawaafa be kessonike Yayqoobiyara Yohanisiyara etti Simooniyaxhi Indiraasiyaxhi zawa handi e gello.

³⁰Ye zawaaka Simoone machindoy i garay michana hardine woy'iya i yecha. Hinne Yesuusako u otinne

³¹isuko gardi i kuche ayti e denso. Ye micha hargey yenniyawo dattine dendi ususe worguse base i hanto.

³²Qoossi gelline qamese e hisune axiti Yesuusako hargaxaara xhoozi aytecho axaara uddina oowe u ayto.

³³Ye katama axiti be uddina ye zawa karaaka u bhikkilutto.

³⁴Yesuusay be bishana bishana hardi yecha laga hargaxita e loolusso. Laga xhoozita axi garafa e gooddo. Xhoozi oone e maaqenike esa ere gisha u zeeruwanike e tucco.

³⁵Wontaso haga wonto badi e yesune Yesuusay dendi kessi koysi baa godo handi Wonto e shidho.

³⁶Simooniyara feditaaray Yesuusa worgisine u yoodo.

³⁷Esa degessi <<Axiti be uddina nemba worgiyama yesesi>> hidi uydo.

³⁸Yesuusay ususe <<Tani esume yoodosi axuse modhe odo ohese e maaqe gisha yoowayte, ohese assi fede ukke yese godita nu hammeese!>> hidi e hido.

³⁹Handi seya haya hanti Ayhuda Bhikkilo Zawaa axe erusisiniyara xhooze u garafa goodisiniyara Galila wudiyaka uddi godo e hanticha.

⁴⁰Kom'e harge keengicha bidzi adey Yesuusako yoodi e buro bocunti <<Odde, worgo'ayko ta hargiyafa taa geesheshuko[1] ne danda'e!>> hidi yeetti e shidho.

⁴¹Yesuusay higilli be kuche ansi ayti <<Wordiko ta yese, geejhuwa!>> hidi e hido.

⁴²Yenniyawo kom'e hargey dattine e geejjho. Hine ye adey loollo.

⁴³Yesuusay ye ade <<Ha esa haliya hangisine seya haya odussofuna! Handi nemba Wonto zawa kahinese beysuwa! Loolli ne geejjho gisha Muse wogana ohuttesesa kaasha uqusuwa! Ye esini axuse atoko e maaqe>> hidi minsi oti e anso.

⁴⁵Ye adey yahafa kessi axuse uddi oduse e gello. Ye micushe hantay uddi godo sinto. Ye e gisha Yesuusay addeydi aya katamani hamese dandadho baasso. Katamaame wude axi baa godo yese e ayto. Yeydi e maaddhakoni axiti aya e yese godo siidi be badena badena laddi esuko u yoocha.