Read koorete Marqoose 11 Bible Online

Marqoose 11 - koorete bible

Marqoose 11

¹Yesuusay be erusichoshitaara Yerusaleeme yoodi e uddho. Zayte Bakka da'aa yese Beetefaagiyaara Biitaniyaara be ello geede be erusichoshitaafa lam'e

²<<Hi buro yese katamaa hanguwayte! Handi hi elloyna bhanqutti e hine axi e gara utto baa harre darmeko tufuttesesa yaha hi beene. Ye esa birshi oowayte!

³Ooneni <Ame hiise?> hidi hitta'ayko <Laaxuse e worgusineko, ukkenawoko hanke e anxe> hidi hiwayte>> yeydi hissine e woosso.

⁴Usini handi ye harre darme zawa sumaanna garxe ogiyaka tufutti e yesune degessi u birsho.

⁵Yaha yecha axitaafa bidzi bidziti <<Abasun hiise? Harre darme ame hi birche?>> yeydi u oycco.

⁶Usini Yesuusay beeko otechonike u oto, axitini dhaddine etti u hando.

⁷Ye harre darme Yesuusako u oodo. E shashaa be maa'o u gaddine Yesuusay e gara utto.

⁸Laga axiti be maa'o ogiya u ollicha. Fedeesitini be googefa mixi washe bursi oodi u dakkicha.

⁹E buro e geede hamiya yechashiti uddina <<Kuxay maaquwaye[8] Wontose! Laaxi sunxuna yoonesi suuzuttesesako.

¹⁰Yoone nuu yella nu ade Dawite kaatetey suuzuttesesako. Afase e wosula aallo kuxay Wontose maaquwaye>> yeydi maggana doomiya u yecha.

¹¹Yesuusani Yerusaleeme be ello woggaaka Wonto Hayla Zawa qeyshi giddaa e gello. Sekke hanke artini uddina beedi sahay qandecho gisha be erusicho tamma lam'aara yahafa kessi Biitaniya e hando.

¹²Geede wonte Biitaniyafa maaddhi u yoosune Yesuusay e naayutto.

¹³Culti washe laddese Belese sunge mixe zara beedi <<Hanno aafey e gara yeso>> hidi hissine esuko e hando. E uddhine Belesey kaxhicho agunna e maaquwadecho gisha washewo baaka abani aafe degexe e dheeddo.

¹⁴Hinne Yesuusani ye belese mixe <<Hattiyafa sekke koolo makkina ooneni ne garafa aafe kaxha muudoppe!>> hidi e hido. Yeydi e hidosani e erusichoshiti u siido.

¹⁵Yerusaleeme u yoodo. Yesuusay Wonto Hayla Zawa qeyshi giddaa gelli yaha e gawwaa zal'ichashitaara woongichashitaara goodde e ayto. Miijhe e gara gaddi u arxicho xharabheeza assi woyya zal'ichashiti e gara utticho wombariyaraysi e gufunso.

¹⁶Ooneni abani iddi Wonto Hayla Zawa karaanna[9] garuwannike e oosso.

¹⁷Usoni erusisine << <Ta zaway uddi wude axuse shi'e zawako hidiko e xheygutte> yeydi diizutto baye? Hinunimay kaysiti googgoko hi mato>> yeydi e hido.

¹⁸Wonto Hayla Zawa kahinituse afana maagitaara Muse woga eruseesitaaray ha zeere siidi Yesuusay erusosuna axi uddi du'eydine u jhassho. Ye e gisha waysi esa be baysenike oge u worgicha.

¹⁹Sahay qameseyne Yesuusaara e erusichoshitaaray katamaafa dhaddi kessi u hando.

²⁰Usini ketiya oge dhaddi u garusune ye Belese mixi be xhabhowarawo melli e yesune u beedo.

²¹Phexhroseni zinese gaxxhi Yesuusa <<Beewwa, Laaxo! Ye ne aacecho mixi melliko e yese>> yeydi e hido.

²²Yesuusani be erusichoshituse <<Wonto gobbe mahuwayte.

²³Aadewoko hinuse ta ohe, ooneni axi be muxhurowa eezzo badi be worge zeere <Maaqoko e maaqe> hidi hissine ha bakkase <Dendi bagadiyaaka unguwa> yeydi e hidako maaqoko e maaqe.

²⁴Ha e gisha hinuse ta ohesi Wonto hi zeeruse woggaa abani hi ga'eniya hi muxhurowa <Ettiko ta yese> hidi hiwayte, hi shi'esa efako hi ekke.

²⁵Afaa yese hinadey hi bayso <Attuwaye> hidi hinuse e hiyorosa hinuni Wonto shi'ese hi naqutte woggaaka axi gara hi keenge zeere dhagguwayte.

²⁶[Yeydi e maaqusune hinuni fedeesituse <Attuwaye> hidi hiye hi dheeddako afaa yese hinadey hi bayso <Attuwaye> hidi hiwasso]>> yeydi e hido.

²⁷Sekkeni Yerusaleeme u yoodo. Yesuusani Wonto Hayla Zawa karaaka sekke hanke hantiya e yesune kahinituse afana maagitini Muse woga eruseesitaara gate cimitaaray esuko uddhi

²⁸<<Ha zeerita ne hantesi an adetonana? Yeydi ne hantoronike ha adeto neese inday oonewa?>> hidi hissine u oycco.

²⁹Yesuusani <<Hine tanini hinumba bidzi oyche oycceere. Hanke taase hi matoyna tanini ha zeerita an adetona ta hantesa hinuse ta ohheere.

³⁰Yohanisey Wontoy ansiniya e xhamaqichani axi ansinena? Haaya mee, taase ohuwayte>> yeydi uso e oycco.

³¹Usini <<Hine am nu ohe?>> yeydi be bidzi bidzina wolla u zeerdo. << <Wontokofako> hidi nu hikkete <Hine ame <<Aadeko>> hidi esa efe hi dheeddo?> yeydiko e hine.

³²<Axukofako> hidiya nu hiye?>> hidi uydo. Yeydi u hiyoroome axi uddi <<Yohanisey kaayaxuko>> yeydi hicho gisha axeni u jhassho.

³³Ha e gisha <<Nuni eruwanxhiko>> hidi hissine esuse u mato. Yesuusani <<Yey, tanini an adetona ha esa ta hantesa hinuse ohuwasso>> hidi e hido.