Read koorete Marqoose 10 Bible Online

Marqoose 10 - koorete bible

Marqoose 10

¹Yesuusay yahafa dendi Yuuda wude yoodi Yordanose semfa e fotto. Laga axiti e da'aa assi u bhikkiluttecha. Ye usitani buro be lossoke e erusicha.

²Bidzi bidzi Farasaxiti Yesuusako yoodi esa qaxhese wordi <<Axi be macho daforosa wogana ohuttiya e yese?>> hidi u oycco.

³Yesuusani <<Musey hinuse am e otecha?>> yeydi e hido.

⁴Usini <<Musemay axi esuna be macho be dakke diizuttese ato isuse indi daforonikeko e matecha>> hidi uydo.

⁵Esini <<Musey ye woga e kessosi hi muxhuro miimete beediko.

⁶Maaqe baa burona meddhowafa ayti <Wontoy asanxaara maachiyarako e meddho.

⁷Ye esunako axi biyadiyara beyndowara dhaddi be machiyara wolla e zuqutte.

⁸Ye u lam'ini bidzi axe u maaqe> yeydi hiyoni lam'e u maaqesi atti bidzi axuko u maaqe.

⁹Ha e gisha Wontoy wol gara zuddhosa ooneni birshoffe>> yeydi e hido.

¹⁰Zawa u yoodo geede e erusichoshiti ye zeerese sekke Yesuusa u oycco.

¹¹Yesuusani <<Ooneni be macho datti fede indo ekkesi be machi gara laggetako e laggete.

¹²Yeydiwo be adesofa kessi fede ade gela'ayko ye indoni laggetako i laggetto>> yeydi e hido.

¹³Axiti nayshi giddhita Yesuusay be kuche u gara gaddi e suuzorosa esuko u oodo. Maaqe baa e erusichoshiti ye nayshe ooda gerita u gayllo.

¹⁴Yesuusani ye esa beedi huulli be erusichoshituse <<Wonto kaatetoy ha usuke yeseesituse e maaqe gisha nayshi giddhiti taako yoowuttuwaye, oossofita.

¹⁵Aadewoko hinuse ta ohe. Wonto kaatete hade yele oddheke maaddhi ekkuwasi fetto geluwasso>> yeydi e hido.

¹⁶Ye e geedeni nayshita udundi be kuche u gara gaddi e suuzzo.

¹⁷Yesuusay yahafa kessi hame e ayto. Yenniyawo bidzi axi esuko woxxhi yoodi e buro bocunti <<Modhe ta Laaxo, koolo makkina yeso degexese am hante taa e worguse?>> hidi e oycco.

¹⁸Yesuusani <<Abasuna taa modheydi neyne? Bidzi Wontowo baaka ooneni modhey baasso.

¹⁹Wonto woossita erako ne ere. Ye usini <Woddhofuna, laggettofuna, kayssofuna, zaade ateydofuna, qaarusofuna, niyadiyara neyndowara kuxuwa> yeydi hineesitako>> yeydi esuse e mato.

²⁰Ye adeni <<Ta Laaxo! Ha usita uddina ta yeletiyafa ayti kattiko ta yese>> hidi e e hido.

²¹Yesuusani e aafiya caddi beedi e eeto. <<Bidzi basuwoko ne shatese. Hanguwa, ne keengesa uddi zal'i ye ne miijhe jhi'ituse inguwa! Afaaka ellese wodunteko ne degexe. Ye e geedeni[5] yoowwa taara yesuwa!>> yeydi e hido.

²²Ye adeni ye zeere be siidosuse higilli be deemo e iisso. Laga wodunte be keengicho gisha fettona higilsine e hando.

²³Yesuusay arti beedi be erusichoshituse <<Wodumituse Wonto kaatetiya geley waydi maddhunxesani>> yeydi e hido.

²⁴E erusichoshitini e zeerdo katona u micco. Yesuusay ususe sekke mati <<Naysho![6] Wonto kaatetiya geley waydi maddhunxesani.

²⁵Wodumay Wonto kaatetiya geleesume gaaloy marfe wulaanna garesako shawukesa>> hidi e hido.

²⁶E erusichoshitini orjenawo du'eydi <<Hinne ooni loolese danda'esa?>> hidi be bidzi bidzina sekke hanke wolla uydo.

²⁷Yesuusani usuko beedi <<Ha zeerey Wontosewo baaka axuse danda'uttuwasso. Wontosema uddi basuko danda'uttesa>> yeydi e hido.

²⁸Phexhroseni beese Yesuusako <<Beewwa! Uddi base dhaddiko neera nu yoodo>> hidi e hido.

²⁹Yesuusani <<Aadewoko ta ohe. Taamiyara modhe odomiyara be zawa, beyndo na'axhita beyndo bunaycita, beyndoni, biyadeni, be nayshitani, be wootani dhagge axi uddime garesako e degexe.

