Read koorete Luqaase 1 Bible Online

Luqaase 1 - koorete bible

Luqaase 1

¹Orjena kuxuttese Tawofilose! Ha esume buro laga axiti nu feeqaaka maaddha zeerita arsi beedi bhikkilli addussi ohesa diizziko u yese.

²Ha maaddha zeerita garsaasiti burowafa ayti be aafena beedi ato maaddhasitaara Wonto kato ohichashitaarako.

³Yeydiwo taaseni bisheshi burowafa ayti zeere e uddina hossi kessi ta beedo geede e maaddhonikewo e bidzi bidzina neese ta diizoronikeko.

⁴Ha e buro axiti nemba erusecho zeerey aade maaqenike modhussi ne erorosako tanini neese yeysi diizesi.

⁵Yuuda wudiya kaati Herodisey kaattecho woggaa bidzi adey Zakaraase sungesi Wonto Hayla Zawa kahiney e yecha. Esini be bade bade maaqe kahinitaafa Abiya bade e maaqicha. E machini Elsabeexhe sungenni be yeluttena Aarone nayshaafa i maaqicha.

⁶Usini be lam'una Wontoy axuse otosaara e wogaara uddi modhussi haasse keenguwasa katti Wonto buro gizo u maaqicha.

⁷Elsabeexhey menxe maaqicho gisha yele keenguwasa be lam'una cindi u yecha.

⁸Bidzi wonte Wonto Hayla Zawaa hantese Zakaraase badese tagoy ello. Zakaraasey yaha kahiniti hantichosha Wonto buro hantiya e yesune

⁹Wonto Hayla Zawaa moddhi sawwe ixhaane essa cuwwusicho godowa gelli e cuwwushoronike kahiniti wogake hixha u olline hixhay esa ello.

¹⁰Ye esa e cuwwushushune ye woggaaka axi lagay be uddina wudena eedhi Wonto u shi'icha.

¹¹Yenniyani Wonto woosaxi ixhaane e gara cuwwushushooshushe e oshichi badena ee'isine Zakaraasese e addeydinne

¹²ye esa be beedo wogga e buro e baane, iitanawo e jhassho.

¹³Ye woosaxini esuse <<Zakaraase, jhasshofuna! Wontoy ne shidhosa siidiko e yese. Neeso indo Elsabeexhey asanxi yeleko i yele. E sunxeni Yohaniseydiko ne sunxe.

¹⁴Keddaysiko orjena ne magge. Yeydiwo e yeluttosuna lagitako maggesa.

¹⁵Esume hi maggesini ye yeleni Wonto buro keddaydese mallako e maaqe. Weyne daanaara fede gooshe usshaara fettona ushuwassho. Haga beyndo gawwaa e yesune Ayaana Geeshi esuka kunge.

¹⁶Isra'eele axitaafa lagaadita u Laaxuko u Wontoko hanke e mahe.

¹⁷Hade Elaase gara yecha ayaanaara osaaray e gara yesete Laaxi buro yoodi laga axita esuse e naqe. Adiyaxhi muxhuro nayshi gara woosuttuwadi yecha axiti muxhuro gizo axiti era garako hanke e mahe>> yeydi e hido.

¹⁸Zakaraaseni ye Wonto woosaxuko <<Cindiko ta yese, yeydiwo ta machini cimako. Hinne ha esi maaqesa abanawa erese ta danda'e?>> hidi e oycco.

¹⁹Ye woosaxini <<Tani Gabra'eeleko. Uddi woggaa Wonto buro yesineko esuse ta woosutte. Ha modhe odo neeko ta ohoronike Wontoy woossineko ta yoodo.

²⁰Neni ta otosa abasuna <Aadeko> hidi hiye ne dheeddo? Zeerey beese be wontanako e ite. Ha e gisha ye ta otosi itoro aallo muumoko ne maaqe, zeerese danda'uwannako>> hidi e hido.

²¹Yenniyaka axitini Zakaraase u kakkicha. Wonto Hayla Zawaaka e dooddinne <<Am e dooddo?>> hidi u micco.

