Read koorete Luqaase 12 Bible Online

Luqaase 12 - koorete bible

Luqaase 12

¹Yenniyaka laga axiti iitanawo saha fasshi yoodi be lagetiyafa dendasuna wol gara u doongicha. Yesuusani burussi be erusichoshituko <<Farasaxiti iraacite garafa hinumba kakkuwayte. U iraaciteni u awshako.

²Ijhaa yese abakoy tiddhiya kesso badi aachuttesesi erutto badi attuwasso.

³Ha e gisha cenchaaka hi zeerdecho zeerey uddi fo'iyako e sinte. Gasa hi gara aysi wol washiya kaashunti hi zeerdechoshi gubbako tiddhiya e ohutte>> hidi e hido.

⁴Sekke Yesuusay <<Hinuno ta badito! Hinuse ohoko ta ohe. Acho be wodhe aallowo baaka ye esume feda abani hantese danda'uwasita jhasshofita.

⁵Oone jhashe hinumba e worgusesa hinuse ta ohese. Hi jhashorosi be woddho geede Gaannamiya dafese adeto keenge Wontoko. Aadewo esawo jhashuwayte.

⁶Ichichi kafo giddhiti lam'i saante zal'uttiya baye? Ye kafittaafa bidzini Wontoy dhaddesesi baasso.

⁷Hinuse fetto hi qino ufuxini taabuttiko e yese. Ha e gisha jhasshofita. Hinuni fetto laga kafo giddhame garoko hi gare>> hidi e hido.

⁸Sekke Yesuusay <<Axi buro <Kristosa badeko tani> hidi hineesuse tani axi yeley Wonto woosaxi buro <Ta badeko esi> hidiko tayne.

⁹Axi buro tamba <Tani esa eruwasso> hidi hineesuse tani Wonto woosaxi buro <Tani esa eruwasso> hidiko tayne.

¹⁰Taa axi yele gara iita kato zeereesuse ooneseni e baysoy <Attuwaye> hidiko e hiyutte. Ayaana Geeshe casheeshushema ooneseni e baysoy <Attuwaye> hidi hiyuttuwasso.

¹¹Axiti hinumba Bhikkilo Zawa ayti aangusune axita aheesiti buruwakaara afana maagiti buruwakaara yaa'ese hinumba u uqususune <Nu qino kessese am nu ohhe? Abaydiwa nu zeerre?> hidi maddhundofita.

¹²Ye wogaaka aba zeerese hinumba e worgusesa Ayaana Geeshuko hinuse ohesa>> yeydi e hido.

¹³Axi laga giddaafa bidzi adey Yesuusako <<Laaxo, nuwade be dhaalosa nuundo na'i taase shahoronike ohuwa>> hidi e hido.

¹⁴Yesuusani <<Doo, ha axo! Hi dhaalo hinuse ta shahoronike am hi gidda taa gelsesa? Ooni taa yaa'esa maagesa?>> hidi e hido.

¹⁵Ye e geedeni uddina axuse <<Axi yesoy wodunte lagetena maaquwasso, ha e gisha habbu habbu hiye garafaara hangaawa garafaara hinumba kakkuwayte, oseywayte>> hidi e hido.

¹⁶Sekkeni mamatti <<Bidzi ade wodumase e wootaani laga kaxay kaxxho.

¹⁷Esini gawwaanna <Waa ta hiye? Haanxhi kaxa essa ta bhikkile godo keenguwasso> hidi be massosi geede

¹⁸<Yebo, yeydi ta hiyorosi, ta gootarita woddussi fede malla gootaritako ta keexhe. Essaaka ta kaxani ta keenge abakitani uddina bhikkilli ta gade.

¹⁹Taase tamba <<Laga berase maaqe laga wodunteko ne bhikkilese, yoonase ne kaxe ekkuwa, muuwa, usshuwa, okketti magguwa!>> hidiko ta hine> yeydi wodumay hido.

