Read koorete Luqaase 10 Bible Online

Luqaase 10 - koorete bible

Luqaase 10

¹Ye e geede Laaxi Yesuusay fedita laappi tamma lam'i axita e xhardo. Beese hame be massese katamakaara axi yese gatitakaara uddi buro lam'e lam'eysi e anso.

²Esini uso anxisine <<Gatiya kaxhese kaxay lagako, maaqe baaka ye kaxa hanke bhikkile hantaxiti eeroko. Ha e gisha ye kaxaade <Kaxa bhikkile hantaxita anxuwa!> hidi shi'uwayte!

³Yoonase dhaddi hanguwayte! Hade doritukeko sudhamiti gidda hinumba ta anxe.

⁴Hi ogese miijhe essa hi gadesa sigireni, toke kobhani aytofita, ogiya eedhi sawo ekkisine wogga baysofita.

⁵Hi gele zawaa uddi burussi <Wontoy modhete hinuse inguwaye!> yeydi ye zawa suuzuwayte.

⁶Modhete eehe axi ye zawa yesso ye modhetey ususuko e maaqe. Ye zawa yese e dheeba'ayko ye modhetey hanke hinukoko e maaqe.

⁷Hantaxituse u hanto wooma e worguse gisha hi gele zawaaka hinuse u ingesa muusiniyara usshishiniyara decuwayte, se zawa ha zawa hantofita.

⁸Aya katamaakani hi gelete u mokka'ayko hinuse u ingesa muuwayte.

⁹Ye katamaaka hi buro bente hargaxe loolusuwayte, ususe <Wonto kaatetoy hinuko uddhiko yese> hidi ohuwayte.

¹⁰Aya katamaakani hi gelusune axiti hinumba mokke dheeba'ayko dhaddi ye katamaafa tiddhiya hi kessoyna

¹¹usuko <Hay nu toke aytecha hi katama xhuure sekke hi gara fittiko nu gusse. Maaqe baa Wonto kaatetoy hinuko uddhosa eruwayte> hidi hiwayte.

¹²Hinuse ohoko ta ohe. Yaa'a wonte ye katamame Sodome katama gara maaddha yaa'ako shawukay>> yeydi e hido.

¹³Sekkeni Yesuusay <<Baduffu nemba Korazine katama! Baduffu nemba Beetesayda katama! Hinukaa hantutta micushe abakoy Xhirose katamaani Siidoona katamaani hantuttase maaddhesako ye katamittaa yecha axiti yeefo maa'o maadhi muqowa uttiko olowo be cubbo dhaddi u maaqaane.

¹⁴Ha e gisha yaa'a wonte hinukofa Xhirosesaara Siidoonasaarako yaa'ay shawukesa.

¹⁵Neno Qifirnahoome katama, neni kedda hidiya afa ellese neyneni? Fetto yekkeko Si'oole hobolowa ne hodhe.

¹⁶Hinuse siinesi taasuko e siine, hinumba inxha'esi tambako e inxha'e, tamba inxha'esi tamba ansaseni inxha'ako e inxha'e>> yeydi e hido.

¹⁷Laappi tammi lam'i geriti be anxuttecho godofa maggana maaddhi yoodi <<Nu Laaxo, ne sunxuna fetto xhoozini nu otonikeko e maaddho>> hidi uydo.

¹⁸Yesuusani <<Humbayey afaafa hade zeelunxukeydi ungusune ta beedo.

¹⁹Hay shoosheni maaqqe qobhoroni hi dheqoronike iilaxi osa uddi hi iichoronike adeto hinuse indiko ta yese. Hinumba miidhe abakoy abani baasso.

²⁰Fetto hi sunxi wona afaa diizutto gisha magguwayte baaka xhoozi hinuse hi otonike maaqe gisha maddofita>> hidi e hido.

²¹Yenniyaka Yesuusay Ayaana Geeshuna kundi e maddo. Esini <<Nuwadde, afaseni sahaseni Laaxe maaqeyo! Haanke yesesa gaxaxitumiyara eraxitumiyara aasshi xhahituse ne beyso gisha niya galatako ta galate. Eewa nuwadde, ha esa hantese modhe ne maxo maaddhiko e yese.

