Read koorete Marqoose 12 Bible Online

Marqoose 12 - koorete bible

Marqoose 12

¹Sekkeni Yesuusay mamakona zeere e ayto. <<Bidzi axi e yecha. Weyne zuuse totti qeysheni e googe e qeyjjho. Ye weyne zuusi aafey essa cicutte godo shuche wocci bootti e naddho. Essa yesine kafese shuchi shakka e keexxho. Ye e geedeni ye tofuttecha weyne godo miijhe efese hanteesituse u hantorosa indi zara wude dhaddi e hando.

²Weyney kaxxho woggaaka ye e kaxhaafa e ooworosa be maala hantaxiti gara e anso.

³Usini ye e maala ayti durdi kuche mela u gooddo.

⁴Ye weyne zuusaadey sekke fede be maala e anso. Hantaxitini ye e qino zaydi borsusi hanke u gooddo.

⁵Sekke assiwo fedani e anso. Ye esani u woddho. Lagitani e ansine bidzi bidzitani u durdo, feditani u woddho.

⁶Anxese attasi e eehicho e yelewoko e maaqicha. <Ha ta yelema kuxako u kuxe> hidi massi geede alsuwa be yele e anso.

⁷Maaqe baa hantaxiti be bidzi bidzina <Ha esimay e dhaalaxuko. Yoowayte, nu woddheese. E sahani nuusuko maaqe> hidi

⁸ye yeleni ayti woddhi weyne giddaafani wude kessi u datto.

⁹Hinne ye weyne tottecha adey waani e hiye? Beesewo yoodiko ye hantaxitani e wodhe. Ye weyneni fede hantaxituse e inge.

¹⁰Hine Hayla Fissharowa yeydi diizuttesesa zeerusobaytuwa? <Shuchuna keexhichashiti haassi dattecho shuchi hade boorey keexe aykenike zawa ayke shuche e maaddho.

¹¹Ha esini Wonto hantako, nu aafeseni du'usesako> yeydiko e diizutto>> yeydi e hido.

¹²Ayhuda afana maagiti Yesuusay zeerdo mamakoy ususe maaqesa erdi esa aykese wordechine laga axita jhasshi dhaddi u hando.

¹³Farasaxitafaara Herodise baditafaara bidzi bidzi geriti Yesuusa e zeerena qaxhese e gara u anxutto.

¹⁴Esuko yoodini <<Nu Laaxo, neni aadaxe maaqesa erako nu ere. <Axi am taa ohe?> hidi hissine hooddi hantuwannako. Axi aafusha beedo badiwoko fetto Wonto ogeni aadenawo ne eruse. Hine Rooma kaatuse[10] gaale worgusuwa e worguseni? Worgusuwanikeni e hido?

¹⁵Gaala nu gaaleni dhabaara nu dhabe?>> yeydi u oycco. Yesuusani u awsha erdi <<Ame taa qaxhese hi worge? Mee, miijhiyafa bidzo oodi taa beysuwayte!>> yeydi e hido.

¹⁶Miijheni u oodo. Esini ususe <<Ha miijhe gara yese bishaara diizuttese sunxaaray oonesuni?>> yeydi e oycine <<Rooma kaatusuko>> hidi uydo.

¹⁷Yesuusani <<Hine Rooma kaatuse maaqesa Rooma kaatuse, Wontose maaqesa Wontose inguwayte>> yeydi e hinne hanke e matosuna u micco.

¹⁸Ye e geedeni <<Haydhasiti denduwasso>> yeydi hicha Sodoqaxiti Yesuusako uddhi bidzi zeere oyce u gello.

¹⁹<<Laaxo! Musey nuuse diizzi indo wogaafa bidzi wogako yecha. Ye esini <Bidzi axi macho etti yello badi e hay'o'ayketese esindo na'i ye indo dhaalli i gara yelli haydhasuse dhaalaxe garxeko e worguse> yeydi hinesako e maaqicha.

²⁰Hine bidzi indo na'axhiti laappi yecha. U angusse maaqichashini macho etti yello badi e haydho.

²¹Lakkunxo esindo na'ini ye indowo dhaalli yello badi baado. Hayssoni yeydiwo maaddho.

²²Ye e bishana laappi na'axhey iso dhaalli yello badesinewo baado. Ye u geedeni ye indoy baado.

²³Ye laappini be uddina yeysiwo iso ettecho gisha haydhasiti dende woggaaka a'esusuna macho i maaqe?>> hidi u oycco.

