Read koorete Marqoose 4 Bible Online

Marqoose 4 - koorete bible

Marqoose 4

¹Yesuusay bagade da'aa sekke assiwo eruse e ayto. Danda'uttuwa axi lagay esuko yoodo gisha zabhay bagade gara yechoyne essaa gelli e utto. Axi be uddina ye bagade da'aa sahaa u yecha.

²Mamakona laga zeere e erusicha. Usoni erusisine

³<<Siwwayte! Bidzi adey e yecha. Ayla ayleseni be mor'e etti e kesso.

⁴Ayliya e yesune bidzi bidzi mor'ey oge da'aa undechoyne kafoy yoodi maxxhi muudo.

⁵Fede mor'ey saha be oomo keenguwa qaaqa gara e undo. Yaha sahay laga badecho gisha izziya e mudho.

⁶Mu'ese baaka awway undine shulli xhabho be datto badecho gisha e mello.

⁷Feday haga cultiya yese anke gidda undo. Ye ankey be kesso geede esa be oomo gitti e ayto gisha aafe kaxxho badi e dhaddo.

⁸Fede mor'ey saha modhiya aylutti e mudho. Ye mu'ay dicci modhe aafe e kaxxho, badey haydzi tamme, badey izzuppi tamme, badey xhiixe yeysi e kaxxho.

⁹E siyorosa washey yesesi naddhi siwwaye>> yeydi e hido.

¹⁰Yesuusay be goshewo yesune tamma lam'itaara esaara yechashitaaray ye mamakiti birche esa u oycco.

¹¹Esini <<Hinuse Wonto kaatete aasshi be gaddechosha hi eroronike matiko e yese. Wude yeseesitusema <Usini hanke Wontoko maaddhi u cubboy ucutti ooxuttoroome, beesine naddhi u beewanike, siisine u gaxhuwannikeko> uddi zeerey mamakonawo e zeerutte>> hidi e hido.

¹³Yesuusay ususe <<Ha mamakoy hinuse geliya baye? Hine fede fede mamakita uddi waydiwu erese hi danda'e?

¹⁴Aylesa hidi hiyuttasi Wonto kato ohesako.

¹⁵Oge da'aa unda mor'ey ha esa bishe axitako. Kato u siido geede Humbayey yenniyawo yoodi u muxhurowafa u siidecho kato e ekke.

¹⁶Yeydiwo qaaqaa ayluttasi ha esa bishe axitako. Usini kato siisine yenniyawo maggana u ekke.

¹⁷Maaqe baa usi ye woggasewo baaka xhabho keemuttuwasso. Ye kato gisha maddhay oo'oyne goodoy elloynase yenniyawo dhumutti u unge.

¹⁸Anke dhusha giddaa unda mor'ey ha esa bishe axitako. Usini kato siido geede

¹⁹ha saha maxoy wodunte eehaara fede yaho col'aaray u muxhurowa gelli kato gite gisha aafe kaxxho badi u dhagge.

²⁰Feday assi modhe sahaa aylutta mor'ey ha esa bishe axitako. Usini kato siidi gaxxhi etti aafe kaxheesitako. Ye esa bisheeshiti badey haydzi tamme, badey izzuppi tamme, badey xhiixi aafe yeysiko u kaxhe>> hidi e hido.

²¹Ye e geede Yesuusay ususe <<Axi faqe faddhi gufunxuttese kofa oomo oo'oyne ijheydese godo gadaa e gade? Faqey beysorosa abako gara addaaka maaquwaye e gadesi?

²²Aachuttesi esume aachuttesi buro gara addaa bentesuko, ijheynesi esume ijheynesi tiddhiya kesesuko.

²³E siyorosa washey yesesi naddhi siwwaye>> yeydi e hido.

²⁴Sekkeni assi <<Hi siine zeere waysi hi siinenike modhussi hinumba kakkuwayte! Siidi hi gaxhenikeko mati hinuse sekke e ingutte. Garsiwoni fetto e kose.

²⁵Ye esini keengeesituse assi e ingutte, keenguwasi garafa ye e keengicho oddheni fettonawoko e efutte>> yeydi e hido.

²⁶Ye e geede Yesuusay ususe <<Wonto kaatetoy ha esako e bishe. Bidzi adey be wootaaka ayla ayliya e hando.

²⁷Be ayllo geede ye axi qama aqa wonta feysho e hisune ye aylay waa waydi e hidosa e erdo baanne ye mor'ey mudhi e diche.

²⁸Ye sahay beesewo burona ulke e kesse aallo e diche, sekke geesha ye e geede ye geeshaaka aafe yeysi e kaxe.

²⁹Ye kaxay kaxxhi ello woggaaka ace woggay ello gisha kaxaadey ukkenawo be baacana ace e ayke>> yeydi e hido.

³⁰Yesuusani <<Wonto kaateto abaarana wol da'aa gaddi ni beyye? Aba mamakonawa ni adduse?

³¹Hade saamo aafe bisheshe bidzi sanafice mor'eko e bishe. Ye mor'eni ayluttisine ha saha gara yese mor'iyafa fettona laaqi isowoko.

³²Aylutti be mudho geede dicci ha saha gara aylutta lagaafa uddi e gara, afa kafiti e gara keexxhi yesoro aallo malla hangita e dakke>> hidi e hido.

³³Yesuusani axiti modhussi siyese danda'e makko ha esuke laga mamakona kato ususe e ohicha.

³⁴Mamako keenguwasa erusuwadiko e yecha. E erusichoshiti be goshewo yeseniyaka ususe uddi zeere birshi e ohicha.

³⁵Ye wonte qamese e hisune Yesuusay be erusichoshituko <<Bagade geede nu fotteere>> yeydi e hido.

³⁶Laga axita datti Yesuusay essa utticho zabhana dhaddi u fotto. Fede zabhitini usaara wolko hamese u dendo.

³⁷Iita agexi waaxi gara dendi waaxi zabhaa laddi kumese hiyoro aallo jhirahoy zabha oxhe gello.

³⁸Ye woggaaka Yesuusay ye zabhaaka geede badena be qinixo keddaysi gehunsa e yecha. E erusichoshitini esa birkussi <<Nu Laaxo! Nu baasuniya mikku neyne?>> yeydi u hido.

³⁹Esini dendi agexe e kassho, jhirahoni <<Mikki hiwwa! Dhimmi hiwwa!>> yeydi e hido. Agexini yenniyawo dhaddo, waaxi orjenawo sammi hido.

⁴⁰Yesuusani <<Ame yeydi hi jhashe? Fetto abasuna Wonto hi gobbuwaane?>> yeydi e hido.

⁴¹Usini orjena jhasshi <<Haha'e! Agexaara bagadiyaaray fetto e ohenike hinesi ha esi aba bisha axuwa?>> yeydi sekke hanke wolko u zeerdo.