Read koorete Marqoose 14 Bible Online

Marqoose 14 - koorete bible

Marqoose 14

¹Garo Massalaara Helto Boora massalaara kuxese yenniya lam'i wontay attecha. Kahinituse afana maagitaara Muse woga eruseesitaaray Yesuusa aachiyaanna waysi ayti be wodhenike u worgicha.

²Maaqe baa <<Axiti koyse densoffe massala wonte mahuwanxhiko>> hidi u kundo.

³Yesuusay Biitaniya katamaa kom'e harge keengicha Simooneso e yecha. Tato gara e yesune bidzi indoy e woomay orje maaqesa feday essa worqutto baasa geeshi Nardosewo shittoy essa kundese Albasxhirosiyafa hantuttese bilqaaxhe etti i yoodo. Bilqaaxhe qino meyssi ye shitto Yesuusa qinowaka i gusso.

⁴Yaha yechashitaafa bidzi bidziti ye esa beedi huulli <<Ha shittoy mikke baadosi abasuna?

⁵Kumana taafutte laga miijheshe[11] zal'utti jhi'ituse miijhe ingashoosha?>> yeydi hissine ye indo u gayllo.

⁶Yesuusani <<Dhagguwayte! Ame iso hi maddhunxe? Taase fetto modheko i hanto.

⁷Jhi'iti uddi wogga hinunaarako u yese. Hi eehenikeko uso marese hi danda'e. Tanimay hinunaara uddi wogga haya yesuwasso.

⁸Ha indoy be dandadhosa hanti shittona tamba tisshiko taa mooggese burona i naddho.

⁹Aadeko hinuse ta ohe, ha modhe odoy ha saha gara uddi ohutte godowa ha i hantosuna axi iso massiko u zeere>> yeydi e hido.

¹⁰Tamma lam'ukaafa bidzi Asqorotaxi Yuuday Yesuusa aykusese kahinituse afana maagiti gara kumese e hando.

¹¹Usini e zeerdosa siidi maddo. E aykusoro gisha miijhe ingese esaara u kundo. Yuuday yenniyafa ayti Yesuusa aykusese bishe wogga worgiya e yecha.

¹²Garo Massalase dori shufutte wonte e erusichoshiti Yesuusako uddhi <<Garo Massala qamete ne miyorosa ay handi nu naqorosa ne worge?>> yeydi hissine u oycco. Ye esini Helto Boora Massalase buro wonteko e maaqicha.

¹³Yesuusani be erusichoshitaafa lam'e <<Katamaaka hanguwayte. Waaxi ota iddese bidzi adiyarako hi muhe. E geede hanguwayte.

¹⁴E gele zawani handi ye zawaadese <Laaxi <<Ta erusichoshitaara Garo Massala qamete ta muune zaway ayana?>> hidiko e hine> hidi hiwayte.

¹⁵Esini afaa fooqiya worguse abakoy uddi kundi naqutti essa yese orje zawako hinuse e beyse. Yaha nuuse naquwayte>> yeydi hissine e anso.

¹⁶Ye lam'i e erusichoshiti yahafa kessi katamaa u hando. Hade Yesuusay otonike u degesso. Yahani Garo Massala qamete u naddho.

¹⁷Sahay qandine Yesuusay be erusicho tamma lam'aara e yoodo.

¹⁸Tatowani utti u muusune Yesuusay <<Aadeko hinuse ta ohe. Taara qamete miya yese hinukaafa bidzi garsiko taa e inge>> hidi e hido.

¹⁹Usini e zeerdosuna higilli <<Tamba neyneni?>> hidi hissine be badena badena u oycco.

²⁰Yesuusani <<Ye axi hi tamma lam'ukaafa bidziko, wolkoko ha bidzi sanqiya anxiya ni yese.

²¹Axi yele hidi hiyuttasi e gisha e diizuttonikema hay'oko e hay'e. Maaqe baaka ye axi yele garsi inge axe baduffu! Ye axi yelutte dheeddesako esuse bishako e bishaane>> yeydi e hido.

²²Miya u yesune Yesuusay boora densi Wonto galatti ye boora meyssi ususe <<Hii'eyte, ha esi ta garako[12]>> hidi hissine e indo.

²³Sekkeni assi essaafa ushushoosha densi Wonto galatti e indo. Ye usshaafani be uddina u ussho.

