Read koorete Marqoose 7 Bible Online

Marqoose 7 - koorete bible

Marqoose 7

¹Bidzi wogga Farasaxitaara Yerusaleemefa yooda bidzi bidzi Muse woga eruseesitaaray Yesuusako yoodi e da'aa u bhikkilutto.

²Yesuusay erusichoshitaafay bidzi bidziti gate wogay <<Ha kuchey dhoheydesesako>> hidi hine kuchena yeydi hiyoni be kuche shoto badi kaxa muunesa u beedo.

³(Farasaxiti yeydiwo Ayhudaxitini be uddinawo zage be geri woga kuxese be kuche modhussi be shoto baasa kaxa miyuttuwasso.

⁴Yeydiwo gadhesa handi be yoodo geede shohutto badi kaxa miyuttuwasso. Essa be ushe miijhe, ota, qanga diste, e gara be gehesa ye esita shohe wogaara ye esa bishe laga wogaara u kakke.)

⁵Hine Farasaxitaara Muse woga eruseesitaaray <<Ame ne eruseesiti buro geri woga u kakkuwaane? Abasuna be kuche shoto badi kaxa u muune?>> hidi Yesuusa u oycco.

⁶Esini ususe mahisine <<Isayasey hinuse awshachituse <Ha wude axiti nuunanawo taa u kuxesa baaka u muxhuromay taakofa zardiko e yese.

⁷Axi woga erusisine <<Ha esi Wonto wogako>> hidi hissineko yahowo taase u akkire> yeydi hissine e zeerdo kaayo katoy beese aadeko.

⁸Hinuni Wontoy woossosa dhaddiko axi woga iitana hi kakke>> hidi e hido.

⁹Sekkeni assi ususe <<Hi woga kafese hissine Wonto woosso inxha'e hinuni waakeydese kayshuwa!

¹⁰Museni <Niyadiyara neyndowara kuxuwa> assi <Biyade oo'oyne beyndo casheshi fetto hay'uwaye> hidiko e hine.

¹¹Hinunimay bidzi axi biyadiyara beyndowara marekofa <Hinuse ta ingasheesha Wontosuko ta indo> hidi e hidako

¹²<Indiko e yese> hissine adiyara indowara e maruwannike hi mahe.

¹³Ye esuke hi woga fedase garxeeme hissine Wontoy oto kato hi dhagge. Yeydiwo ye esa bissheshesha laga zeerita hi hante>> hidi e hido.

¹⁴Yesuusay assi axita <<Hanke taako yoowayte!>> hidi be hido geede <<Ta ohesa siwwayte, hi uddina modhussi gaxhwayte!

¹⁵Axe dhohusesimay axukofa kese zeerita baaka wudefa hanke axi gawwa gelesi bidzini axe dhohusesi baasso.

¹⁶[E siyorosa washey yesesi be uddina naddhi siwwaye!]>> yeydi e hido.

¹⁷Esini axita yaha dhaddi zawa gello geede ye zeere gisha e erusichoshiti esa u oycco.

¹⁸<<Ha esi hinuse waydiwu e geluwaane? Abani wudefa axi gawwaa gelesi axe e dhohusuwasi hinuse geluwaye?

¹⁹Be gello gawwaanna dhaddi wude e kesesa baaka muxhurowaka hanguwasso>> hidi e hido. Ye esuna Yesuusay kaxay be uddina geeshe maaqenike e addusso.

²⁰Sekke assi <<Axe dhohusesi axi muxhurowafa kese zeeritako.

²¹Ye usini iita maxo, bishuwa ogena wola muhe, kayse, axe wodhe,

²²laggete, habbu habbu hiye, iitete, axe qaaruse, bishuwa ogena biya magguse, dhiiddhe, axe cashe, nashutte, kahe dheebe yeenxhoko.

²³Haanxhi iita zeereko uddi axi muxhurowafa kessi axe dhohusesa>> hidi e hido.

²⁴Ye e geede Yesuusay Galila wudefa dendi Xhirose katamaara [Siidoona katamaaray] essa yese wude e hando. Bidzi zawa e gello. Ooneni <<Yahako e yese>> hidi esa erorosa wordo baasso. Maaqe baaka axiti eruwannike mahese danda'utto baasso.

²⁵Xhoozi i busho aytecho bidzi indoy Yesuusa odo yenniyawo siidi yoodi e toke gara i undo.

²⁶Ye indoy Grikaxhiyo maaqisine Sirofinqe wude yelutteko i maaqicha. Isini be busho garafa xhooze e gooddorosa Yesuusa i shidho.

²⁷Esini <<Nayshi kaxa etti kanase dafey bishuwassho. Dhagguwa, nayshi burona missheeshe>> hidi e hido.

²⁸Isini <<Aadewoko ta Laaxo, yeydi e maaddhakoni kaniti tatose e googena nayshi kuchiyafa medhi guttase maxxhi muutako u muune>> hidi i hido.

²⁹Yesuusani <<Yeydi modhussi ne mato gisha xhoozi ne busho garafa kessiko yese. Yoonase ne zawa hanguwa!>> hidi e hido.

³⁰Isini beeso handi i busshiyo xhoozi dattine moddhi woy'iya i yesune i beedo.

³¹Yesuusay Xhirose katamay yese wudefa dendi Siidoona badena gardi <<Tammi Katama>> hidi hiyutte wude feeqaaka Galila bagadiya e yoodo.

³²Yaha axiti e washey siwwaa e unxhureni balbace axe esuko u oodo. <<Odde, ne kuche ha e gara gaddi loolusuwa!>> hidi u shidho.

³³Yesuusay ye axe e goshewo axi feeqaafa bade gara garsi be gil'ita ye ade washiya e gelso, cuche cutti e unxhure e dollo.

³⁴Wokke afa beedi inxhi ye ade <<Efaata!>> hidi e hido, e birchey <<Do'uttuwa!>> hidi hiyoko.

³⁵Yenniyawo ye ade washey siido, tufuttecha e unxhureni birchuttine modhussi e zeerdo.

³⁶Yesuusay <<Oonekoni zeerdofita!>> hidi axituse e oto. Maaqe baa laga wogga <<Oonekoni zeerdofita!>> hidi e hidonike axiti fettonawo lagussi u odusicha.

³⁷Siidasiti be uddina orjenawo micci <<Uddi base modheko e hanto, fetto dhagay siyoronike muumitini zeeroronikeko e mahe>> hidi u hido.