Read koorete Luqaase 11 Bible Online

Luqaase 11 - koorete bible

Luqaase 11

¹Yesuusay bidzi godo Wonto shi'iya e yecha. E shidho geede e erusichoshitaafa bidzi <<Laaxo, Xhamaqicha Yohanisey be erusichoshita e erusichonike nenini Wonto waysi nu shi'orosa numba erusuwa!>> hidi e oycco.

²Yesuusani <<Wonto hi shi'eniya <[Afaa yese] nuwadde, hayla ne sunxi kuxuttuwaye. Ne kaatetoy yoowaye.

³Hanzose maaqe boora nuuse inguwa.

⁴Nu miidhasituse uddi <<Attuwaye>> hidi nu hine gisha nenini nu cubbo <<Attuwaye>> yeydi hiwwa. Naadhi beene abako nu gara oodofuna> hidi shi'uwayte>> hidi e hido.

⁵Sekke Yesuusay <<Hinukaafa bidzi axi laggeko e keenge hidi nu hiyese. Ekke wodhakka be laggeso handi <Doo, ta lagge! Odde, haydzi bache boora taase tal'uwa!

⁶Bidzi borsako zarafa yoone esuse ta inge abako abani zawa ta dheeddo> hidi e hidako

⁷hinne ye e laggey zawa yesine <Odde, taa maddhunsofuna! Gasani kiidhuttiko yese, nayshaarani hixiya wolko nu getese, ha e gisha dendi ne worge boora neese ingese danda'uwasso> hidi hittaa e hine?

⁸Hinuse ohoko ta ohe. Be lagge e maaqe gisha inge dheeddakoni be etto baa aallo dhabe inxhadhi e kuluse gisha ingako e inge.

⁹Ha e gisha tani hinuse hinesi shi'uwayte, inguttoko e ingutte, worguwayte, degexako hi degexe, sumaa eedhi xheyguwayte, hinuse gasay do'uttoko e do'utte.

¹⁰Ye esini shi'esuse uddiko e ingutte, worgesini degexako e degexe, sumaa eedhi xheygesuseni gasay e do'utte gishako.

¹¹Hi giddaafa ade maaqisine yeley [boora gadhako shuche ingesi oonena?] Gulxhe e gadhako shooshe ingesi oonena?

¹²Bhuubhule e gadhako qobhoro ingesi oonewa?

¹³Hinuni iitita maaqisine hi nayshushe modhe abako inge hi erusune hinume afana garsi afaa yese hinademay biya shi'eesituse Ayaana Geeshe waysi e inguwaane?>> yeydi e hido.

¹⁴Bidzi wonte Yesuusay bidzi ade garafa zeerusuwadecha xhooze e gooddo. Xhoozi dattine ye muumoy zeere e gello. Axiti ye adey zeerdine iitana u micco.

¹⁵Bidzi bidziti <<Ha xhooze e goodesi xhoozuse afana maaga maaqe Bi'eelzebulenako>> hidi uydo.

¹⁶Usaafa feditini assi oonekofa e maaqesa erese wordi afaafa yerago e beysorosa u oycicha.

¹⁷Yesuusay u maxo erdi <<Bidzi kaatetowa yese axiti sekke hanke wola shaha'ayko uddi ye kaatetoy melako e atte. Yeydiwo bidzi zawa axiti woluka birre gelsa'ayko ungoko u unge.

¹⁸Hinne Humbaye kaatetoy sekke hanke wola shaha'ayko waanidi miindi yesese e danda'e? Hinne tamba <Esi xhooze goodesi Bi'eelzebulenako> hidi hiya baytuwa?

¹⁹Tani xhooze Bi'eelzebulena goodesa maaddhako hi bade axiti abanawo u goode? Ha e gisha usoko hi gara yaa'esa.

²⁰Yebo, tani Wonto osana xhooze ta gooda'aykoma yey Wonto kaatetey hinukaa yoodosso hidi hiyoko.

²¹Bidzi axi osaxi modhussi gixxhi be zawa katto geede e miijhey bonquttuwasso.

²²Maaqe baa ye axume osaxi yoodi iishakoma goddi e yecho e gixe efako e ekke. E miijheni uddina bon'iko fedaara e shahe.

²³Ta bade maaquwasi uddi tamba inxha'ako e inxha'e. Taara wolko bhikkiluwasi budoko e bude.

²⁴Xhoozi axi garafa goodutti be hando geede kaxe efese seya haya e hante. E hante godoni waaxi essa baa shanka mela uddi e maaddhoyna essaa kaxe be ekke godo e dheegge. Yahafani <Ta gooduttecho zawaa maaddhi ta hammeese> hidi e hine.

²⁵Maaddhi hanke e yoosune ye zaway fitutti geejjhi naqutti e yesune e degexe.

²⁶Handi beeme gare iita laappi xhoozaxhe etti yoodi gelli yaha e yese. Ye axuse geede yesoy burome fetto e iite>> hidi e hido.

²⁷Yesuusay yeydi zeeriya yesune axiti giddaafa bidzi indoy be kato keddaysi <<Nemba yelli be dhanxe dhamussa indoy waakeydi suuzuttesenniyowa!>> hidi i hido.

²⁸Yesuusamay <<Ye esume suuzutteseesiti Wonto kato siidi hanta gara feysheeshitako>> hidi e hido.