²⁰Wontomay <Doo, neno ha muya! Geede qamako ne kaxi efutte, hine ha ne bhikkillo woduntey ooneseni e maaqe?> hidi e hido.

²¹Beesewo ha saha gara wodunte eelusesi Wonto buro jhi'o maaddhese axi ye esukeko e maaqe>> hidi e hido.

²²Ye e geede Yesuusay be erusichoshituko <<Ha e gisha hinuse ohoko ta ohe. Kaxame yesoy maa'ome garay gare gisha <Am nu miiye? Am nu maa''e?> hissine hi yesose maddhundofita.

²³

²⁴Mee, qurafita beewayte. Ayluttuwasso, acuttuwasso, kaxa esa be bhikkile godo fetto gootarani keemuttuwasso, yeenxho u dheeddakoni Wontoko uso muussesa. Hinuni ye kafitume fetto garuwaytuwa?

²⁵Mee, hi giddaafa maxenaara maddhumenaara be bera gara bidzi wonte kosesi oonena?

²⁶Hinne ye oddhe abako hantese hi danda'uwasa e maaddho geede aba gishana fede fede abakona hi maddhunge?

²⁷Mee, gubbaa yese fiirita waake waakeydi u dicesha beewayte! Hanti gafuttuwasso, zuquttuwasso, hante u dheeddakoni iitana moddhese maa'o maadha kuxa fuula keengicha kaati Salamoneni fetto usaafa hade bidzikeysi maadho baasso.

²⁸Hinne Wontoy hanzo bento guta tamaaka dafuttoynesa gubba yese maata yeysi seelo e gara gussi be maysso geede, hinumba fetto garsi ame e maysuwaane? Hinuni Wonto hi gobbesi waakidi oddhe e maadho?

²⁹Ye e gisha hinuni <Am nu miiye? Am nu usshe?> yeydi hissine maxona maddhundofita!

³⁰Yeysi degexese ha saha gara yese axiti yeydiko u maddhunge, hinuse haanxho e worgusesama afaa yese hinadey erako e ere.

³¹Yeydi hi maddhungeesume afa kaatetese karduttuwayte, haanxhi baseni uddiko hinuse e inge.

³²Hinuno bareta gerito, jhasshofita! Afaa yese hinadey be kaateto hinuse ingese modhe maxo matiko e yese.

³³Hi keengesa uddi zal'uwayte, jhi'ituse inguwayte. Miijhey essa gadutte cinguwa sigire naddhi hi wodunte kaysoy kayssuwa godo qooqannay[7] muuwa godowara koolo makkina e aaluwa godowara afa kaatetiya eelusi gaduwayte!

³⁴Esume yeydi ta hinesi eellese hi woduntey yese godo hi maxoy yahaka yese gishako>> yeydi e hido.

³⁵Sekkeni assi Yesuusay <<Hatussi gixxhi uddi wogga hantase naquttuwayte. Hi faqeni fadhesesa maaquwaye!

³⁶Ye esukewo hade be laaxi kuulaafa yoosune kakke ye zawaade maalituke maaquwayte. Usini be laaxi yoodi xheygeniya gasa do'ese naquttiko u kakke.

³⁷Ye esukewo naqutti u kakkusune u laaxi dedha yoodi degexesi ye maaliti abakeydi suuzutteseesituna! Aadewoko hinuse ta ohe. Esini hanta maa'o maadhiko tatowa e uttuse uddhini uso hanti e muusse.

³⁸U laaxi ekke wodhakka oo'oyne wontaso e yoosune birti kakke e maaliti waydi suuzutteseesitawa!

³⁹Assi hi erorosa ta worgesi axi beeso kaysoy an wogga yoodi kaysesa shati erdesesa maaddhako be zawa bootti e gelusune dhagguwadiko e yecha.