²²Uddi zeerey nuwadekofa taase inguttiko e yese. Ade baaka yeley oone maaqenike eresi feday baasso. Ade eresi yeliyara yeley e eroronike matosaara baaka feday baasso>> hidi e hido.

²³Yesuusay sekke be erusichoshituko be goshewo u yesune <<Beya hi yesesa beeneesiti waakeydi suuzutteseesitana!

²⁴Hinuse ohoko ta ohe, laga kaayaxitaara kaataxhitaaray hatte beya hi yesesa beyese col'iko u yecha, beyutto baasso. Siya hi yesesa siyese col'iko u yecha, siyutto baasso>> hidi e hido.

²⁵Bidzi wonte bidzi Muse woga eraxi Yesuusa naadhi beyese wordi dendi <<Laaxo, koolo makkina yeso degexese am ta hanto?>> hidi e oycco.

²⁶Esini <<Muse woga fissharowa abaydini e diizuttese? Waysi zeerusiya ne yese?>> hidi e hido.

²⁷Ye adeni <<Wogamay <Ne Laaxe ne Wonto fetto ne muxhurona, fetto ne lubbona, fetto ne osana, fetto ne maxona eehuwa!> yeydiwo <Fede axe uddina niya ne eehenikeysi eehuwa!> yeydiko e hine>> hidi e hido.

²⁸Yesuusani <<Aadewoko ne mato. Yebo, nenini yeysi hantuwa, koolo makkina yesoko ne degexe>> hidi e hido.

²⁹Ye Muse woga eraxi gizo oyche beese oycesha bisshi << <Fede axe> hidi e hisune abaydi hiyoni?>> hidi e oycco.

³⁰Yesuusani <<Bidzi axi Yerusaleemefa Yariko e hangicha. Ogiya hamiya e yesune fuuliti ayti durdi e maa'oni e garafa etti lubbowo shati dhaddi u hando.

³¹Ye ogiyanna dedha bidzi Wonto Hayla Zawa kahiney e hangicha. Ye durutti undese ade beesine e da'aanna gooddi gardi dhaddi e hando.

³²Assi kahinituse u bade maaqe Lewaxi yeyna e yoodo. Ye esini yeydiwo ye ade beesine gooddi gardi dhaddi e hando.

³³Assiwo yeyna fede bidzi Samaraxi oge hangichashi e yoodo. Ye undi yese ade be beedo woggaa e higillo.

³⁴Esuko hanke uddhi dhale maaqeesita zaytiyara weyne danaara e madaa e gusso. Ye e madani carqana modhussi e tutto. Be harre gara uttussi borsay essa aqicho zawa etti e hando. Yahani e worgusenike esuse e mato.

³⁵Ye Samaraxini ketiya sho'e dendi ye borsay essa aqicho zawaadekoni wontase maaqe miijhe lam'e[6] ingisine <Odde, ha hargaxe modhussi beedi hargusuwa. Yoosineko ha miijhe gara ne kosa'ayko tani neese mahe> hidi e hido.

³⁶Hinne ye fuuliti durdine ogiya undecha adiyara muta haydzi gerukafa ye undecha ade beenkeysi eetasi ussaa a'esana nemba e bishe?>> hidi e oycco.

³⁷Ye woga eraxi <<Ye higilli ye ade maardasema>> hidi e mato. Yesuusani <<Yebo, nenini handi e hantonike modhete hantuwa>> hidi e hido.

³⁸Yesuusay be erusichoshitaara oge hangisine bidzi ganda handi e ello. Yaha bidzi Marta sunge indoy Yesuusa be zawa i motto.

³⁹Ye Martani Maarame sunge beyndo busho i keengicha. Maaramey Yesuusa buro utti e erusichosha i haysicha.

⁴⁰Martani borsase hantana iitana i gattecha. Hinne Yesuusako uddhi <<Laaxo, ha nuundo bushoy zawana hanta ta garawo dattine ta goshewo ta gakkusune ame beedi mikku neyne? Odde, ohuwa, taa marrenni>> hidi i hido.

⁴¹Laaxi Yesuusani <<Marta! Marta! Neni laga basunako ne maddhunge ne hoodde.

⁴²Axuse worgusesi bidzi zeerewoko. Maaramey modhe abakoko i xhardese. I xhardesesani isukofa ekkesi baasso>> hidi e mato.