Read koorete Luqaase 14 Bible Online

Luqaase 14 - koorete bible

Luqaase 14

¹Sanbataafa bidzi wonte Yesuusay afana maaga maaqe bidzi Farasaxaara kaxa miyese esso e gello. Farasaxiti aba e hantesa beyese u kakkicha.

²Bidzi adey e garay kumena kixhesesi yaha e buro yecha.

³Yesuusani Muse woga eraxitaara Farasaxitaara <<Sanbata wonte hargaxe loolusese wogay tucaa e tuceni tucuwannikeni e hido?>> hidi uso e oycco.

⁴Usini mikki uydo. Ye adeni ayti loolussi e anso.

⁵Yesuusani <<Hinukaafa e yeley oo'oyne e maydoy waaxuse bootecho hobolowa undako sanbata wonte kessuwasi oonewa yesa?>> hidi e oycco.

⁶Ye esani mahe u dheeddo.

⁷Yesuusay massalase xheyguttecha axiti kuxa godowa uttese karduttesa beedi ususe bidzi mamako e mamatto.

⁸<<Axi kuula zawa xheygeniya kuxa godowa uttofuna! Hanno neeme kuxuttese axe xheydesesako e maaqe.

⁹Nembani maaqe esa xheydecha adey yoodi <Ha godowafa dendi se esuse dakkuwa!> hidiko e hine. Yenniyaka iitana borsisine dendi ulla godowa ne utte.

¹⁰Maaqe baa kuula zawa ne xheyguttoroniyaka neese handi ulla godowa uttuwa! Yaha ne uttusune nemba xheydecha adey neeko yoodi <Nuundo na'e, dendi se kedda godowa uttuwa!> hidiko nemba e hine. Yenniyako yaha xheygutti yoodecha axiti da'aa kuxa ne degexe.

¹¹Ye esini bemba kedda kedda hisesi uddi ulla ullako hine, bemba ulla ulla hisesi kedda keddaydi e hine gishako>> yeydi e hido.

¹²Yesuusay ye xheydecha adese <<Massala naddhi boltoseni maaqqe qameteseni axe ne xheygeniyaka ne laggita, neyndo na'axhita, ne iginita, wodundese ne doodita xheydofuna! Ye usiti sekke nemba xheydiko ne wooma shamese u danda'e.

¹³Nenimay massala ne naddho geede jhi'ita, kuche toke facesheeshita, doomita, bal'ita xheyguwa!

¹⁴Neese u mahesi baa gisha suuzuttesesako ne maaqe. Gizo axiti haybowafa dendeniyako ye ne wooma Wontoy neese shange>> yeydi e hido.

¹⁵Ye tatowa uttiya yecha axitaafay Yesuusay yeydi zeerdosa siidi <<Wonto kaateto tatowa uttese danda'esi abakeydi suuzuttesesana!>> hidi e hido.

¹⁶Yesuusani <<Bidzi adey orje tato naddhi laga axita e xheydo.

¹⁷Tatoy naqutto geede be xheydecho axita <Uddi basi naquttiko yese, yoowayte!> hidi u ohorosa be maala usuko e anso.

¹⁸Be uddinawo yoowe inxhadhi goymutte u gello. Buronasi <Sahako ta woondese, handi ta beyorosako tamba e worguse. Tamba yaha ellusuwasso. Odde, taa iillofuna> hidi e hido.

¹⁹Feday <Ichichi xhimaade maydaxheko ta woondese, uso beyese taa e worguse gisha odde, tamba yaha ellusuwasso, taa iillofuna> hidi e hido.

²⁰Assi feday <Macho haga ta ettese gisha ellusuwasso> hidi e hido.

²¹Ye e maalani handi haanxho uddina be laaxuko e oto. Yenniyaka laaxi huulli <Ukkewo katamaa uddi ogey yese aallo hanguwa! Jhi'ita, tokiyafa kuchiyafa burdeseesita, bal'ita, hamese danda'uwasita hana oti etti yoowwa!> hidi e hido.

²²Ye e maalani handi yoodi <Laaxo, ne otonike etti yoodusso. Godomay kundo baasso> hidi e hido.

²³Laaxini <Ta zaway kumoronike katamame wude uddi ogey yese aallo handi u yooworonike minsi ohuwa.

²⁴Hinuse ohoko ta ohe, burona xheyguttechashitaafa bidzini fetto ha massalaafa dadda'uttuwasso> hidi e hido>> yeydi e zeerdo.

²⁵Laga axiti Yesuusaara hamiya u yecha. Esini usuko maaddhi

²⁶<<Taako yoonesi uddi biyadeni, beyndoni, be machoni, be naysheni, beyndo na'axhe, beyndo bunayce, fetto be yesoni dhaddo badi taame garsi eehesi taara hangesa maaqese danda'uwasso.

²⁷Be suxi mixe iddi ta geede yoowasi taara hangesa maaqese danda'uwasso.

²⁸Bidzi hinukaafa shuchi zawa keexhese wordako ye zawa keexxhi alsese e miijhey ellesa e maaqesa uttiko e maxe.

²⁹Kaacho kaashi keexhe aytechine keexe keexxho badi e dhaba'ayko ye buro keexhe e aytechosha beedechaashiti uddi e gara qozoozziko

³⁰<Odde, ha axi zawa keexhese aytechoyneko esa e iissho!> hidiko u dhaadde.

³¹Assi ye esuke bidzi wude kaati tammi kuma tooraxe dargesa keengesi toora kesesesa maaddhako fede wude kaati assi lam'i tammi kuma tooraxe dargesa keengesi esuko yoonesa maaqo hidako tammi kuma tooraxe keenge kaati burussi beese utti se'esa iicheshe be danda'esako be axaara e kunge.

³²Osay dargese danda'uwasa maaqesa be erdo geede zara e yesune be woosaxe ansiko naqo e oyce.

³³Ye esuke beese be keengesa uddi dhaddo baa axi ooneni taara hangesa maaqese danda'uwasso>> yeydi e hido.

³⁴Sekkeni assi Yesuusay <<Sogoy modheko. Loo'e e dheeddako abanaw sekke loo'usese e danda'utte?

³⁵Ye loo'uwa sogoy woota sahay litti kaxa ingoronikeni maaqe oshaara worqutti igisaseni go'uwasa be maaqe gisha yenniyawoko wude kessi wora e dafutte. E siyorosa washey yesesi naddhi siwwaye!>> yeydi e hido.