Read koorete Marqoose 16 Bible Online

Marqoose 16 - koorete bible

Marqoose 16

¹Sanbata wontey gardine Magdoolaxhi Maaramey, Yayqoobeyndo Maaramey, Salomeni maaddhi Yesuusa aha tisheshe modhe sawwe abako u woondo.

²Hude wonte ketiya qoossi kesiyara boossaaka u hando.

³Usini ye boossa suma tuccecha shuchi u danda'uwa malla maaqicho gisha <<Boossa sumaafa shuche ooni nuuse andarsi ooxara?>> yeydi wolla zeerisine u hangicha. Hangisine kololli u beesune boossa sumaaka yecha shuchi bidzi bade andardi yesune u beedo.

⁵Boossaaka u gelusune bidzi na'i saabbay booxi maa'o maadhesesi oshichi badena uttusune beedi u du'eydo.

⁶Esini <<Du'eydofita! Suxhuttecha Nazrataxi Yesuusa hi worgesa erako ta ere. Dendiko e yese, haya baasso. Hay, aha u woysecho godo beewayte.

⁷Hatte dhaddi hanguwayte! E erusichoshituko Phexhroseseni <Hade be otechonikeko Galila dhaddi hi buro e gare. Yahako esa hi beene> hidi ohuwayte!>> yeydi e hido.

⁸Indowaxhitini iitana jhasshi koburdi boossaafa kessi u badho. Fettona be jhashecho gisha oonekoni bidzoni zeerutto baasso.

⁹Yesuusay Hude ketiya haybowafa be dendo geede laappi xhoozita i garafa be gooddecho Magdoolaxhi Maaramese burona e bento.

¹⁰Isini handi esaara yecha gerituse i oto. Usini higiliyakaara yeefiyakaara u yecha.

¹¹Isini <<Yesuusay haybowafa dendiko en'a e yese. Ta aafenako ta beedo>> yeydi i oto. Usini isuse aade mahutto baasso.

¹²Ye e geedeni e erusichoshaafa lam'i wolko katamaafa are u hangusune Yesuusay feda bisshi e bento.

¹³Usini hanke maaddhi attasituko oto. Ye usituseni aade mahutto baasso.

¹⁴Ye e geede e erusicho tamma bidzi tato gara yesune Yesuusay ususe addeydi e bento. Esini ususe <<Ta dendo geede taa beeda axi otine <Aadeko> hidi hidobayta? Waydi <Aadeko> hidi hiiwaane? Yeydi fetto muxhuro hi miingesi abasuwa?>> yeydi e gayllo.

¹⁵Yesuusay assi ususe <<Ha saha gara uddi hanguwayte, axuseni uddina modhe odo ohuwayte!

¹⁶Aadessi xhamaqutti yesesi ooneni loolako e loole. Aadesso baasi garama yaa'uttoko e yaa'utte.

¹⁷Taanna aadexeesiti ta sunxuna xhooze u goodde, kille nuunanani u zeere, shooshita u aytakoni oo'oyne fetto wodhe dhale u usshakoni uso wodhuwasso. Be kucheni hargaxiti gara u gade, hargaxitini loole, yeenxhi micushe hanta u hante>> yeydi e hido.

¹⁹Laaxi Yesuusay yeenxho uddi usuko be zeerdo geede afaaka kessi Wontose oshichi badena e utto.

²⁰E erusichoshiti uddi wude seya haya hanti Wonto woosso u ohicha. Laaxini usaara hantena micushe hanta u hantoronike mati be woossoy aade maaqenike e minxicha.]