²⁴<<Ha esi Wonto caaqoy esuna ee'e lagituse gukke ta suuxuko.

²⁵Aadewoko hinuse ta ohe, Wonto kaatetiya weyne daana sekke kille mati ta ushoro wonte aallo ha weyne usshaafa sekke ushuwassho>> yeydi e hido.

²⁶Ye e geede zingale zingalli kessi Zayte Bakka gara dhaddi u hando.

²⁷Yesuusani be erusichoshituse << <Yeengichashe ta oxhe, doriti budutte> yeydi e diizuttesenike hi uddinani <Nuni esa eruwanxhiko> hidi taa hi dhagge.

²⁸Maaqe baa haybowafa ta dendosi geede hinume buroko dhaddi Galila ta gare>> yeydi e hido.

²⁹Phexhroseni <<Fedeesiti niya dhaddakoni tani niya dhagguwasso>> yeydi e hido.

³⁰Yesuusani <<Aadewoko neese ta ohe, fetto ha qamaa lukkali lam'i wogga e oollobaaneko haydzi wogga <Tani esa eruwasso> yeydi neyne>> hidi e hido.

³¹Phexhroseni <<Hay'e e worgusakoni neera ta hay'esa baaka niya dhagguwaso>> hidi minsi e zeerdo. Fede e erusichoshitini yeydiwo hiya u yecha.

³²Ye e geede Getesemaaneydi hiyutte mixi tofutte godo u hando. Yesuusay be erusichoshita <<Tani seya Wonto shi'usune hinuni haya uttuwayte>> hidi e hido.

³³Phexhroseni, Yayqoobeni Yohaniseni beera etti sekke e gardo. Yahani higilliyara maddhumiyara e ayto.

³⁴<< <Haydhusso> hidi tayoro aallo ta muxhuroy iitanako e maddhundese. Hinuni haya decuwayte, miindi kakkuwayte>> yeydi e hido.

³⁵U garafa sekke shidhi be deemona sahaa caddi e danda'uttako ha maddha woggay bemba e elluwannike e shidho.

³⁶<<Nuwadde, abbayo! Uddi basuko neese danda'uttesa, ha maddha usshe[13] ta garafa ooxuwa! Ye esini ne maxoke baaka ta maxoke maaddhoppe>> yeydi e shidho.

³⁷Be erusicho haydzi gerituko maaddhi yoodi geti u yesune beedi Phexhrosese <<Doo, Simoone, gehiyaka ne yese? Bidzi saatiyani birti kafese danda'uwanuwa?

³⁸Naa'owa gelli hi unguwannike oseywayte, shi'uwayte. Axi be maxona naquttoko naqutte, achomay gafaxuko>> yeydi e hido.

³⁹Assi sekke handi ye burokewo e shidho.

⁴⁰Hankeni maaddhi e yoodo woggaaka dossey iitana uso aytecho gisha geti u yesune e beedo. Hanke esuko aba be zeeresani eruwadiko u yecha.

⁴¹Haysso woggaakani usuko yoodi <<Haha'e! Yenawa hatte aallo gehiya hi yese? Hi kaxe efiya hi yese? Yoonase dhagguwayte, woggay ellosso. Hay axi yele hidi hiyuttasi cubbaxiti kuchiyaka gardiko e ingutte.

⁴²Denduwayte, nu hammeese. Garsi taa ingesi hay yoodiko e yese>> yeydi e hido.

⁴³Yenniyawo Yesuusay haga zeeriya e yesune e erusicho tamma lam'ukaafa maaqe Yuuday yoodo. Kahinituse afana maagiti, Muse woga eruseesiti, cimitaafaraydi anxutti satataara bikkaara aytese laga axiti esaara u yoodo.

⁴⁴Garsi inge axi aykarasituse <<Hi aykorosi ta muuxhe axuko. Ye esa ayti oseydi aanguwayte!>> yeydi yerago e otecha.

⁴⁵Yuudani Yesuusay yecho godo yoodi ukkenawo esuko uddhi <<Ta Laaxo>> yeydi hissine esa e muuxxho.

⁴⁶Ye e geede axiti Yesuusa gara gutti ayti etti u hando.

⁴⁷Yesuusaara yaha yechashaafay satata kessi kahinituse afana ade maala washe e burso.

⁴⁸Yesuusani <<Hade fuulo aykesukiya satataara bikkaara etti taa aykese hi yoodo?