⁴⁰Tani axi yeley hi masso baa woggaako dedhawo ta yoone, ha e gisha hinuni naqutti kakkuwayte>> hidi e hido.

⁴¹Phexhroseni <<Laaxo, ha mamako ne mamattosi nuusuwani, uddiyadesuna?>> hidi e oycco.

⁴²Laaxi Yesuusani <<Zawa axita modhussi e ahorosaara ususe e woggana woggana kaxa e ingoronikiyara laaxi maagexe muxhuraxe maaqe ade oomona zawa ahe gaxaxi oonena?

⁴³Laaxi be yoone wogga yeydi hantiya e yesune degexe ye maalay galatuttesesako.

⁴⁴Aadewoko hinuse ta ohe. Uddi be keenge abako garako esa e maagexe.

⁴⁵Maaqe baa ye maalay <Ta laaxi ukke yoowasso> hidi be muxhurowa massi muuta usho goojho hissine asanxeni maaqqe maacho e maalita e durusune

⁴⁶ye iita maalase e laaxi e masso baa wontiyakaara e erdo baa saatiyakaarako e yoone. Ye be maala gara laaxi keddaydese yaa'ako e yaa'e, go'uwa axituka e dakke.

⁴⁷Laaxi woosecho woosso erisine hanto baasi naqutto baasi ye maalay orjenako e durutte.

⁴⁸Maaqe baa erdo baasimay yaa'a be gara oone abako erdo badi e hantako yaa'ay e gara shawukako e shawuke. Ye esini laga be indo axi garafa lagako e worge, <Odde, taase hantuwa!> yeydi hissine laga be oto axi garafa keddaysiko laga e oyce>> hidi e hido.

⁴⁹Sekkeni Yesuusay <<Tani ha saha gara yoodosi tamana meggesuko. Hinne ukke e eexhako waakeydi taase e modhasheeshi.

⁵⁰Maaqe baa ta xhamaqutte maddha xhinqateko taase yesa. Ye esi aaloro makko gehunxe keenguwasso.

⁵¹Ha saha gara ta oodosi modhetiya hinumba e bisshe? Hinuse ohoko ta ohe, tanimay oodosi shahoko baaka modhete maaquwasso.

⁵²Hattiyafa ayti bidzi zawa giddaa yese ichichi axiti haydzi wol bade maaddhi lam'i gara u dende, lam'i wol bade maaddhi haydzi gara dendaydiko wola u shahe.

⁵³Adey be yele gara, yeley biyade gara, indoy be busho gara, bushoy beyndo gara, boolti be na'i machi gara, na'i machi be boolti gara birre densi wola u shahe>> yeydi e hido.

⁵⁴Assi Yesuusay axituse <<Dhumay hadursi badena yoonesa hi beeneniya, yenniyawo <Iray hanzo bukkako bukke> hidiko hiine, aadewo yeydi e maaqe.

⁵⁵Agexi oomo badefa wokke agetesa hi beeneniya <Hanzo awway iitanako awwe> yeydi hiine, aadewo e maaqe.

⁵⁶Hinuno awshachito! Afasaara ha sahasaara u bisha beedi aba wontay maaqesa eresuko hi danda'e. Hine ame ha bera bisha beedi aba e maaqesa erese hi danda'uwaane?>> hidi e hido.

⁵⁷Sekkeni assi Yesuusay <<Waydi hinuse aade zeere erdi hi yaa'uwaane?

⁵⁸Ne iilaxi nemba luutti yaa'esi buro aangeniyaka ogiya wolko hangisine naquttese neese karduttuwa! Naqutte ne dheeba'ayko yaa'esuse nemba goosshi e ingete, yaa'esi nemba garsiko tukkeesuse indi tufe zawa niya e gelsuse.

⁵⁹Neese ohoko ta ohe, ne gara unda miijhe uddi laaqani shato badi shandi ne alsoro aallo yahafa kesese danda'uwannako>> hidi e hido.