Read koorete Luqaase 15 Bible Online

Luqaase 15 - koorete bible

Luqaase 15

¹Yenniyaka qaraacitaara cubbachitaaray uddina Yesuusay erusesa siya e da'aa u bhikkilutticha.

²Farasaxitaara Muse woga eruseesitaaray ye esa beedi <<Ha esi cubbachitaarako e feyshe, usaara wolkoko kaxa e muune>> hidi sekke hanke umbu umbu uydo.

³Ye e gisha Yesuusay ususe bidzi zeere zeerisine

⁴<<Bidzi axi hinukaafa xhiixi dore keengesa maaddhako ye doritaafa bidzi baadako odduppi tamma odduppe gubba datti be degexoro makko worgiya hanguwaye?

⁵Be degesso geede iitana maggisineko be ontaa iddi e oone.

⁶Be zawa etti be yoodo geede be laggitani be dooditani xheydi <Ta dore baadechashe degesuusso. Gere, taara wolko magguwayte!> yeydiko e hine.

⁷Tanini hinuse ohoko ta ohe. Yeydiwo maaro esuse e worgusuwa <Gizoko nuni> hidi hine odduppi tamma odduppume be cubbo dhaddi maaddha bidzi axi gisha afaaka yeseesiti keddaysiko u magge>> yeydi e hido.

⁸Sekkeni Yesuusay <<Ye esukewo worqiyafa hantuttese yenniya birre maaqichashe tamme keengicha bidzi indoy bidzi essaafa baadako am i hante? Be faqe faddhi be zawa uddina fitti e bentoro aallo modhussiko i worge.

⁹Ye be miijhe be degesso geede be laggita, be dooxita bidzina xheydiko <Baadi yecha ta miijhey bentosso, hinunini taara magguwayte!> hidiko i hine.

¹⁰Yeydiwo be cubbo dhaddi maaqe bidzi cubbachi gisha afaa yese Wonto woosaxitini maggako u magge>> yeydi e hido.

¹¹Assiwo Yesuusay <<Bidzi adey lam'i na'axhe e keengicha.

¹²Hinneko barsi biyade <Abbayo, ne woduntiyafa shati ne geede taa ellichashe hattewo taase inguwa!> hidi e hido. Hinne esadey ye be wodunte angussuseni barsuseni e shato.

¹³Oddhe wonta geede barsi bemba ella miijhe uddi bhikkilli etti dhaddi zara wude e hando. Be hando wudiya ye be miijhe uddina maaquwa ogena seya haya e bayso.

¹⁴Ye miijhe buddi be bayso geede ye wudiya iita naayey undinne maddhaa e gello.

¹⁵Hinne ye wude axe maaqe bidzi adeso e gellinne ye adeni girmita e yeemorosa esa gubba e anso.

¹⁶Esini naayey esa iitana oycco gisha ye girmiti muunesaafa miyese iitana e col'icha. Ye essafani esuse ingesi badiko yecha.

¹⁷Yenniyani ye na'i bemba erdi <Nuwade zawaa wooma efese hante hantaxiti boora misshi be dhaboro makkoko u muune. Tani haya naayenako hay'e.

¹⁸Yoonase dendi nuwadeko handi <<Abbayo, Wontosaara neesaara baysiko ta yese.

¹⁹Ha e geedema sekke <Ha esi ta yeleko> hidi ne hinesa taa bishuwassho. Ne zawaa woomana hante hantaxitukaafa hade bidzike mati tamba taakuwa!>> hidiko ta hiyye?> hidi e hido.

²⁰Dendi biyadeko e yoodo. Yeley senawo zara yesune adey esa beedi higilli esuko woxxhi handi be fengaa ayti e muuxxho.

²¹Ye yeleni <Abbayo, ha e geedema sekke <<Ha esi ta yeleko>> hidi neynesa tamba bishuwassho. Wontoseni neeseni baysiko ta yese> hidi e hido.

²²Adey be maalita xheydi <Uddi maa'ome gardi moddhese maa'o oodi maysuwayte, e gil'aakani qubhe e tokeseni kobha oodi gelsuwayte!

²³Mallese maydo oodi shukkuwayte, nu miyyeese, nu maggoose.

²⁴Esume taynesini ha ta yeley haydhi yechine sekkeni hay en'ako e yese, baadi yechine hay bentiko e yese> yeydi hidi magge u gello.

²⁵Na'i angussi yenniya wootaa yechine yoodi zawa uqisine osiyara zimbe katowara e siido.

²⁶Maalitaafa bidzo xheydi <Aba osena ha osey?> hidi e oycco.

²⁷<Ne barsi yooneko adey modhena esa be degesso gisha mallese maydo e shuttese> hidi e hido.

²⁸Angussini huulli zawa gele e inxhadho. Adey zawafa kessi e gelorosa shidho.

²⁹Na'ini <Abbayo, bidzo siwwa! Haanxhi bera aalloko ne zawa hade maraxuke ta hanto, ne woossose bidzi wonteni ta geede gara hido baasso. Hinne bidzoni ta laggitaara wolko ta kaa'orosa bidzi orgeni taase shutti eruwannako.

³⁰Ha ne na'imay ne wodunte laggeteesitaara wolko buddi baysi hanke e yoonne mallese maydo esuse ne shutto> hidi e hido.

³¹Adeni <Ta yelle, nenimay uddi woggawoko taara wolko ne yese. Taasi be uddina neesewoko.

³²Ha ne barsi haydhi yechine en'a e maaddho gisha baadi yechine e bento gisha maggani muutani ushoni hiyeko numba e worguse> hidi adey hido>> yeydi Yesuusay e mamatto.