³⁰Fetto ha beraaka zawitani, indo na'axheni, indo bunayceni, yella indoni, nayshitani wootani xhiixi dakkenako e degexe. Goodowara maddhaarani efako e ekke. Yoone kille sahaaka koolo makkina yesoko e degexe.

³¹Maaqe baa burosi lagiti geedese u maaqe, geedesi burose u maaqe>> yeydi e mato.

³²Yerusaleeme aange ogiyaanna kessiya u yesune Yesuusay u buro e hangicha. E erusichoshitini dhonxhidi miccine e geede hangichashitini jhassho. Assi be tamma lam'e beeko uqussi biya ellese hinesa zeere e gello.

³³<<Siwwayte! Yerusaleemeko nu hange. Yahani axi yele hidi hiyuttasi Wonto Hayla Zawa kahinituse afana maagitusaara Muse woga eruseesitusaara gardi e ingutte. E hay'oronikeni e gara u yaa'e. Yaadhi Ayhuda maaquwasituseni garsi u inge.

³⁴Usini esa dhaaddi e gara u cute, u dure, u wodhe. Maaqe baa haydzi wonte geedeko e dende>> yeydi e hido.

³⁵Zabdoose nayshi Yayqoobiyara Yohanisiyaray Yesuusako uddhi <<Nu Laaxo! Nemba nu shi'esa aba e maaqo'aykoni nuuse ne mahorosako nu worge>> yeydi u hido.

³⁶Yesuusani <<Am hinuse ta hantorosa hi worge?>> yeydi e hido.

³⁷Usini <<Nu worgesi ne kaatetowa ne kuxutteniya numba bidzo ne oshishaa bidzo ne hadursaa ne uttussoronikeko>> hidi u hido.

³⁸Yesuusani ususe <<Aba hi shi'esani eruwaytako. Tani ekke maddha usshe[7] usheshe danda'aa hi danda'e? Tani xhamaqutte maddha xhinqate xhamaquttese danda'aa hi danda'e?>> yeydi e hido.

³⁹Usini <<Eewwa! Danda'ako nu danda'e>> hidi uydo. Yesuusani <<Tani ushe maddha usshe ushoko hi ushe, tani xhamaqutte xhinqateni xhamaquttoko hi xhamaqutte.

⁴⁰Maaqe baa ta oshishaara ta hadursaara utteesiti ususe e naqutteseesitako. Ye esa ingesi taa maaquwasso>> hidi e hido.

⁴¹Fede tammi e erusichoshiti ye u zeere siidi Yayqoobe garaara Yohanise garaara u huullo.

⁴²Yesuusani be erusichoshita uddina beeko xheydi <<Ha saha gara yese axituse u afana maagako hidi hi maxeesiti axita osana u durkenikiyara anguzaxheni uso be eehenike ahenikiyara erako hi ere.

⁴³Maaqe baa hi giddaani yeydi maaddhoppe. Hinukaafa ooneni afana maaqese worgesi hinuse maraxe maaquwaye.

⁴⁴Hinukaafani ooneni angusse maaqese worgesi uddise e maala maaquwaye.

⁴⁵Beese axi yele hidi hiyuttasini e yoodosi axe maresaara be yeso garsi indi laga axe beenna wozesaarako baaka axi esa marorosa yoodo baasso>> yeydi e hido.

⁴⁶Ye e geedeni Yariko katamaaka u yoodo. Yesuusani be erusichoshitaara laga axitaara wolla Yariko katamaafa dhaddi e kesusune Xhemoose na'i Barxhemoosey aafe bal'ay miijhe shi'isine oge da'aa uttiya e yecha.

⁴⁷Yeyna garesi Nazrataxi Yesuusa e maaqesa be siido woggaaka <<Dawite yele Yesuusa! Odde, taa beyashuna!>> yeydi uwwe e ayto.

⁴⁸Laga axitini <<Mikki hiwwa!>> hidi u gayllo. Esini <<Dawite yele, odde, taa beyashuna!>> hidi hissine fettonawo garsi uwwa e lagusso.

⁴⁹Yesuusani eedhi <<Xheyguwayte!>> hidi e hido. Usini ye bal'a <<Denduwa, oseywa. Niya xheygiyako e yese!>> hidi uydo.

⁵⁰Esini be maa'o datti afaa doondi dendi Yesuusako e hando.

⁵¹Yesuusani <<Aba neese ta hantorosani ne worge?>> hidi e oycco. Ye bal'ani <<Laaxo, ta aafey beyorosako ta worge>> hidi e hido.

⁵²Yesuusani <<Yey hanguwa! Tamba ne goddosuna loolliko ne yese>> hidi e oto. Ye bal'ani yenniyawo beyese e dandadho. Yesuusaara oge hame e gello.