²⁹Axi lagay bhikkilutti be gara kossi kossi hamiya yesune Yesuusay <<Ha wogga axiti iita axitako. Micushe hanta beyesuko u worge. Kaayaxi Yonase gara hantutta micushe hantame fede micushe hantay ususe beysuttuwasso.

³⁰Yonasey yerago Nenewe katama axituse maaddhonike tani axi yeley ha wogga axituse yeragoko ta maaqe.

³¹Oomo bade kaate maaqicha indo Saabay Salamoney erana zeeresa siyeme hissine ha saha wosulaafa dendi i yoodo gisha yaa'a wonte ha bera axitaara dendiko sekke u gara i yaa'e. Siwwayte, Salamone garesako hay haya yesa.

³²Yeydiwo Nenewe katama axiti yaa'ase ha wogga axaara dendiko u gara u yaa'e. Ye esini Yonasey otosa siidi be cubbo dhaddi u maaddho gishako. Siwwayte, Yonase garesako hay haya yesa.

³³Faqe faddhi ijhaaka oo'oyne gufunxuttese kofa oomo gadesi baasso. Zawa gele axe e beysoronike tiddhiyako e gade.

³⁴Ne aafey garase hade faqeke yesesako. Ne aafey modhe yesesa e maaddhako ne garay kumena fo'eko e maaqe. Ne aafey hargaxe maaddhoyna ne garay uddi cenchako e maaqe.

³⁵<Ta gara yesesi fo'eko> hidi hiya ne yesesi haliya cencha e maaqe nemba naddhi kakkuwa.

³⁶Ne garay uddina abani cencha keenguwasa fo'ena kundesesa e maaddhoyna hade uddi abakoy moddhi faqenikeydi fo'iya bente garako e maaqe>> yeydi e hido.

³⁷Yesuusay yeydi zeeriya yesune bidzi Farasaxi esa boltose e oto. Ye Farasaxi zawaa gelli bolto miyese tato gara e utto.

³⁸Farasaxi Yesuusay be kuche shoto badi kaxa muunesa beedi e micco.

³⁹Hinne Laaxi Yesuusay esuse <<Hinuni Farasaxiti burcuqowara sanqiyara wudenako shoti hi geeshe, hi gawwaaka bon'i efiyara iitetiyarako kundesa.

⁴⁰Hinuno muyito! Wudenase meddhasi gawwanaseni meddho baye?

⁴¹Yebo, ye burcuqo gawwaakaara sanqe gawwaakaara yesesa jhi'ituse inguwayte, yenniyaka uddi abakoy geeshuko e maaqe.

⁴²Hinuno Farasaxito, hinumba baduffu! Kaxa unge sawwe dhalekofaara xhatallakofaara be bishana bishana yese sawwesitaafako Wontose tanxo tanxo hi inge, fede badenama gizo hantaara Wonto eehaara dhaddiko hi yese. Wontose ye tanxo ingisine ha esani dhabe hinumba worgusuwadiko e yecha.

⁴³Hinuno Farasaxito, hinumba baduffu! Ayhuda Bhikkilo Zawaakani kuxa godowaka uttesewo hi worge gisha hinumba baduffu! Ye esuke gadhesaaka yese godowaa uddina axiti hinuse kuxa sawo sawusorosako hi worge.

⁴⁴Keela keenguwa boossa hi bishe gisha hinumba baduffu! Axiti erdo badiko ye boossa garana u hante>> hidi e hido.

⁴⁵Muse woga eraxitaafa bidzi <<Laaxo, yeydi ne hisune numba cashiyama ne yesesi>> hidi e hido.

⁴⁶Yesuusani <<Hinuno Muse woga eraxito, hinumba baduffu! Axiti gara deexho idda hi idduse, ye idda hinuni bidzi gil'a biranani doluwaytako.

⁴⁷Yeydiwo hinadiyaxhiti woddho kaayaxiti keela bishushi hi naqe gisha hinumba baduffu!

⁴⁸Hinadiyaxhiti woddhecho kaayaxituse u boossa keela hantena hinuni hinadiyaxhaara hantese wolko kumaxitaara ususe atowarako hi maaddhese.

⁴⁹Ha esumeko Wontoy be erana <Kaayaxitaara anxuttaasitaara usukoko ta anxe, usaafa u wodhe, feditani u goodde> hidiko e hine.

⁵⁰Ha wogga axiti ha sahay meddhuttowafa densi guttese kaayaxiti suuxuse yaa'a wonte oycuttoko u oycutte.

⁵¹Aadewoko hinuse ta ohe. Olo gutta Aabeele suussaafa densi Wontose e gara kaashushooshusheni Wonto Hayla Zawaseni giddaa gutta Zakaraase suuxi aallo uddina gutta kaayaxiti suuxuse ha wogga axiti yaa'a wonte oycuttoko u oycutte.

⁵²Muse woga eraxito, hinumba baduffu! Erase e gasa do'esa ettiko hi yese, hi kuchiya e yesesa baaka fetto hinuseni gellobaytako. Gelese worgeesita u geluwannike hi oosso>> hidi e hido.

⁵³Yahafa dendi e hangusune Muse woga eruseesitaara Farasaxitaaray Yesuusa gara iitana dendi e zeerena esa qaxhese e nuunaafa wordi laga e zeeroronike oyche esuko uqussi esani u kakkicha.