⁴⁹Wontana wontana Wonto Hayla Zawaa erusiya hinukaaka ta yesune aydena taa hi aytecha? Ha esi maaddhosi Hayla Fissharowa ohuttecha kaayo katoy aalorosako>> yeydi e hido.

⁵⁰E erusichoshitini be uddinawo datti u badho.

⁵¹Naxhalawo maadhi yese bidzi saabbay Yesuusaara e yecha. Axiti esa aytine

⁵²be naxhala datti gunduse dhaddi u kuchiyafa e tulxho.

⁵³Ye e geede Yesuusa kahinituse afana adeso u aando. Yahani kahinituse afana maagitaara gate cimitaara Muse woga eruseesitaaray bhikkilutto.

⁵⁴Phexhroseni zarana Yesuusa geede geedeydi e hangicha. Kahinituse afana adeso kara aallo fetto e ello. Ye zawaade hantaxitaara utti tamaa e kashicha.

⁵⁵Wonto zawa kahinituse afana maagitaara Ayhuda gate aheesitaaray be uddina haybo yaa'a Yesuusa gara yaa'ese ato wordi degexe u dheeddo.

⁵⁶Laga axitini zaade e gara zeeriya u yecha, u nuunay wola efe e dheeddo.

⁵⁷Bidzi bidzitini dendi << <Tani ha axi kuchena keexhutta Wonto Hayla Zawa woddussiko haydzi wonte gidda axi be kuchena keexxho baasa feda ta keexhe> yeydi e zeerusune siidiko nu yese>> yeydi hissine zaade e gara u zeerdo.

⁵⁸

⁵⁹Ye e gara u nuunay wola etto badi e atto.

⁶⁰Wonto zawa kahinituse afana adey u gidda dendi <<Ame hanke ne mahuwaane? Ha geriti niya luuke luufoy amuna?>> hidi Yesuusa e oycco.

⁶¹Esini mikki hido. Bidzoni hanke zeere e dheeddo. Ye kahinituse afana adey <<Kuxuttese Wonto yeley Mesihey nembaa?>> yeydi sekke e oycco.

⁶²<<Eewwa, tambako. Axi yele hidi hiyuttasi osaxi Wonto oshishaa e uttusuniyara afa dhumaanna e yoosuniyarako hi beene>> yeydi e hido.

⁶³Kahinituse afana adeni huulana be maa'o feeddhi <<Aba atoni feda e gara e worguse?

⁶⁴Hay Wonto yeysi e cashesha siidiko hi yese. Hine am hi ohe?>> hidi e hido. Be uddina bidzinawo <<Hay'eko esuse bishesha>> yeydi u yaadho.

⁶⁵Bidzi bidzitini cuche e gara cute u ayto. E aafeni fasshi <<Kaayaxe maaqo'ayko, mee ooni niya oxxha ohuwa!>> hidi hissine gumarena u icicha. Yebiti baqisine beeko u etto.

⁶⁶Phexhrosey ye zawa karaa oomo bade e yesune ye kahinituse afana ade maakitaafa bidzi yoodi

⁶⁷Phexhrosey tamaa kashushune modhussi e aafiya caddi beedi <<Doo, neni Nazrataxi Yesuusaarako ne yecha>> hidi iido.

⁶⁸Phexhroseni <<Ne ohesi taase geluwasso, abani ne zeeresa tani eruwasso>> hidi hissine zaaddi yahafa dhaddi qeyshi sumaa kesese e hisune lukkali oollo.

⁶⁹Ye maakini esa beedi sekkewo assi yaha ee'ichashituse <<Ha esini ussaafako>> hidi hissine ohe i ayto.

⁷⁰Esini sekkewo mati <<Ussaafa maaquwasso>> hidi hissine e aacunto. Oddhe wogga geede yaha ee'ichashiti <<Galila axe ne maaqe gisha aadewo, neni u badeko>> yeydi u hido.

⁷¹Phexhroseni <<Ha hi ohe axe eruwasso>> hidi hissine biya aaciyara caaqiyara e ayto.

⁷²Yenniyawo lukkali lakko e oollo. Esini <<Lukkali lam'i wogga oollo baaneko haydzi wogga <Tani esa eruwasso> yeydi neyne>> hidi Yesuusay hidechosha gaxxhi e gawwo e muune iitana e yeetto.