²²Zakaraaseni yahafa be kesso geede usaara zeerey esa iissho. Axitini Haylame Hayla Zawaa Wontokofa bidzi abako e beedesenike u erdo. Esini be kuchena sekke hankeysi uso beysi e ohicha. Yeydiwo muumo maaddhi e dooddo.

²³Zakaraasey Wonto Hayla Zawaa e hanticho wontiti itto geede be zawaa dhaddi e hando.

²⁴Oddhe wogga geede Elsabeexhey i xhiiqusso. Be zawaa aachunti ichichi agunna aallo i dooddo.

²⁵Isini <<Wontoy be maaro aafena taa beedi ha modhe abako taase e hanto. Axiti tamba haassecho haasse ta garafa e denso>> hidi i hido.

²⁶Bidzi Maarame sungenni asanxaara muti eruwa woduroy i yecha. Isini Dawite fira fiixhaafa maaqe Yoosefese i aykuttecha. Elsabeexhe gara yeley atto izzunxo agunna Wonto woosaxi Gabra'eeley Galila wudiya yese Nazrate katamaaka isuko e anxutto.

²⁷

²⁸Ye woosaxini yoodi <<Sawwa ne yese! Wontoy niya kussesenne! Wontoy neera wolkoko yese. [Neni maachiti feeqaafa suuzuttesenniyoko.]>> hidi e hido.

²⁹Isini Wonto woosaxi isuse otosuna zeerey i buro e baane <<Ha esi aba bisha sawoni?>> hidi i masso.

³⁰Ye woosaxini <<Maarame! Wontoy niya kussiko yese. Jhasshofuna.

³¹Hay xhiiqusoko ne xhiiquse, asanxi yeleni ne yele. E sunxeni <Yesuusa> hidi ne sunxe.

³²Esini malla e maaqe, uddime afana maaqe Wonto yele hidi e hiyutte. Laaxi Wontoy esade kaati Dawite kaatete esuse e inge.

³³Isra'eelaxiti gara koolo makkina e kaate, e kaatetese aalliciray baasso>> yeydi e hido.

³⁴Maarameni <<Tani asanxaara muti eruwa woduroko, hinne ha esi waydi maaqese e danda'e?>> hidi ye woosaxeni i oycco.

³⁵Ye woosaxini isuse <<Ayaana Geeshi neeko yootako e yoone. Uddime afana maaqe Wonto osay nemba fashoko e fashe. Ha e gisha ne yelesi haylako. <Wonto yeleko> hidiko e hiyutte.

³⁶Hay ne iginniyo maaqe Elsabeexhey menxeydi hiyuttichani hanzo cimuntiya na'uko i xhiiqusese i xhiiqusowafa ha esi izzunxo agunnako.

³⁷Wontoy hantese hisune esa ooxesi baasso>> yeydi e hido.

³⁸Maarameni <<Yebo, tani Wonto maakiyoko, taase ne otonikewo maaquwaye>> hidi i hido. Ye e geede Wonto woosaxi dhaddi i da'aafa hando.

³⁹Maaramey ye woggawo Yuuda wude ale Elsabeexhe beyese ukkenawo i sootto.

⁴⁰Isini yaha Zakaraaseso gelli Elsabeexhe i sawusso.

⁴¹Maaramey haga iso sawusonikewo Elsabeexhe gawwaa yecha yeley kaadho. Isini Ayaana Geeshuna kundi

⁴²be kato keddaysi <<Maarame! Neenkeydi maachikaafa suuzuttesenni baasso. Ne gawwaafa ne yele yeleni suuzuttesesako.

⁴³Ta Laaxindoy tamba beyese taako yootaa mee yoowaane? Waakeydi keddaydese kuxawa.

⁴⁴Ne sawo ta siidonikewo ta gawwaaka yese yeley maggana e kaadho.

⁴⁵Wontoy neese be otosa alsenike <Aadeko> hidi ne hidosuna waydi suuzuttesesani neni>> yeydi i hido.

⁴⁶Maarameni <<Ta muxhuroy Wonto kedda keddaysiko e kuxe.

⁴⁷Tani ta Wontona taa loolusasuna maggako ta magge.

⁴⁸Uddime osaxi Wontoy ullaydese be maakiyo taa e beedo gisha maggako ta magge. Yeletani uddina hanzowafa densi <Neni suuzuttesenniyoko> hidiko taa uyne. E sunxini haylako.

