Read koorete Marqoose 15 Bible Online

Marqoose 15 - koorete bible

Marqoose 15

¹Ketiya sho'e Wonto kahinituse afana maagiti gate cimitaara Muse woga eruseesitaaray ye Ayhuda gate aheesiti be uddina bhikkilutti wolla u kundo. Ye e geedeni Yesuusa tutti etti handi Philaxhosese garsi u indo.

²Philaxhosey <<Neni Ayhuda kaatuwa?>> hidi e oycco. Yesuusay <<Hidiko ne yese>> hidi hido.

³Kahinituse afana maagiti Yesuusa laga zeerena u luukicha.

⁴Philaxhosey <<Haanxhi zeerena niya u luukesa beewwa! Fetto hanke ne mahe basi baye?>> yeydi hissine sekke e oycco.

⁵Philaxhosey micoro makko Yesuusay bidzoni hanke mahe e dheeddo.

⁶Philaxhosey uddi bera aallo Garo Massala woggaaka u oyce bidzi tufaxe e dakkicha.

⁷Yenniyawo kaati gara dendi axita wodhena tufe zawa gellecha birraxiti u yecha. Ye tufuttechashiti gidda Barbaane sunge axi e yecha.

⁸Yaha yecha axiti Philaxhosey be lossechonike tufaxe birshi e daforosa e buro uddhi u oycco.

⁹Philaxhoseni <<Ha Ayhuda kaate birshi ta daforosa eeha hi eehe?>> hidi e oycco.

¹⁰Yeydini e oyccoshi kahinituse afana maagiti Yesuusa dhiiddhi garsi u indechosa be ericho gishako.

¹¹Kahinituse afana maagiti <<Yesuusay birchuttoffe, Barbaaney birchuttuwaye!>> hidi hissine Philaxhose u oycoronike axe u suqusicha.

¹²Philaxhoseni <<Hine ha Ayhuda kaateydi hiinesa waani tayse?>> yeydi e oycco.

¹³Usini assiwo be kato keddaysi bidzi nuunana <<Suxhuwa! Suxhuwa!>> hidi u hido.

¹⁴Philaxhoseni <<Amuna? E hanto baysoy abana?>> yeydi e oycco. Usini <<Suxhuwa! Suxhuwa!>> hidi sekke bidzi nuunana mati mati u hido.

¹⁵Philaxhoseni axita maggusese ususe Barbaane birshi datti Yesuusani be durusosi geede u suxhoronike e indo.

¹⁶Kaati tooraxitini Yesuusa ye wude ahichashi qeyshi giddaaka aandi beekafa attecha tooraxitani uddi u xheydo.

¹⁷Zo'o maa'o u mayso. Anke xhaaxhi naddhi e qinowa gaddi

¹⁸<<Ayhuda kaato, modhetey neese maaquwaye!>> hidi kuxa sawo bishesha u sawusso.

¹⁹Kallona e qinowa oxhisine be cuche e gara u cuticha. Qozoozisine e buro bocunti u akkiricha.

²⁰Esa be dhaadosi geede ye zo'o maa'o e garafa shoddi etti e maa'o maysi suxhese etti u hando.

²¹Qarana wude axe maaqicha Simooney wudefa katamaa gelisine usaara e muto. Esini Iskindiresaara Rufosesaara usadeko e maaqicha. Yesuusay e gara suxhutte mixe osana u iddusso.

²²Ye e geedeni Yesuusa Golgota hidi hiyutte godo u aando. E birchey qine qooce hidi hiyoko.

²³Yaha be ello geede karawaara worquttese weyne daana e ushorosa u indo. Esini ushe e inxhadho.

²⁴Ye e geedeni esa u suxxho. E maa'itani ooni ooneni e elle hissine hixha olli u shato.

²⁵Yesuusa u suxxhosi ketiya haydzi saatenako e maaqicha.

²⁶Esuna esa be luuttosa <<Ayhuda kaate>> hidi hiinesa diizzi addaa u gaddo.

