Read koorete Luqaase 13 Bible Online

Luqaase 13 - koorete bible

Luqaase 13

¹Ye woggaaka bidzi bidzi axiti Yesuusako yoodi <<Galila wude axiti Wontose kaasha u kaashichoyneko Philaxhosey uso woddhi also. U suuxini u kaashaara wolko worqutto>> hidi u odusso.

²Yesuusani <<Hine ye axiti ye e gede baysoy u gara ellosi fede Galila wude axitume uddi gardi cubbache u maaqichoshuwa hinumba e bishe?

³Fetto maaquwasso hidiko tayne. Hi cubbo dhaddi maaqe hi dheeba'ayko hinunini hade usukeko hi maaqe.

⁴Siloome shuchi zaway u gara woddi also tamma hazzuppi axituse am hi maxe? Ye tamma hazzuppi axiti Yerusaleeme yese axitume uddi gardese cubbachituwa hinumba u bishe?

⁵Fetto garuttuwasso hidiko tayne. Hi cubbo dhaddi maaqe hi dheeba'ayko hinuni hade usukeko hi baane>> yeydi e hido.

⁶Ye e geede Yesuusay bidzi mamako e mamatto. Ye esini <<Bidzi axi be gatiya tottecho bidzi mixi belese sungesi e yecha. Ye mixi garafa aafe maxhese handi bidzoni e dheeddo.

⁷Hinne ye e gisha ye gate hanticha ade <Ha mixi garafa e aafe maxhese haydzi bera aallo maaddhi maaddhiko ta yoodo. Bidzi aafeni hatte aallo e garafa degesso baasso. Yoonase esa bursi ooxuwa, abasuna saha ayti godo e tuce?> hidi e hido.

⁸Ye godo hantichashini <Laaxo, mee, ha berase dhagguwa! Modhussi madhetti igisa e baala gussi ta beyyeese.

⁹Yoone berase aafe e kaxho'ayko modheko, kaxhe e dheeba'aykoma buroko e bure> hidi e mato>> hidi e hido.

¹⁰Ayhuda sanbata wonte Yesuusay bidzi Bhikkilo Zawaa erusiya e yecha.

¹¹Hinne yahani tamma hazzuppi bera makko xhoozi iso ayti doomusecho indoy i yecha. I zahey doondine gizzi hante eruwadi i yecha.

¹²Yesuusani iso be beedo wogga xheydi <<Nuunde, ne hargey nemba dattosso>> hidi e hido.

¹³Kuchena iso e dollinne yenniyawo gizzi eedhi Wonto kedda kedda i hisso.

¹⁴Ayhuda Bhikkilo Zawase afana maagay sanbata wonte e loolusso gisha huulli yaha yecha axituse <<Bidzi saminte giddaa hanta essa hantuso izzuppi wontay yesako yese, yeenxhi wonta aallo yoodi looluwayte! Sanbata wonte loole worgusuwasso>> hidi e hido.

¹⁵Laaxi Yesuusani esuse <<Hinuno awshachito! Hi bidzi bidzikaafa sanbata wonte hi maydo sollaafa birshi harre zawafa kessi waaxe e ushorosa aanguwasi ooneni yesa?

¹⁶Abrahaame nayshaafa maaqe ha indoy tamma hazzuppi bera aallo Humbayey ayti tutti maddhunxusune dooddiko i yecha. Hinne esuna tufutti be yecho hargiyafa sanbata wonte birchutte iso worgusuwaye?>> yeydi e hido.

¹⁷Yeydi e zeerdine ye iilichaashiti uddina u borso. Axitimay Yesuusay hanto micushe hanta uddi beedi u maddo.

¹⁸Yesuusay assi <<Wonto kaatetey am e bishe? Fetto aba garawa yeraddi ta oho?

¹⁹Bidzi axi be gatiya baallo bidzi senafice sunge mixi aafe laaqiyoko e bishe. Ye esini dicci mixi malla e maaddho. Kafitini e hange gara keexxhi utto>> hidi e hido.

²⁰Yesuusani sekke <<Wonto kaatete aba garawa yeraddi ta oho?

²¹Bidzi indoy haydzi jhal'a dhiilaaka iraacite etti esaara i dhon'o. Hinne aalliciraaka ye dhiilay be kumena dendosako e bishe>> yeydi e hido.

²²Ye e geede Yesuusay Yerusaleeme e aadho. Hangisineni katama giddaannani katamame wude yese axiti giddaannani erusisine e hangicha.

²³Bidzi adey <<Laaxo, Wontoy looluse axi lagaani oddhena?>> hidi e oycco. Yesuusani esuse

²⁴<<Xhuumo sumaanna gelese karduttuwayte! Hinuse ohoko ta ohe, ye xhuumo sumaanna gelese worgeesiti lagako, maaqe baa gelese danda'uttuwasso.

²⁵Ye zawaadey dendi gasa e ayto geede hinuni sumaaka eedhi gasa dolisine <Laaxo, odde, gasa nuuse do'uwa!> yeydi hiye hi ayke. Esini <Ayafa hi yoodosa eruwasso> hidi e mahe.

²⁶Yenniya hinuni <Ha nunichi neera wolko muuta ussho nu giddaani axe erusa ne hichoshi?> yeydi hiine.

²⁷Hatteni esi <Ayafa hi yoodosa tani eruwasso. Hinuno iita hanteesito, hayafa ukke haruwayte> yeydiko e hine.

²⁸Hinunimay wudena hi atte. Abrahaameni, Yissaaqeni, Yayqoobeni kaayaxita uddina Wonto kaatetiya hi beeneniyaka yenniyani hi yeeke, gaggoni hi qiice.

²⁹Laga axiti oshichi badefa, hadursi badefa, afa badefa, oomo badefa yoodi Wonto kaatetowa tato gara u utte.

³⁰Aadewoko geede yeseesitaafa bidzi bidziti burose u maaqe, buro yeseesitaafa bidzi bidziti geedese u maaqe>> yeydi e mato.

³¹Yenniyawo bidzi bidzi Farasaxiti Yesuusako yoodi <<Herodisey nemba wodhese worge gisha hayafa dhaddi hanguwa!>> hidi uydo.

³²Yesuusani <<Ye fayanka geedalako handi < <<Hanzowara gutaarako xhooze ta goode, hargaxe ta looluse, ta hanta haysso wonteko ta alse>> hidi e hido> hidi esuko ohuwayte.

³³Maaquwaye baaka kaayaxe hay'e e worgusesi Yerusaleeme baaka are e worgusuwa gisha hanzo guta hinto oge gara yeseko taa e worguse.

³⁴Yerusaleeme, Yerusaleeme! Kaayaxita wodheyo! Neeka anxuttechaashitani shuchuna iceyo! Lukkali be fange oomo be nayshita bhikkilenike aanxhi woggani ne axita bhikkilese ta wordo. Hinunimay <Eehuwanxhiko> yeydi hiido.

³⁵Ha e gisha hi gatey kayako e atte. Hinuse ohoko ta ohe, hinuni <Wonto sunxuna yoonesi suuzuttesesako> yeydi hi hiyoro makko koolo taa bewaytako>> yeydi e hido.