⁴⁹

⁵⁰Wontoy bemba jhashe axita uddina yeluttena yeluttena maarawoko e maare.

⁵¹Bemba jhashe axuse Wontoy yeluttena yeluttena keddaydese be kurmayle osa beysiko e yese. Bemba nasheeshita u maxowara wolko buddiko e yese

⁵²Keddaydese afana maaga osaxita ullaysi u adetowafa e hosso. Ullaydechashita kedda kedda e hisso.

⁵³Dheeddechashituse modhe abako e indo. Wodumitani kuche mela e datto.

⁵⁴Abrahaamesaara e nayshi nayshushaara koolo makkina be beysecho maaro gaxxhi be maraxi Isra'eele mardiko e yese. E mardosini numba yellecha geruse be otechosha alsesuko>> yeydi i hido.

⁵⁵

⁵⁶Maaramey Elsabeexhe da'aa haydzi agunna ellesa dooddi ye e geede be zawa dhaddi i hando.

⁵⁷Elsabeexhey i yele woggay elline na'e i yello.

⁵⁸I dooditini maaqqe i iginiti Wontoy iso keddaysi massosa siidi isaara wolko u maddo.

⁵⁹Ye yeley yelutto hazzunxo wonte ye xhahey gada utte wonta kuxese u bhikkilutto. E sunxeni ade gara Zakaraase sunxese u wordo.

⁶⁰Indoni <<Oo'o, e gara sunsofita, Yohaniseko e summe>> yeydi i hido.

⁶¹Usini <<Yeydi sundofe, ne iginitaafa Yohanise sungesi bidzini baasso>> hidi u hido.

⁶²Hinne Zakaraaseko <<Ha yeley oonewa summe?>> hidi kuchena beysi u oycco.

⁶³Esini essa be diizesa oycci etti <<Yohaniseko e summe>> hidi hissine e diizzo. Axiti be uddina u micco.

⁶⁴Yenniyakani e unxhurey birchuttine zeere gelli Wonto e galatto.

⁶⁵Ye esuna u dooditi be uddina u jhassho. Ye odoy be uddina Yuuda wude ale e sinto.

⁶⁶Ye yele gara Wonto aafey yecho gisha <<Ha yeley am maaqese e hine?>> hidi be muxhurowa gaddi u maxicha.

⁶⁷Ye yelutta yeliyade Zakaraasey Ayaana Geeshuna kundi kaayo zeerisine

⁶⁸<<Isra'eele Laaxi Wontose galatay elluwaye. Be axe be maarona yoodi beedi shawo e kesso.

⁶⁹Be maraxi Dawite zawaafa looluse malla densiko e yese.

⁷⁰Olo hayla kaayaxiti nuunaanna be zeerdonike

⁷¹nu iilaxi garafaara numba inxha'esi kuchiyafaara uddi maardiko e yese.

⁷²Ha esa e matosi nuwadiyaxhuse be maarenikiyara be hayla caaqoy aalenikiyara massiko.

⁷³Ha caaqo e caadhechoshi numba yella Abrahaamiyarako e maaqicha.

⁷⁴Ye caadhi e indecho gobboy nu iilaxi kuchiyafa shawo kessi Wonto buro jhashe baaka ha saha gara nu yesoro aallo uddi haylaara gizo maaddhi yesenaara esa nu maroronikeko.

⁷⁵

⁷⁶Neno ha yelle, <Uddime afana maaqe Wonto kaayaxe> yeydiko ne xheygutte. Laaxi oge naqese e buro buroko ne hange.

⁷⁷Neni axi be cubbose maaro degexena loole ogeko ne eruse.

⁷⁸Ha esini yeydi e maaddhosi Wonto shenonaara e maaronaarako. Ye esuna modhete qoossi afaafa kesesuko e hine.

⁷⁹Esini cenchakaara haybo dooshaakaara yeseesitusuko e faqe, nu hamoni modhe ogeko e durke>> yeydi hissine e zeerdo.

⁸⁰Yeley e dicco, be gaxunani[1] e oseydo. Isra'eele gerita tiddhiyanna marese be kesoro aallo saha melaa e yesso.