Read koorete Marqoose 6 Bible Online

Marqoose 6 - koorete bible

Marqoose 6

¹Yesuusay yahafa kessi be diccecho Nazrate katamaa e yoodo. E erusichoshitini esaara yoodo.

²Sanbata wonte Ayhuda Bhikkilo Zawaa gelli eruse e ayto. Yaha yecha axi lagay e ohesa siidi u micco. Usini <<Haha'e, ha axi ha e bisha zeere uddi ayafawa e degesso? Waakeydi keddaydese eraxuna? Ha micushe hanta e hantesi waakeysina?

³Ha esi Maarame yele mixe massichashe maaquwaye? Esindo na'axhey Yayqoobe, Yoosa, Yuuda, Simoone maaquttuwaye? Esindo bunaycey nuura yesiya baye?>> yeydi esa haassisine etto badi u dhaddo.

⁴Yesuusay <<Kaayaxi fede wudiyako e kuxutte, e wude axitaara, e iginitaara yeydiwo e zawa axitaaramay esa kuxuttuwasso>> yeydi e mato.

⁵Yaha oddhe hargaxiti gara be kuche gaddi e loolusosa baaka fede micushe hanta hantese dandadho baasso.

⁶Esa efe u dheeddo gisha orjena e micco. Ye e geede fede godo seya haya hanti e erusicha.

⁷Be erusicho tamma lam'ita beeko xheydi lam'e lam'eysi anxisine xhoozi gara adeto ususe e indo.

⁸Be ogese kallowara be tokese kobhaara baakani abani galla sigire miijhe yeydiwo lakko maa'oni u ekkuwannike minsi e oto.

⁹

¹⁰Esini <<Aya godoni bidzi zawa hi gello geede ye wudiyafa hi kesoro aallo yaha decuwayte.

¹¹Ayani axiti <Hinumba ekkuwanxhiko. Fetto ha hi ohesa siwwanxhiko> yeydi u hitta'ayko dhaddi yahafa hangisine hi toke xhuure yaha fitti gussi kessi hanguwayte. Ususe ye atoni kashoko e maaqe>> yeydi e hido.

¹²Usini yahafa dhaddi kessi axiti be cubbo dhaddi maaqoronike u oto.

¹³Laga xhooze u gooddo. Laga hargaxita zaytena tisshi u loolusso.

¹⁴Yesuusa sunxi uddi godowa ello gisha kaati Herodiseni siido. Bidzi bidzi axiti <<Xhamaqicha Yohaniseko haybowafa denda, ha esunako ha micushe hanta e hante>> yeydi u hido.

¹⁵Feditini <<Elaaseko>> hidi u hicha. Feditini assi <<Esini beese kaayaxuko. Olo kaayaxitukaafa bidzuke yesesako>> hidi u hicha.

¹⁶Herodisey e hantosa uddi siidi <<Ye e baala ta bursusecho Yohaniseko haybowafa denda>> hidi e hido.

¹⁷Herodisey beyndo na'i Filphoose macho maaqichanniyo Herodiyada ettine Yohanisey <<Wogay oossechosha neyndo na'i macho ne ettosi modhe maaquwasso>> hidi hinne Herodisey Herodiyada magguseeme hissine be tooraxita ansi esa aykussi tufe zawa e gelsusecha.

¹⁸

¹⁹Herodiyaday Yohanise iilli wodhusese i maxicha. Maaqe baaka isuse bissho badi e yecha.

²⁰Isuse bishe e dheeddosi Herodisey Yohanise gizowara hayla matiyara be beecho gisha esa jhasshishine iita abakoy elluwannike e kakkicha. Yohanisiyara wolko be zeereniyaka e zeeresa siidi e maddhungicha. Maaqe baaka e erusichosha siye e eehicha.

²¹Bidzi wonte Herodisey be yelutto wonta kuxase orje massala naddhi kaati hantaxita, toora darguse maagita, ye Galila wudiya eruttese hayyaxheni beeso e xheydo. Ye wontay Herodiyaday massechonike bissheshe wonta isuse e maaddho.

²²Hinne Herodiyada bushoy massala zawa gelli ose modhussi dholli kaati Herodiseni maaqqe e xheydecho borsita orjena i maggusso. Kaati Herodiseni ye busshiyo <<Ne worgesa abani e maaqo'ayko taa oycuwa! Neese ingawoko ta inge.

²³Ta kaatetowafa e bade e maaqo'aykoni ne maxesa abani ingawoko ta inge>> hidi lagussi e caadho.

²⁴Busshini yahafa kessi be oycesha indowara i kundo. Isindoy << <Xhamaqicha Yohanise qinoko ta worge> hidi hiwwa!>> yeydi i hido.

²⁵Ye busshi kaatuko ukkenawo maaddhi <<Xhamaqicha Yohanise qino sanqiya gaddi hattewo taase ne ingorosako ta worge>> hidi i hido.

²⁶Kaati ye i oto zeerese orjena e higillo. Maaqe baa be xheydecho borsiti buro be caadhecho caaqome hissine ooxese wordo baasso.