²⁴Ususe Yesuusay <<Hinuni yeydi hi halesi Hayla Fissharoy ohesaara Wonto osaara ere dheebena maaquwaye?

²⁵Haydhechashiti dendisine afaa yese Wonto woosaxituke u maaqesa baaka efuttuwasso geluttuwasso.

²⁶Haydhasiti dendese e maaddhako Wontoy Musese eexhiya yecha mixi dhushaaka ye tamaanna e zeerdonike Muse fissharowafa zeerusobaytuwa? Wontoy esuse <Tani Abrahaame Wonto, Yissaaqe Wonto, Yayqoobe Wontoko> yeydiko e hido.

²⁷Wontoy yeso keengeesiti Wontoko baaka yeso keenguwasiti Wonto maaquwasso. Hinuni iitana halako hi hale>> yeydi hissine e mato.

²⁸Muse woga eruseesitaafa bidzi yoodi wolla zeere u bersesa siidi Yesuusay modhussi hanke matosa e gaxxho. Yesuusako uddhini <<Uddi basume angussi woossoy a'esana?>> yeydi e oycco.

²⁹Yesuusani <<Uddime gare woossoy <Isra'eele gerito, siwwayte! Nu Laaxi nu Wontoy e goshewoko Wontoy.

³⁰Ne Laaxe ne Wonto fetto ne muxhurona, fetto ne lubbona, fetto ne maxona, fetto ne osanani eehuwa!> yeydi hinesako.

³¹Lakkunxo woossoni <Fede axe uddina niya ne eehenikeysi eehuwa!> yeydi hinesako. Ye u lam'e gare fede woossoy baasso>> yeydi e hido.

³²Ye Muse woga erusesini <<Laaxo, modheko ne zeerdo. <Wontoy bidziko, esa baaka fede Wontoy baasso> yeydi ne zeerdoy aadeko.

³³Axi fetto be muxhurona, fetto be maxona, fetto be osanani Wonto eeheko e worguse. Yeydiwo fede axeni uddina beenkeysi eeheko e worguse. Meggutte kaashaara fede kaashaara uddi Wontose uquseme ha lam'i woosso kafeko garesa>> yeydi e hido.

³⁴Ye Muse woga erusesini eranaara gaxunaara hanke zeere matosa Yesuusay haysi <<Neni Wonto kaatetiyafa zardesesa maaquwannako>> yeydi e hido. Sekke ye e geede Yesuusa gara oyche uqusese naassay baasso.

³⁵Yesuusay Wonto Hayla Zawaa erusisine <<Muse woga eruseesiti <Mesihey Dawite yeleko> hidi ame uyne?

³⁶Dawitey beese Ayaana Geeshuna durkutti <Wontoy ta Laaxuse <<Ne iilaxita iisshi ne adeto oomo ta mahoro aallo ta oshishaa uttuwa!>> hidiko e hido> yeydiko Dawitey hido.

³⁷Dawitey beese Laaxo yeydi xheygusune hine esi Dawitese waydini e yele e maaqe?>> yeydi e oycco. Yenniyakani axiti orje maggana u siicha.

³⁸Yesuusay erusisine <<Galala maa'o maadhi sekke hanke arti gadhesani axi ususe kuxa sawo ingorosa eehe Muse woga eruseesiti garafa hinumba kakkuwayte.

³⁹Usini Bhikkilo Zawaani hayyaxhey utticho godowa uttesuko u worge, massalaaka kuxa godowoko u eehe.

⁴⁰Bentese hissine galalsi u shi'e. Ye esa goyndi u adey baadese indowaxhiti zawa u bonqe. Ha e gisha gardese yaa'ako u gara yaa'uttesa>> yeydi e hido.

⁴¹Yesuusay Wontose ingutticha miijhey essa dafutticho saaxhine burowa handi e utto. Laga axitini ye saaxhiniya miijhe u dakkusune beya e yecha. Laga wodumitini laga miijhe dafiya u yecha.

⁴²Bidzi i adey baadese indo jhi'oy bidzi saante ellesa lam'i laakaafa hantuttese miijhe i ollo.

⁴³Yesuusani be erusichoshita beeko xheydi <<Aadewoko hinuse ta ohe. Ha saaxhiniya miijhe olleesitume uddime garsi indanni ha i adey baadese jhi'o maaqe indoko.

⁴⁴Ye esini fedeesiti uddi u indosi be keengicho woduntiyafa gardasuko. Isimay jhi'o maaqisine beese shato badi be keengichosha uddiko i ollo>> yeydi e hido.