Read koorete Marqoose 2 Bible Online

Marqoose 2 - koorete bible

Marqoose 2

¹Oddhe wogga geede Yesuusay Qifirnahoome katamaa hanke e yoodo. <<Zawaako e yese>> yeydi hiyutte odoy e sinto.

²Ye zaway kundi karay xhuumoro aallo axi bhikkilutto. Wonto kato ususe e ohicha.

³Yenniyakawo bidzi beenna hantese danda'uwa e tokey docceshe axe oyddi geriti iddi Yesuusako u oodo.

⁴Axi sumaaka laddecho gisha esuko uqusey uso iisshine keexi gara kessi Yesuusay yecho addaanna keexe jhaadhi ye hargaxe e gara be woysechoshuna e buro u hosso.

⁵Yesuusani ye e tokey doccechoshushaara ye oyddi geri aadexowara erdi ye e tokey doccesheeshushe <<Ta yelle, <Ne cubboy attuwaye> hidi hiyuttiko yese>> hidi e hido.

⁶Bidzi bidzi Muse woga eruseesiti yaha uttiya yechine be muxhurowanna

⁷<<Ha axi abasuna yeydi e hido? Yeydi hiyey Wonto cashema! Wonto bidzo baaka cubbo <Attuwaye> hidi hinesi feday baasso>> yeydi u masso.

⁸Yesuusay yenniyawo be gawwaaka u massesesa beese erdi <<Hi muxhurowaka ame yeydi hi maxe?

⁹Ha e tokey doccesheeshushe < <<Ne cubboy attuwaye>> hidi hiyuttiko e yese> yeydi hiyekofaara <Dendi e gara niya woysi u oodechosha etti hanguwa!> yeydi hiyekofaara a'esana shawukay?

¹⁰Zeerey maaqusune axi yele hidi hiyuttasi axi cubbo <Attuwaye> hidi hiyese ha saha bakkaa adeto e keengesa eruwayte!>> yeydi hissine ye e tokey doccesheeshushe

¹¹<<Doo, neesuko ta ohe. Dendi e gara niya iddi oodechosha etti neeso hanguwa!>> yeydi e hido.

¹²Ye e tokey doccesheshini yenniyawo dendi e gara woysi esa oodechosha etti axi uddina beesune dhaddi e hando. Axiti ye esa beedi orjena micci <<Ha e bisha hanta koolona beedi eruwanxhiko>> yeydi hissine Wonto kedda kedda u hisso.

¹³Yesuusay assiwo kessi bagade da'aa e hando. Axi lagay esuko yoodine e erusicha.

¹⁴Yahafa dendi e hangusune Ilfiyose na'i Lewey qaraxha godowa uttiya yesune e beedo. <<Yoowwa taara!>> hidi e hido. Esini dendi esaara hando.

¹⁵Ye e geede Yesuusay Lewe zawaaka tato gara utticha. Laga qaraacitaara cubbo hantichaashitaaray[2] esaara hangiya be yecho gisha ussaafa lagay Yesuusaara e erusichoshitaara ye tatowa wolko u muucha.

¹⁶Farasaxiti bade maaddhese Muse woga eruseesiti Yesuusay cubbo hantichaashitaara qaraacitaara wolko kaxa e muunesa u beedo. Usini <<Abasuwa ha e bisha axitaara e muune? E ushe?>> hidi e erusichoshita u oycco.

¹⁷Yesuusay u oyccosha siidi <<Hargaxuse baaka modhe yese axuse dhaliyade worgusuwasso. Tani esume yoodosi cubbachita maarowa xheygese baaka <Tanko gizoy> hidi hine axita xheygese maaquwasso>> hidi e hido.

¹⁸Bidzi wonte Yohanisey erusichoshitaara Farasaxitaaray u xhoongicha. Axiti Yesuusako yoodi <<Yohanisey eruseesitaara Farasaxitaaray xhoongusune, ne eruseesiti xhoonguwasi abasuna?>> hidi u oycco.

¹⁹Yesuusani ususe <<Kuula wonte ekke na'aara hangeesiti <Ha kuula kaxa muuwanxhiko nuni> hidi hiyese danda'aa u danda'e? Ye kuulaadey usaara yesune xhoomese danda'uttuwasso.

²⁰Zeerey maaqusune ekke na'i u garafa shahutte wontay yootako e yoone. Ye wonteko yenniya u xhoonge.

²¹Cindese maa'o gara kille olle docesha ollesi baasso. E olla'ayko kille olley be doce gisha ye cindecha maa'o be gara e goocheteko e feedhutte. Fetto burome gardi e iite.

²²Yeydiwo cima ogorowaaka[3] kille daanuttese weyne zuusi aafe daana gussi gadesi baasso. Essaa e gada'ayko ye ogoroko ye daanay dhuussi wora gukke. Ye ogoroni go'uwasa maaqe. Ye e gisha kille daanase kille ogoroko e worguse>> hidi e hido.

²³Sanbatitaafa bidzi sanbata wonte Yesuusay gossa tisha giddaanna e garicha. E garusune e erusichoshiti ye tishaafa shife u ayto.

²⁴Farasaxiti Yesuusako <<Haha'e! Ne erusichoshiti abasuwa sanbata wonte wogay tuceshesha u hante?>> hidi u oycco.

²⁵Yesuusay usuko mahisine <<Dawitey be maddhundo woggaaka aba e hantosa fetto fissharowa zeerusobaytuwa? Abiyataarey Wonto kahinituse afana ade e maaqichoniyaka naayey Dawitiyara esaara yecha geraara e oycco. Hinne Wonto Zawaa gelenawo Wonto kahinewo baaka ooneni muuwannike wogay tuccechosha Wonto buro gaduttecha hayla boora etti e muudo. Beera wolko yecha axituseni e indo>> hidi e hido.

²⁷Sekke assi <<Sanbatay axumeyssine e maaddhosa baaka axi sanbatase meddhutto baasso.

²⁸Yeydiwo axi yele hidi hiyuttasi sanbataseni e laaxuko>> yeydi e hido.