²⁷Lam'i fuulita oodi Yesuusase bidzo e oshishaa bidzo e hadursaa u suxxho.

²⁸[Ye esunani <<Iita hanteesitaara wolko e taafutto>> yeydi hine kaayo katoy aallo.]

²⁹E da'aanna garya yecha axiti esa haassi be qino en'usisine <<Haaya mee, neni Wonto Hayla Zawa woddussi haydzi wontena keexhesi!

³⁰Mee, sussaafa hodhi nemba maaruwa!>> yeydi u dhaaddicha.

³¹Kahinituse afana maagitaara Muse woga eruseesitaaray yeydiwo <<Fedeesitako e maardo, biya maarese danda'uwasso.

³²Esi Mesihey Isra'eele kaate maaqo'ayko haaya sussaafa hodhwaye! Nunini beedi esa nu aadexxoose>> hidi sekke hanke dhaadiya u yecha. Esaara suxhuttecha fuulitini yeydiwo cashiya u yecha.

³³Ye wonte sahay izzuppi saatiyafa ayti odduppi saate aallo kumena e ceendo.

³⁴Odduppi saatena Yesuusay be kato keddaysi <<Elohe! Elohe! Laama sabaqitaanii?>> hidi e hido. E bircheni <<Ta Wonto! Ta Wonto! Ame taa ne dhaddo?>> yeydi hiyoko.

³⁵Yaha ee'iya yecha bidzi bidzi geriti <<Mee siwwayte, kaayaxi Elaaseko e xheyge>> yeydi u hido.

³⁶Ussaafa bidzi woxxhi handi hade huxha bissheshesha etti dhoodhese usshaaka gelsi e xhunxhorosa shomboqo qinowa gaddi e uqusso. <<Hagako mee! Elaasey yoodi esa hoxusune nu beyyeese!>> yeydi e hido.

³⁷Ye e geede Yesuusay keddaysi uydi e haydho.

³⁸Wonto Hayla Zawaaka hade gilbakeysi fasshecha maa'oy be qinowafa ayti toke aallo feedhutti lam'e e kesso.

³⁹Yesuusay suxhuttosi buro ee'icha xhiixi gara afana maagay Yesuusay waa waydi haydhosa beedi <<Ha axi aadewo Wonto yeleko e maaqicha>> yeydi e hido.

⁴⁰Bidzi bidzi indowaxhitini zara eedhi u beecha. Ussaafa Magdoolaxhi Maaramey, barsi Yayqoobiyara[14] Yoosaara yella Maaramey, Salomey yaha u yecha.

⁴¹Usini Yesuusay Galila yechoniya esaara hamiyakaara mariyakaara yechashitako. Yeydiwo Yesuusaara Yerusaleeme yoodecha fede laga indowaxhitini u yecha.

⁴²Sahay qamese e hisune Armatiyase katamaxi Yoosefey e yoodo. Esini Ayhuda gate aheesitaafa maaqisine kuxuttese axe e maaqicha. Beese Wonto kaatete gobbisine e kakkicha. Ye wontey sanbatase u naqutticho wonte ye sanbatame buro wonte e maaqicho gisha Yoosefey gaggo melli Philaxhoseko gelli Yesuusa aha e ingorosa e oycco.

⁴³

⁴⁴Philaxhoseni <<Aydeniyaw e haydho?>> yeydi e micco. Xhiixi gara afana maaga xheygussi <<Aadewo haydhi decciya e yese?>> yeydi e oycco.

⁴⁵Yesuusay haydhosa esukofa naddhi be siido geede Yoosefeko <<Ye aha handi ekkuwa>> yeydi e hido.

⁴⁶Yoosefeni achushe talbaafa meddhuttase kille maa'o woondi suxi mixi garafa hossi esuna e acco. Aandi axi wocci bootti naddhese bookuttese shushaaka gelsi aha e woyso. Shuchi malla andarsi oodi ye boossa suma e tucco.

⁴⁷Magdoolaxhi Maaramiyara Yoosayndo Maaramiyaray Yesuusa an godo u mooddosa beya u yecha.