Read koorete Marqoose 5 Bible Online

Marqoose 5 - koorete bible

Marqoose 5

¹Galila bagade zabhana fotti Gerasenoone wude u ello.

²Yesuusay zabhaafa kessonike bidzi axi xhoozi aytesesi boossiti giddaafa kessi esaara e muto.

³E yeso godoni boossaakawo maaqusune ooneni esa feday yaha yesune fetto sansalatanani tutti gadese danda'uwadiko u yecha.

⁴Laga wogga aallo toke tukke qanganaara sansalatanaarako e tufutticha. Tufuttose baaka ye sansalata bursi shittiyara toke tukke qanga meyssi kinci dattiyarako e yecha. Ye e gisha esa ayti essesi ooneni badiko yecha.

⁵Uddi wogga qamani wontani burso badi boossaakaara bakka garaara seya haya hanti e uwwicha. Shuchuna be gara zaydi e madusicha.

⁶Esini Yesuusa zara beedi esuko woxxhi yoodi baagisine e buro bocunti

⁷be kato keddaysi uwwisine <<Uddime afana maaddhese Wonto yele Yesuusa, niya am taassa gelsesa? Wonto sunxunako nemba ta shi'e, odde, taa maddhunsofuna!>> yeydi e hido.

⁸Xhoozi esume yeydi hidosi esini <<Neno xhoozo, ha axi garafa kesuwa!>> yeydi e hidecho gishako.

⁹Yesuusani <<Ne sunxi oonewa?>> hidi oycco. Esini <<Laga nu maaqe gisha ta sunxi Shaweko>> yeydi e mato.

¹⁰Ye wudiyafa e gooduwannike minsi e shidho.

¹¹Yaha bochiti gara girme lagay yeemuttiya yecha.

¹²Usini <<Hine odde, se girmituka handi nu gelleese>> hidi esa u shidho.

¹³Yesuusani <<Geluwayte>> hidi hido. Xhoozitini ye axe datti girmitukaaka handi u gello. Lam'i kuma elle girmey gaagaanna leemo kessi woxxhi bagadiya gutti u baado.

¹⁴Ye girmita yeengichashiti badhi woxxhi katamaakani katamase wudeni uwwa u ellusso. Axitini maaddha abako beyese be zawafa zawafa kessi

¹⁵Yesuusakoni yoodi hade laga xhoozuna aykuttecha axi uttiya be maa'o maadhi bembani erdi e yesune beedi u du'eydo.

¹⁶Ye buro maaddhase beeda axiti xhoozi e gara yecho axusaara girmiti gara maaddhasaara uddina u odusso.

¹⁷Hinneko ye wude axiti Yesuusay u wudiyafa kessi dhaddi hamorosa shi'e u ayto.

¹⁸Yesuusay zabhaa geliya yesune xhooze e garafa e gooddecho axi uddhi <<Odde, neera handi ta yesseese>> hidi e shidho.

¹⁹Yesuusay beera e hamorosa oossi <<Dhaddi ne zawa handi ne Laaxi neese waysi keddaydese hanta e hantonikiyara aba makki aallo nemba e maardonikiyara ne iginituse odusuwa!>> yeydi e hido.

²⁰Ye axini handi <<Tammi Katama>> hidi hiyutte wude Yesuusay waysi keddaydese hanta beese e hantonike e odusicha. Siidasitini uddina u micco.

²¹Yesuusay sekke zabhana bagade fottine axi lagay assiwo esuko bagade da'aa u bhikkilutto.

²²Ayhuda Bhikkilo Zawa afana maagitaafa maaqe Ya'irose sunge adey e yecha. Yesuusay yecho godo yoodi esani be beedoniyaka e toke gara undi

²³<<Ta busho barriyoko lubbosewo yesa. Odde, aadhuwa! Ne kuche i gara gaddena hikkete loolli hantonni!>> hidi orjena maddhundi e shidho.

²⁴Yesuusay siidi Ya'irosiyara hame e ayto. Axiti lagay usaara hangisine esa u ur'icha.

²⁵Tamma lam'i bera aallo suuxi yoodi iitanawo iso maddhunxicho bidzi indoy i yecha.

²⁶Dhaliyade gara seya haya hangi hangi iinne be miijhewo uddi i alsichosha baaka abani looloy isuse dheeddecha. Fettonawo i gara sekke e miindecha.

²⁷Yesuusase odusuttase siidi <<Fetto e maa'o bira dollako loolako ta loole>> yeydi be muxhurowanna massi axiti feeqaanna ur'i gelli geedena yoodi e maa'o bira loddissi i dollo.

²⁹Ye suuxi yenniyawo eedhine i loollosi isuse erutto.

³⁰Yesuusani yenniyawo harge loolusese danda'e osay beekofa kessosa erdi axituko maaddhi <<Ta maa'o dollasi oonewa?>> hidi e oycco.

³¹E erusichoshitini <<Haanxhi laga axiti ur'iya yesesa beesine <Ooni taa dolla?> hidi ame neyne?>> hidi uydo.

³²Esini yenniya be maa'o dollase erese be googe e beecha.

³³Ye indoni aba makki aallo be loollosa erdi jhasshi kobursine yoodi e buro undi be hantosa e bidzi bidzina i oto.

³⁴Esini <<Nuunde, tamba ne goddosuna loolliko ne yese. Ne hargiyafa geejhuwa! Yoonase, modhena hanguwa!>> hidi e hido.

³⁵Yeydi haga Yesuusay zeeriya yesune ye maaga maaqe Ya'irosesofa axiti woosutti <<Bushoy neese baadiko yese. Yoonase dhagguwa! Laaxe maddhunsofuna!>> yeydi u hido.

³⁶Yesuusay ye u ohesa siidi Iya'irosese <<Du'eydofuna, <Loolusako e looluse> hidi hiwwa neese!>> yeydi e hido.

³⁷Yesuusay beera handecha axiti laga oossi Phexhrose, Yayqoobe, ye Yayqoobeyndo na'i Yohanisiyarawo etti Iya'iroseso e aadho.

³⁸Ye maagaso handi u ellusune Yesuusay axiti iitanawo yeekesa uwwesa <<Ay! Uy!>> uynesa e beedo.

³⁹Esini ye zawaa gelli yeefiya yechashituse <<Abasuwa hi yeeke? Hi uwwe? Ha busshi gehiya i yesesa baaka baado banniko>> yeydi e hido.

⁴⁰Axiti orjena qozoozzi miicco. Yesuusay axe u uddina zawaafa wude e kesso. Ye busshiyade ye bushindo beera yecha geraaraysi etti ye busshi woy'icho godowa e gello.

⁴¹Ye busshi kuche ayti <<Taliita kumi!>> yeydi e hido. E birchey <<Busshe, denduwa!>> yeydi hiyoko.

⁴²Isini yenniyawo dendi sekke hanke hante i gello. Tamma lam'i bera bushoko i maaqicha. Beedaasiti fettonawo u micco.

⁴³Esini oonekoni u odusuwanike minsi e kassho. Ye e geedeni <<Kaxa isuse inguwayte>> hidi e hido.