Read koorete Marqoose 8 Bible Online

Marqoose 8 - koorete bible

Marqoose 8

¹Ye woggaaka sekke laga axiti bhikkilutto. U muunesi badi yecho gisha Yesuusay be erusichoshita xheydi usuko

²<<Ha axiti haydzi wonte aallo taara u deceshe gishaara u muunesi haya baa gishaara higilsako taa u higilse.

³Naaydi u yesune <Dhaddi hi zawa hanguwayte> yeydi tayta'ayko ogiyako gatti u unge. Bidzi bidzi geriti fetto zarafa yoodasiti handi aadhuttuwasso>> yeydi e hido.

⁴E erusichoshiti <<Hine ha saha melaaka haanxhi axe uddina elle boora degexese oonena danda'esa?>> hidi uydo.

⁵Yesuusay <<Aanxhi boorawa hi keenge?>> hidi e oycco. Usini <<Laappi bacheko yesa>> yeydi u hido.

⁶Esini axituko <<Sahaaka uttuwayte!>> hidi e hido. Ye laappi bache boorani etti Wonto e galatto. Meyssi gussi axituse u ingoronike be erusichoshituko e indo. Usini axiti buro garso.

⁷Ususe assi giddha gulxhiti oddhey yechoyne etti Wonto galatti axituse u ingoronike be erusichoshituko e oto.

⁸Axiti be uddina muudi missho. Atta baxe bhikkilli laappi kofa u denso.

⁹Ye muudaasiti taafoy oyddi kuma ellesako u maaqicha. Ye e geede axiti be zawa hamoronike e mato.

¹⁰Be erusichoshitaara wolko zabhaaka gelli Dalmanuta hidi hiyutte wude e hando.

¹¹Farasaxiti Yesuusako yoodi esaara wolko berse u ayto. Esa qaxhese wordi afa osana hantuttese ato maaqesa bidzi micushe abako e beysorosa u oycco.

¹²Yesuusay zeerey be gawwo orjena muunne <<Ha bera axiti micushe abakoy ususe maaqorosa abasuwa u worge? Aadewoko hinuse ta ohe. Bidzoni micushe abakoy ha bera axituse hantuttuwasso>> hidi e hido.

¹³Uso yahaka datti sekke assi zabhaaka gelli bagade semfa e fotto.

¹⁴E erusichoshiti gallase maaqe boora etti hame u botto gisha zabhaaka u yesune bidzi bache boorawoy ususe yecha.

¹⁵Yesuusani <<Farasaxiti iraacite garafaara kaati Herodise iraacite garafaara hinumba naddhi kakkuwayte!>> hidi minsi e oto.

¹⁶E erusichoshitini <<Esi yeydi hiyese dandadhosi galla oowe nu bottineko>> hidi sekke hanke u zeerdo.

¹⁷Yesuusay u maxo erdi usuko << <Yeydi e hidosi galla nu dheeddo gishako> hidi abasuna wolko hi zeere? Fetto gaxe keenguwaytu? Hinuse geluwaye? Hi muxhuro washey dhagaa maaddho?

¹⁸Aafey yesune beewaytuwa? Washe keengisine siwwaytuwa? Waydi fetto hi gaxhwaane?

¹⁹Mee, ichichi bache boora ichichi kuma axituse shati ta indoniya yaha atta baxe aanxhi kofani bhikkilli hi denso?>> hidi e oycco. Usini <<Tamma lam'i kofa kumeko>> hidi uydo.

²⁰<<Yeydiwo laappi bache boora oyddi kuma axituse ta indoniya atta baxe aanxhi kofawa hi denso?>> hidi e oycco. Usini <<Laappi kofako>> hidi uydo.

²¹Esini <<Hine hatte aallo hinuse geliya baye?>> hidi e hido.

²²Beetesayda katamaa handi u ello. Bidzi aafe keenguwa bal'a be kuche e gara gaddi e loolusoronike axiti Yesuusako oodi u shidho.

²³Yesuusay ye bal'a kuche ayti goosshi katamaafa are e kesso. Ye axi aafiya be cuche cutti kuche e gara gaddi <<Hatte abako beeta ne beene?>> hidi e oycco.

²⁴Ye bal'ay wokke keddaydi <<Eewwa, axita beyema beyako ta yese, hade mixukeko hantesa u bishe>> hidi e hido.

²⁵Sekke assi ye bal'a aafe gara be kuche e gaddo. Yenniyawo e aafey modhussi beye gello. Uddi abako addussi e beedo.

²⁶Ye e geede Yesuusay <<Neeso dhaddi hanguwa. [Oonekoni ne oduseeme] katamaa gellofuna!>> hidi e anso.

²⁷Yesuusay be erusichoshitaara Filphoose Qesaariya yese katamittaa hangisine ogiya uso <<Axiti tamba oonekoydi hine?>> hidi e oycco.

²⁸Usini <<Bidzi bidzi axiti <Xhamaqicha Yohaniseko> hidiko u hine. Fediti assi <Elaaseko> yeydiwo badey nemba <Kaayaxitukaafa bidzoko> hidiko uyne>> hidi u hido.

²⁹<<Hine hinuni tamba oonekoydi hiine?>> hidi e oycco. Phexhroseni <<Neni Mesiheko>> hidi e mato.

³⁰Yesuusani << <Esako> hidi oonekoni tamba odussofita! >> hidi minsi e oto.

³¹Ye e geede Yesuusay be erusichoshita erusisine <<Axi yele hidi hiyuttase laga maddhaa geleko e worguse, durke cimitaara Wonto Hayla Zawa kahinituse afana maagitaara Muse woga eruseesitaaray u inxha'e, u wodhe. Maaqe baaka haysso wonte geedeko e dende>> yeydi e hido.

³²Yeydi ye zeere addussi e oto. Phexhrosey Yesuusa e goshuna bade gara kessi <<Yeydi ne nuunaafa kese worgusuwasso>> hidi e kassho.

³³Yesuusani maaddhi be erusichoshita beedi Phexhrosese <<Neno Humbaye, ta da'aafa dhaddi zaruwa! Ne maxoy Wontowara wolko maaddho badi e yesune axaara wolkoko e maaqe>> hidi e kassho.

³⁴Ye e geede laga axita be erusichoshitaara beeko xheydi <<Taara hamese worgesi yesa'ayko bemba dhaddi be suxi mixe iddi taara yoowaye.

³⁵Beese be yeso kafese worgesi uddina baysako u bayse. Be yeso taamiyara ha modhe odomiyara garsi ingesimay yesoko e degexe.

³⁶Axi ha sahaa yese basita uddina degexa be yeso dheeba'eydako am esa e go'e?

³⁷Axi be yeso wozese danda'esa am e shange?

³⁸Wonto dhaddi fede wontoko hange cubbaxita maaqe yelutte buro taannaara ta katonaara borsesa u uddina axi yele hidi hiyuttasi biyade kuxa fuulana Wonto hayla woosaxitaara e yooworoniyaka esuna borsako e borse>> hidi e hido.