Read koorete Marqoose 13 Bible Online

Marqoose 13 - koorete bible

Marqoose 13

¹Yesuusay Wonto Hayla Zawaafa kesusune e erusichoshitaafa bidzi <<Laaxo, ha shuchi zawa miimete beyashuna? Waydese malla shuchuna e keexhuttosa>> yeydi e hido.

²Esini <<Ha shuchi zawa mallete beeduwa? Shuchi shuchi gara naqutti be yesenike yesuwasso. Ha shuchi uddinawoko e wodde>> hidi e mato.

³Yesuusay Wonto Hayla Zawa semfa yese Zayte Bakka gara uttusune Phexhrosey, Yayqoobey, Yohanisiyara Indiraasiyaray be goshe esuko yoodi

⁴<<Hatte ne zeerdosi maaqesi aydena? Ha esi uddi maaqese uqusune yeragoy amuna? Odde, nuuse ohasshuna?>> hidi hissine u oycco.

⁵Yesuusani <<Ooneni hinumba qaarusoppe hinumba kakkuwayte!

⁶<Tani Kristosako> hidi hissine lagiti ta sunxuna u yoone, lagitani u qaaruse.

⁷Hi ukke tooray dendusune fakkiyani toora odo siisine jhasshi du'eydofita. Yeenxhi maaqese fettonako e worguse. Yeydi e maaddhakoni aalliciray yenniya maaquwasso.

⁸Bidzi wudey fede wude gara kaatini kaati gara toora e denxe. Seya haya sahay en'e. Yeydiwo naayeni e maaqe. Haanxhi maddhay hade haga ayke zersoke yesesako.

⁹Hinunini hinumba naddhi kakkuwayte. Axiti hinumba yaa'asuko garsi u inge, Ayhuda Bhikkilo Zawaakani hinumba u dure. Taanna hi yese gisha afana maagitusaara kaataxhe buruwakaara yaa'uttese hi uqe. Yenniyakani ta gisha ato maaddhi uso hi siise.

¹⁰Yeenxhi uddi maaqorosume buro modhe odoy be wude wude yese axuse uddi elleko e worguse.

¹¹Axiti hi gara yaa'ese ayti hinumba u uqususune <Am nu zeerre?> hissine burona maddhundofita. Yenniyakani Wonto garafa hi siinenike zeeruwayte. Ye esani zeeresi hinumba e maaddhobaane Ayaana Geeshuko.

¹²Indo na'i beyndo na'e, adeni be yele e hay'orosa garsi e inge. Nayshiti biya yellasiti gara dendi iilli u wodhuse.

¹³Ta gisha axi uddina hinumba iitana u inxha'e. Maaqe baa danda'ona aallicira aallo miingesa Wontoy esa maarako e maare.

¹⁴Ha esani zeerusesi eruwaye! [Kaayaxi Dan'eelena e zeeruttonike] maaqese bishuwa godo dhohusesa darrise abako hi beeneniya yenniya Yuuda wude yeseesiti bakkita achuntuwaye.

¹⁵Shuchi keexi qinowa yese godo yeseesiti zawa hodhi zawaafa abako efese zawa gelloppe.

¹⁶Woota yesesini maa'o efese be zawa maaddhoppe.

¹⁷Ye woggaa gawwaara yeseesitusaara dhanxe dhamuseesitusaara uso baduffu!

¹⁸Ha esini bargo e maaqeeme shi'uwayte.

¹⁹Esume hi shi'esini ye woggaaka Wontoy afani sahani meddhossaafa ayti hatte makko benti eruwa maddhaara waayyaarako maaqesa. Buro garani ye esa bishe maddhaara waayyaaray yoowasso.

²⁰Wontoy ye wontita hatuse e dheeddesesakoma ooneni maaruttese danda'uwadiko yecha. Xharutta geritume hissineko ye wontita e hatuse.

²¹Assi ooneni <Wiy, Mesihey hay hayako e yese> yeydiwo <Beewwa! Sey seyako e yese> yeydi e hidako <Aadeko> hidi hidofita.

²²Mesihe maaquwasiti <Tani Mesiheko> kaayaxe maaquwasitini <Tani kaayaxuko> hidi hissineko zaadaxiti yoodi Wontoy xhardechoshita danda'a'ayko haluxese micushe abakowara du'use abakowara u hante.

²³Hay, ha maaqara zeereme burussi uddi zeerdiko ta yese. Hinumba naddhi kakkuwayte.

²⁴Yenniyaka maddhay ello geede qoossi e ceenge, agunnani be fo'e beysuwasso.

²⁵Xhoolintitini afaafa u gukke, afaa yese ositini iitana u en'e.

²⁶Ye e geede axi yele hidi hiyuttasi orje adeto ayti orje kuxa fuulana dhumaanna e yoosune axiti u beene.

²⁷Esini Wonto woosaxita anxe, oyddi badena handi saha wosulaafa afa wosula aallo benteesita esuse xharuttese axitani u bhikkile.

²⁸Belese sunge mixi garafa bidzi abako eruwayte. Be hange gara e cultusune e washey dice ayti e jhiletto geede atoy uddhosako hi ere.

²⁹Yeenkewo ha esi maaqesa hi beesune axi yele hidi hiyuttasi yoowey e uddhonike eruwayte, fetto sumaa elliko e yese yeydi hiyoko.

³⁰Aadeko hinuse ta ohe, ha yeluttey gareesume buro haanxhi uddiko e aale.

³¹Afani sahani baattako u baane. Ta katomay miindi koolo makkinako e yese.

³²Ye wontaara ye saatiyara ayde e maaqenike adewo baaka ooneni eresi baasso. Wonto woosaxitani maaqqe e yeleni eruwasso.

³³Hinuni ye wontay ayde maaqesa eruwaytako, hinumba naddhi kakkuwayte. Oseywayte.

³⁴Ye esini bisheshi zara wude soofa handa adeko. Esini be zawa maalita e bidzi bidzina shahuttese hanta gara gaddi kakkesani miindi e kaforonike oti e hando.

³⁵Ha e gisha hinumba naddhi kakkuwayte. Ye zawaadey yoone wonte eruwaytako. Yoowese e danda'esi hanno qamana, ekke wodhakka, lukkali oollusune oo'oyne ketiya sho'e yoowesuko e danda'e.

³⁶Hi masso baane yoodi geti hi yesune hinumba degessoffe!

³⁷Hinuse ta zeerdonike fedeesituseni uddi oseydi kakkuwayte hidiko ta hine>> yeydi e hido.