²⁷Yenniyawo kaati be tooraxitaafa bidzo Yohanise baala bursi qino e ooworonike e anso. Ye e bishja hanta hante tooraxi handi tufe zawafa Yohanise baala bursi

²⁸e qino sanqiya gaddi oodi busshishe e indo. Ye busshini beyndose i indo.

²⁹Xhamaqicha Yohanisey erusichoshiti maaddha odo siidi yoodi aha etti u mooddo.

³⁰Anxutta tamma lam'i hanke maaddhi Yesuusa da'aa yoodi be hanto hantaara be erusositaara uddina u oto.

³¹Usuko yoone axaara hange axi taafowaray laga maaqicho gisha kaxa miyese fetto godowara woggaara u dheeddo. Ha e gisha Yesuusay <<Axi baa godo aadhuwayte. Oddhe woggase nu goshewo kaxe nu effeese>> hidi e hido.

³²Hinne be goshewo axi baa godo zabhaa gelli bagade garana u hando.

³³Maaqe baaka laga axiti u hangusune beedi uso erdi se katamaafa ha katamaafa kessi be tokena u buro woxxhi gardi u katto.

³⁴Yesuusay zabhaafa be kessoniyaka yaha yoodi laga axita beedi hade biya yeengesa keenguwa dorituke maddhumiya u yecho gisha e higillo. Laga abakitani eruse e gello.

³⁵Sahay dhaddi qamese hisune e erusichoshiti esuko uddhi <<Hay essaa ni yese godoy abakoy baa godoko, sahani qamesuko hine,

³⁶axe dakkuwa, u muune kaxay haya baa gisha katamitikaara axiti yese godowara handi woondi miyuttoose>> hidi uydo.

³⁷Yesuusani <<Hinuni u muunesa inguwayte!>> hidi e hido. Usini sekke <<Hinne laga kuma miijheko[4] e worgusicha. Haanxhi miijhe yessako handi woondiko nu ingaane/>> hidi uydo.

³⁸Esini <<Aanxhi boorawa hinuse yesa? Mee, handi beewayte!>> hidi e hido. Usini handi oycci degessi <<Ichichi booraara lam'i gulxhiyarako yesa>> hidi u hido.

³⁹U uddina modhe maata gara shati shati u uttusoronike e oto.

⁴⁰Axitini xhiixe xhiixeydiyara ichichi tamme ichichi tammeydiyara shahutti shahutti u utto.

⁴¹Yesuusay ichichi booraara lam'i gulxhiyara etti wokke afaa beedi Wonto galatti boora meyssi meyssi axuse u ingoronike be erusichoshituko e indo. Yeysiwo ye lam'i gulxheni u uddise u shahoronike e indo.

⁴²Be uddina muudi u missho.

⁴³Baxe atta booraara gulxhiyara e erusichoshiti tamma lam'i kofa kume u bhikkillo.

⁴⁴Ye boora muuda asanxuwoy ichichi kumako u maaqicha.

⁴⁵Yesuusay yenniyawo be erusichoshita <<Zabhaa gelli taame burona semfa Beetesayda fottuwayte!>> hidi allusi ye axita e zawa zawa e buddo.

⁴⁶Ye e geede uso buddi Wonto shi'ese kedda gara e kesso.

⁴⁷E qando geede e erusichoshiti zabhaaka bagade gidda yesune esi be goshe hana sahaa e yecha.

⁴⁸Osaxi agexi bagade gara u burona hanke oxhicho gisha e erusichoshiti sharisine u maddhungesa beedi wontaso odduppi saate e elle woggaaka usuko e yoodo. E yoodosini bagade garana hantisineko e maaqicha. Garese e hisune

⁴⁹waaxi garana e hangesa beedi ususe gomaxe e bisshine iitana u uydo.

⁵⁰Be uddinawo beedi orjena jhasshi leemo u kesso. Esini yenniyawo <<Aadekoydofita, tambako, jhasshofita!>> hidi e hido.

⁵¹Yesuusay zabhaa usuko gelline agexi dhimmi hido. E erusichoshiti maaddhase beedi du'eydi u micco.

⁵²U miccoshini boora e lagussechosha gaxhe dheeddi u muxhuroy maxuwasa maaddho gishako.

⁵³Ye bagade garana Genserexheydi hisso godo fotti zabha bagade nuuna aandi u tutto.

⁵⁴Zabhaafa u kessonike axiti Yesuusa yenniyawo erdi

⁵⁵be yecho wude seya haya uddina woxuna handi hargaxita e gara iddichoshuna etti Yesuusay yese godo siidi u aangicha.

⁵⁶Yesuusay hando wude uddina giddha katamaakani maaqqe malla katamaakani katamitume wude e maaddhakoni hargaxita gadhesaaka e buro u uqusicha. Hargaxiti fetto e maa'o bira doloronike u shi'icha. E maa'o bira dolla hargaxiti be uddina loolicha.